ދިރިއުޅުމުގެ ބޮޑެތި ސައްލާތައް ޓިކްޓޮކް ލައިވްގައި!

ބައެއް މީހުންނަކީ އެމީހުންގެ ދިރިއުޅުމުގެ ކަންކަން ސޯޝަލް މީޑިއާގައި އާއްމު ކުރަން ބޭނުންވާ ބައެކެވެ. ދިރިއުޅުމުގައި ކުޑަ އުފަލެއް ލިބުނު ނަމަވެސް ކުޑަ ދެރަކަމެއްވި ނަމަވެސް ވަގުތުން ސޯޝަލް މީޑިއާގައި އެ ޕޯސްޓް ކޮށްލަން ކެތްމަދުވެފައި ތިބޭ މީހުން އުޅެއެވެ. މިގޮތަށް މިހާރު ފާހަގަ ކުރެވޭ އެއް ޕްލެޓްފޯމަކީ ޓިކްޓޮކްއެވެ.

ރާއްޖޭގެ ގިނަ ބަޔަކު މިހާރު ޓިކްޓޮކް ބޭނުން ކުރެއެވެ. އެޕްލެޓްފޯމުގައި ވީޑިއޯ ހަދާ ހުރިހާ ކްރިއޭޓަރުންނަކީ ވެސް މިހާރު ދިވެހިން ދަންނަ މޫނުތަކަށް ވަނީ ވެފައެވެ. އެހެންކަމުން ގިނަ ބަޔަކަށް މި ފަރާތްތަކުގެ ދިރިއުޅުމުގައިވާ ކަންކަން ވަރަށް ޝައުގުވެރިވެއެވެ. އެއީ ދިރިއުޅުމުގެ ކަންކަން ޓިކްޓޮކްގެ ޒަރީއާއިން ބެލުންތެރިންނާ ހިއްސާ ކުރާތީއެވެ.

ޓިކްޓޮކްގައި މިހާރު އެންމެ ހިނގަނީ ލައިވްތަކެވެ. މިއީ ވީޑިއޯ ކްރިއޭޓް ކުރާ ފަރާތްތައް ވަގުތުން އެ މީހުންގެ ބެލުންތެރިންނާ ނުވަތަ "ފޭނުންނާ" ބައްދަލުކޮށްލާ ވަގުތެކެވެ. އެތައް ގަޑިއިރެއް މި ލައިވްގައި މީހުން ހޭދަ ކުރެއެވެ. ލައިވްއަށް ކޮމެންޓު ކުރާ މީހުން ކުރާ ސުވާލުތަކަށް ޖަވާބު ދިނުމާއި އެ މީހުން ކުރާ ބައެއް ކަހަލަ ޓާސްކުތައް ފުރިހަމަ ކުރުން ފަދަ ކަންކަން ކުރުމުގައެވެ.

އެހެންނަމަވެސް މިހާރު އެންމެ އާއްމު ކަމަކީ މި ލައިވްގައި ތިބެގެން ދިރިއުޅުމާ ގުޅޭ ވާހަކަތައް މަޝްވަރާ ކުރުމެވެ. އެއްބަޔަކު ލައިވްގައި ތިބެގެން މާ ފޮޅުވައި، ކައިވެންޏާ ހިސާބަށް ދާއިރު އަނެއް ބަޔަކު ވަރިވަނީ ވެސް މި ލައިވްގެ ތެރެއިންނެވެ. ދެމަފިރިންގެ ޒުވާބު ލައިވްގައެވެ. އަނެއްބަޔަކު ކައިބޮއި ހަދަނީ ވެސް ލައިވްގެ ތެރެއިންނެވެ. ބައެއް މީހުން ލައިވްގައި ބަރަހަނާ ވެސް ވަނީއެވެ.

