ނޫސްވެރިންނަށް ތަމްރީނު ހޯދައިދިނުމަށް އެމްއެމްސީން ޗައިނާ އެމްބަސީއާ މަޝްވަރާކޮށްފި
ނޫސްވެރިންނަށް ތަމްރީނު ފުރުސަތުތައް ފަހިކޮށްދިނުމަށް މަސައްކަތްކޮށްދޭނެކަމުގެ ޔަގީންކަން ޗައިނާ އެމްބަސީން ދިން
މޯލްޑިވްސް މީޑިއާ ކައުންސިލުން ޗައިނާ އެމްބަަސީގައި ބޭއްވި ބައްދަލުވުން
ދިވެހި ނޫސްވެރިން ތަމްރީނުކުރުމަށް އިތުރު ފުރުސަތުތައް ހޯދައިދިނުމާ ގުޅޭގޮތުން މޯލްޑިވްސް މީޑިއާ ކައުންސިލުން (އެމްއެމްސީ)ން ޗައިނާ އެމްބަސީއާއެކު މަޝްވަރާކޮށްފިއެވެ.
މީޑިއާ ކައުންސިލުން ބުނީ، އެ ކައުންސިލުން ނޫސްވެރިން ކުރިއެރުވުމަށް ކުރަމުންދާ މަސައްކަތްތަކުގެ ތެރެއިން ޗައިނާގައި ތައުލީމީ ޚިދުމަތްދޭ މުއައްސަސާތައް މެދުވެރިކޮށް ނޫސްވެރިންނަށް ތަމްރީނު ފުރުސަތުތަކެއް ހޯދައިދިނުމަށް މަޝްވަރާކޮށްފައިވާ ކަމަށެވެ. އެ މަޝްވަރާތަކުގައި މޯލްޑިވްސް މީޑިއާ ކައުންސިލުގެ ފަރާތުން ބައިވެރިވެވަޑައިގަތީ، ކައުންސިލްގެ ރައީސް އަލްފާޟިލް މުހައްމަދު ޝަފާއު ހަސަން، މެންބަރު އަލީ ހުސައިން، މެންބަރު އަހުމަދު މޫސާ އަދި ކައުންސިލްގެ ސެކްރެޓަރީ ޖެނެރަލް ޑރ. އިބްރާހީމް ސަމީރެވެ. އަދި ޗައިނާ އެމްބަސީގެ ފަރާތުން ބައިވެރިވެވަޑައިގަތީ އެމްބަސެޑަރ އެކްސްޓްރާއޯޑިނަރީ އެންޑް ޕްލެނިޕޮންޓެޝަނަރީ ވެންގް ލިޒިންއާއި އެޓާޗޭ ވެންގް ލޯންގހޯއެވެ.
މި ބައްދަލުވުމުގައި ޗައިނާއަށް ދިވެހި ނޫސްވެރިން ފީލްޑް ޓްރިޕް ފޮނުވުމާއި ގުޅޭގޮތުން މަޝްވަރާކޮށްފައިވެއެވެ. އަދި އެމްއެމްސީގެ ފަންނީ ގާބިލުކަން އިތުރުކުރުމަށް އެހީތެރިވެދިނުމުގެ އިތުރުން، ނޫސްވެރިންނަށް ސްކޮލާރޝިޕް ޕްރޮގްރާމްގެ ފުރުސަތު ހޯދައިދިނުމަށް ކުރިއަށް އޮތް ދުވަސްތަކުގައި ގުޅިގެން ކުރެވިދާނެ ކަންކަމާ ބެހޭގޮތުންވެސް ވަނީ މަޝްވަރާކޮށްފައެވެ.
އެ ބައްދަލުކުރެއްވުމުގައި، ދިވެހި ރާއްޖޭގައި ހުންނަވާ ޗައިނާ އެމްބަސެޑަރ އެކްސްޓްރާއޯޑިނަރީ އެންޑް ޕްލެނިޕޮންޓެޝަނަރީ ވެންގް ލިޒިން ވަނީ ދިވެހި ނޫސްވެރިންނަށް ތަމްރީނު ފުރުސަތުތައް ފަހިކޮށްދެއްވުމަށް މަސައްކަތްކޮށްދެއްވާނެކަމުގެ ޔަގީންކަން ދެއްވާފައިވާކަމަށް އެމްއެމްސީން ފާހަގަކުރެއެވެ.
