ޕެސްޓަށް ކުރާ ދައުވާގެ އަޑުއެހުން ކެންސަލް
ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދު
ޕެސްޓް ހިމެނޭހެން ފަސް މީހެއްގެ މައްޗަށް ދައުވާ ކުރުމަށް ޕީޖީން ހުށައެޅި
މަސްތުވާތަކެތީގެ މައްސަލައަކާއި ގުޅިގެން ހައްޔަރުކުރި މަޝްހޫރު ރެޕް ލަވަކިޔުންތެރިޔާ ޏ. ފުވައްމުލައް-ދިގުވާނޑު، ނައި، އިސްމާއިލް އިފްހާމް މުހައްމަދު (ޕެސްޓު) ގެ މައްޗަށް ކުރާ ދައުވާގެ އަޑުއެހުން ކެންސަލްވެއްޖެއެވެ.
މި އަޑުއެހުން ތާވަލު ކޮށްފައި އޮތީ ބުރާސްފަތި ދުވަހުގެ ހެނދުނު 09:00 އަށެވެ. އަޑުއެހުން ކެންސަލްވެފައިވަނީ މި މައްސަލައިގެ ދިފާއީ ވަކީލު އެހެން އަޑުއެހުމުގައި އިންނެވުމުގެ ސަބަބުން ޝަރީއަތް ނުފެށި ގިނަ އިރުތަކެއް ވެގެންދާތީއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ.
މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 4 އޯގަސްޓު 2022 ގައެވެ. އެ ދުވަހު އޮތީ ޝަރީއަތުގެ ކުރީގެ ހުށައެޅުންތަކަށް ގޮތެއް ނިންމުމެވެ. އެ ދުވަހު ވަނީ ޕެސްޓުގެ ބޭންކް ސްޓޭޓްމަންޓު ހެކީގެ ގޮތުގައި ޝަރީއަތަށް ބަލައިނުގަތުމަށް ނިންމަވާފައެވެ.
ދައުލަތުން ވަނީ ޖިނާއީ އިޖުރާއަތުގެ ޤާނޫނުގެ 72 ވަނަ މާއްދާގެ (ބ) ގެ ދަށުން ކުރަންޖެހޭ ކަންކަމުގައި ކޯޓު އަމުރެއް ހޯދާކަށް ނުޖެހޭނެ ކަމަށް ފާހަގަކޮށްފައެވެ. އެކަން ކުރީގެ ރައީސް އަބްދުﷲ ޔާމީނުގެ މައްސަލައިގައި ސުޕްރީމް ކޯޓުން ކުރި ޙުކުމުގައި ބަޔާންކޮށްފައިވާކަމަށް ދައުލަތުން ފާހަގަ ކުރެއެވެ.
އެހެންނަމަވެސް، ދިވެހި ފުލުހުންގެ ޚިދުމަތުގެ ފަރާތުން އެ ސްޓޭޓްމަންޓު ހޯދުމަށް ފޮނުވި ސިޓީގައި އެއީ ޖިނާއީ އިޖުރާއަތުގެ ޤާނޫނުގެ 72 ވަނަ މާއްދާގެ (ބ) އާއި ހަވާލާދީ ކަމެއް ފާހަގަކޮށްފައި ނުވާކަން މައްސަލަ ބެއްލެވި ގާޒީ ވަނީ ފާހަގަކުރައްވާފައެވެެ. އެހެންކަމުން ދައުލަތުން ބުނާ ބުނުމާއި، ސިޓީގައި ހުރި ކަންކަން ދިމާނުވާކަމަށް ވެސް ގާޒީ ވަނީ ވިދާޅުވެފައެވެ. އެކަންކަމަށް ރިއާޔަތްކުރެއްވުމަށް ފަހު ގާޒީ ވަނީ އޭނާގެ އެކައުންޓް ސްޓޭޓްމަންޓް ޝަރީއަތަށް ބަލައިނުގަތުމަށް ނިންމަވާފައެވެ.
އެހެންނަމަވެސް ހައިކޯޓުން ވަނީ ކްރިމިނަލް ކޯޓުގެ އެ ނިންމުމަކީ ބާތިލް ނިންމުމެއް ކަމަށް ކަނޑައަޅާ ކިތާބީ ހެއްގެ ގޮތުގައި ދައުލަތުން ހުށަހެޅި ހެކިތަކަކީ، (ބޭންކް ސްޓޭޓްމެންޓްތަކަކީ) ގާނޫނާއި އެއްގޮތަށް ހޯދާފައިވާ ތަކެތި ކަމަށް ކަނޑައަޅާފައެވެ. އަދި އެ ހެކިތައް ޝަރީއަތަށް ބަލައިގަތުމަށް މައްސަލަ ބެއްލެވި ފަނޑިޔާރުންގެ އަޢުލަބިއްޔަތުން ވަނީ ޙުކުމްކޮށްފައެވެ.
ޕެސްޓް ހައްޔަރުކޮށްފައިވަނީ، ގިނައަދަދެއްގެ މަސްތުވާތަކެތި ރާއްޖެ އެތެރެކުރުމަށްފަހު އެތަކެތި ގެންގުޅެ، ބޭނުންކޮށް އަދި ވިޔަފާރި ކުރާކަމަށް ލިބުނު މައުލޫމާތަކާއި ގުޅިގެން ފުލުހުން ހިންގި އޮޕަރޭޝަނެއްގެ ތެރެއިން މިދިޔަ އަހަރުގެ ފެބްރުއަރީ މަހުގެ 13 ވަނަ ދުވަހުއެވެ. މި އޮޕަރޭޝަންގައި ޕެސްޓްގެ އިތުރުންވެސް އިތުރު ބަޔަކު ހައްޔަރުކޮށް ދައުވާ އުފުލާފައިވެއެވެ.