މިހާރު އެންމެ ބޮޑަށް ހިނގާ ބަހުސަކަށް ވެފައި އޮތީ ރާއްޖޭގައި ޓިކްޓޮކް ކުޅޭ ދެ ދިވެއްސެއްގެ ކައިވެނީގެ ވާހަކައެވެ. ދެ މީހުންނަށް ކައިވެނި ނުކުރެވިގެން އުޅޭ ވާހަކައާއި ކައިވެނި ނުކުރެވިގެން އުޅޭ ސަބަބުތަކުގެ ވާހަކައެވެ. މިވާހަކަތަކަށް ވެސް ހާއްސަ ކޮށްގެން ލައިވްތައް ކުރިއަށްގެންދެއެވެ. މި ވާހަކަތައް ދައްކާއިރު ލައިވްގައި ތިބެނީ ކައިވެނި ކުރަން ބޭނުންވާ ދެ މީހުންނެވެ. ދެން ތިބެނީ ދެ މީހުންގެ ފަރާތުން ވާހަކަދައްކާ މީހުންނާއި މޮޑަރޭޓަރެވެ. އެހެން ގޮތަކަށް ބުނާނަމަ، ގާޒީ އާއި ދެ ހެކިވެރިންނާއި ކައިވެނި ކުރާ ދެ މީހުންނެވެ.

މި ލައިވްގައި ދައްކާ ވާހަކަތަކަކީ އާއްމުކޮށް މީހުން އެކަނިތިބެ ސިއްރިއްޔާތުގައި ދައްކާ ވާހަކަތަކެވެ. އެއީ އަމިއްލަ ދިރިއުޅުމާ ގުޅުންހުރި މިފަދަ ވާހަކަތައް އާއްމުންގެ ތެރޭގައި ދެއްކުމަކީ މާ ރަނގަޅު ގޮތަކަށް ނުވާތީއެވެ. ދަރިންގެ ވާހަކަތަކާއި ދެމަފިރިންގެ ވާހަކަތައް ލައިވް ތެރޭގައި ދައްކާއިރު އެވާހަކަތައް އެ އިވެނީ މުޅި ދުނިޔެއަށް ކަމެއް ހިތަށް ވެސް ނާރަނީއެވެ. ލައިވް ބަލާ ބައެއް ފަރާތްތަކުން ވެސް އެފަދަ ވާހަކަތައް ނުދެއްކުމަށާއި އެފަދަ މަޝްވަރާތައް ނުކުރުމަށް ވެސް އެދެއެވެ.

ލައިވްގައި އެ ވާހަކަ ދައްކަނީ އެވާހަކަތައް އަޑު އިވޭނީ ހަމައެކަނި ލައިވް ބަލަން ތިބި މީހުންނަށް ކަމަަށް ހީކޮށް ކަމަށް ވެސް ވެދާނެއެވެ. ގިނަ ފަހަރު މިކަހަލަ ވާހަކަތައް ދައްކަނީ ދަންވަރު ވަގުތުގައި ކަމަށްވުމުން ލައިވް ބަލާ މީހުންގެ އަދަދު އެހާ ގިނައެއް ނޫނެވެ. ނަމަވެސް ލައިވް ބަލާ ބައެއް ފަރާތްތަކުން މި ލައިވްތައް ރެކޯޑު ކުރެއެވެ. އެއަށްފަހު ސޯޝަލް މީޑިއާގެ އެކި ޕްލެޓްފޯމުތަކަށް އެ ވީޑިއޯތައް ދޫކޮށްލައެވެ.

ތިމާގެ ދިރިއުޅުމުގައިވާ ކަންކަން ހިއްސާކުރަން ވާނީ ވަރަށް އިތުބާރު ހިފޭ، ތިމާއާ މެދު ހެޔޮ އެދޭ މީހުންނާއެވެ. ނަމަވެސް މިހާރު އެއްވެސް ވަރަކަށް "ޕްރައިވަސީ" އަކަށް ބެލުމެއް ނެތެވެ. އަމިއްލަ ދިރިއުޅުމުގައި ހުރި ގޯސްކަންކަމާއި ރަނގަޅު ކަންކަން އަދި ކޮންމެހެން ސިއްރު ކުރަން ޖެހޭ ކަންކަން ވެސް ބަންޑުން ކޮށްލަނީ އެއްކަލަ ޓިކްޓޮކް ލައިވްއަށެވެ. މުޅި ދުނިޔެއަށް ފެންނަ ގޮތަށެވެ. މިއީ ރަށު ރައްޔިތުން އެއްކޮށްގެންތިބެ ޒުވާބު ކުރުން ފަދަ ކަމެކެވެ.