ޓްރަމްޕް ދިރިއުޅުއްވާ ރިސޯޓުން 700ށްވުރެ ގިނަ ސަފުހާގެ ސިއްރު ލިޔެކިޔުންތައް އަތުލައިގެންފި

އެމެރިކާގެ ކުރީގެ ރައީސް ޑޮނަލްޑް ޓްރަމްޕް ދިރިއުޅުއްވާ ރިސޯޓުން 700ށްވުރެ ގިނަ ސަފުހާގެ ސިއްރު ލިޔެކިޔުންތައް އަތުލައިގެންފައިވާކަމަށް އެ ގައުމުގެ ގައުމީ އަރުޝީފުން ބުނެފިއެވެ.

ރިޑާގެ ޕާމް ބޯޗުގެ މާރް-އަ-ލާގޯގައި ހުންނަ ޓްރަމްޕުގެ ރިސޯޓުން ގިނަ އަދަދެއްގެ ސިއްރު ލިޔެކިޔުންތަކެއް ހޯދާފައި ވަނީ މި މަހުގެ 8 ވަނަ ދުވަހު ފެޑެރަލް ބިޔުރޯ އޮފް އިންޓެލިޖެންސް (އެފް.ބީ.އައި)ން ޖެހި ރެއިޑެއްގައެވެ.

އެ ރެއިޑުގައި އެފް.ބީ.އައިން ވަނީ ވައިޓް ހައުސްގެ ލިޔެކިޔުންތައް ހުރި 20 ފޮށިގަނޑު ހޯދާފައެވެ. އޭގެތެރޭގައި އެމެރިކާގެ ޤައުމީ ސަލާމަތާ ގުޅުންހުރި މައުލޫމާތުގެ މައްޗަށް އެކުލެވޭ ސިއްރު ލިޔެކިޔުންތައް ހިމެނެއެވެ.

އެ ގައުމުގެ ގައުމީ އަރުޝީފުން ޖަނަވަރީ މަހުވެސް ވަނީ ޓްރަމްޕް ވަގަށް ގެންދަވާފައިވާ ގިނަ އަދަދެއްގެ ލިޔެކިޔުންތައް ހޯދާފައެވެ. ޓްރަމްޕްގެ ފްލޮރިޑާގައި ހުންނަ އެސްޓޭޓް، މަރ އަ ލާގޯއަށް ވަދެ މިމަހުގެ ކުރީކޮޅު އެފްބީއައިން ގެންދިޔަ ފައިލްތައް ބެލުން ހުއްޓުވައިދިނުމަށް އެދިވަޑައިގެން ޑޮނަލްޑް ޓްރަމްޕް ވަނީ ކޯޓަށްވެސް ވަޑައިގެންފައެވެ.

ޓްރަމްޕްގެ ގާނޫނީ ވަކީލުން ވަނީ އެފައިލްތައް ތަހުގީގުކުރުމުގެ މައްސަލަ މިނިވަން ވަކީލެއްގެ ބެލުމުގެ ދަށުން ކުރިއަށް ދާގޮތަށް ނިންމައިދިނުމަށްވެސް ކޯޓުގައި އެދިފައެވެ.

އޮގަސްޓް 8 ވަނަ ދުވަހު އެފްބީއައިގެ ޚާއްސަ އޭޖެންޓުންގެ 24 މެމްބަރުންގެ ގްރޫޕަކުން ވަނީ ކުއްލި ގޮތަކަށް ޓްރަމްޕްގެ ބިޔަ ގަނޑުވަރު މަރ އަ ލާގޯއަށް ވަދެ، އެތަން ބަލައި ފާސްކޮށް، 11 ސެޓުގެ "ކްލެސިފައިޑް" ޑޮކިއުމަންޓުތަކެއް އެތަނުން ނަގާފައެވެ. ރިޔާސީ ގަނޑުވަރުގެ ޑޮކިއުމަންޓެއް އެއްވެސް ގޮތަކަށް އެތަނުން ނެރުމަކީ އެމެރިކާގައި ގާނޫނީ ކުށެކެވެ. އެހެންކަމުން ޑޮކިއުމަންޓުތަކަށް ފަރުވާކުޑަކުރެއްވިކަމުގެ ދައުވާ ވަނީ ޓްރަމްޕްގެ މައްޗަށް ކުރެވިފައެވެ.

އެމެރިކާގެ ގާނޫނުގެ ދަށުން ހުރިހާ ރައީސުން ވެސް އެބޭފުޅުން ގެންގުޅުއްވި ޑޮކިއުމަންޓުތަކާއި އީމެއިލްތައް، ސަރުކާރުން ބަލަހައްޓާ ނެޝަނަލް އާރކައިވްއަށް ބަދަލުކުރަންޖެހެއެވެ. އެފްބީއައިގެ މި ތަހުގީގަކީ ޑޮނަލްޑް ޓްރަމްޕްގެ މަގާމުގެ މުއްދަތު ހަމަކުރައްވައި ވަޑައިގެންނެވިއިރު، މިގޮތަށް އާރކައިވްއަށް ނުލައި އަމިއްލަ ގަނޑުވަރަށް ޑޮކިއުމަންޓްތައް ގެންދަވާފައިވާތީ ކުރާ ތަހުގީގެކެވެ.

ޓްރަމްޕް ވަނީ އޭނާ ކުށެއް ނުކުރައްވާކަމަށާއި އޭނާ ގެންދެވި ޑޮކިއުމަންޓްތަކަކީ ކްލެސިފައިޑް ނޫން ޑޮކިއުމަންޓްތަކެއްގެ ގޮތަށް ބަދަލުކޮށްފައިވާ ލިޔުންތަކެއްކަމަށް ވިދާޅުވެފައެވެ.

ފްލޮރިޑާގެ ކޯޓަށް ހޯމަ ދުވަހު ޓްރަމްޕްގެ ފަރާތްޕުޅުން ހުށައެޅި 27 ސަފުހާގެ ޑޮކިއުމަންޓްގައި ވަނީ، ޖަސްޓިސް ޑިޕާޓްމަންޓުން އެކުރާކަމަކީ ޓްރަމްޕް އަލުން ރައީސްކަމަށް ކުރިމަތިލެއްވުން ހުއްޓުވާލެވޭނެ ސަބަބެއް ހޯދުންކަމަށް ތުހުމަތުކޮށްފައެވެ.