ކޮރަޕްޝަނާއި ވައްކަން އަދި މަނީ ލޯންޑަރިންގގެ ކުށުގައި މެލޭޝިޔާގެ ކުރީގެ ބޮޑުވަޒީރު ނަޖީބު ރައްޒާގުގެ މައްޗަށް ކޮށްފައިވާ 12 އަހަރުގެ ޖަލު ހުކުމް އެގައުމުގެ އެންމެ މަތީ ކޯޓު ކަމަށްވާ ފެޑަރަލް ކޯޓުން ދަމަހައްޓައިފިއެވެ. މިއާއެކު، އުމުރުފުޅުން 69 އަހަރުގެ ނަޖީބު ރައްޒާގު ހިމެނިވަޑައިގަންނަވާނީ މެލޭޝިޔާގައި ޖަލު ހުކުމެއް ފުރިހަމަކުރައްވަން ޖެހިވަޑައިގަންނަވާނެ ފުރަތަމަ ބޮޑުވަޒީރަށެވެ. އަދި ކުރެވުނު 46 މިލިއަންޑޮލަރުގެ ޖޫރިމަނާވެސް ދައްކަވަން ޖެހިވަޑައިގަންނަވާނެއެވެ.

ކޮރަޕްޝަނާއި މަނީ ލޯންޑަރިންގ އަދި މަގާމުގެ ނުފޫޒު ނަހަމަގޮތުގައި ބޭނުންކުރެއްވިކަމުގެ ކުށުގައި ނަޖީބު ރައްޒާގުގެ މައްޗަށް ކުރެވުނު ދައުވާގައި ކުށް ސާބިތުވެ، ތިރީކޯޓަކުން ހުކުމްކޮށްފައި ވަނީ 2020 ވަނަ އަހަރުގެ ޖުލައި މަހުއެވެ. ނަމަވެސް 2018 ވަނަ އަހަރުން ފެށިގެން އޭނާ ހުންނެވީ ޝަރީއަތް ނިމެންދެން ކަފާލާތުގެ ދަށުން މިނިވަންކޮށްފައެވެ.

މައިގަޑު ދައުވާއަކީ ފައިސާގެ ބޮޑެތި މުއާމަލާތުތަކެއް ނަހަމަގޮތުގައި ހިންގެވުމެވެ. މިގޮތުން ފާހަގަކުރެވޭ އެންމެ ބޮޑު ކުށަކީ 42 މިލިއަން ރިންގިޓް (10 މިލިއަން ޑޮލަރު) ވަން އެމް.ޑީ.ބީ ކިޔާ މުހިންމު ސްޓޭޓް ފަންޑަކުން އަމިއްލަފުޅު ބޭންކް އެކައުންޓަކަށް ޖަމާ ކުރެއްވުމެވެ. އަދި އިތުރު 6 ދައުވާއެއްގެ ތެރެއިން 42 ދައުވާއެއްގެ ތަހުގީގު ދަނީ ކުރެވެމުންނެވެ.

ޕްރޮސެކިއުޓަރުން ބުނާގޮތުން، ވަން އެމް.ޑީ.ބީން ނަޖީބު ވަނީ ޖުމްލަ 4.5 ބިލިއަން ޑޮލަރު ވަގަށްނަންގަވާފައެވެ. އަދި ތަހުގީގީ ފަރާތްތަކުން ވަނީ މިހާރުވެސް އެއްބިލިއަން ޑޮލަރު, ނަޖީބާ ގުޅުންހުރި އެކި އެކައުންޓްތަކަށް ޖަމާކުރިކަން ހޯދިފައިވާކަމަށް ބުނެފައެވެ.

2018 ވަނަ އަހަރުން ފެށިގެން ނަޖީބު ރައްޒާގާއި އޭނާގެ އަރިސް ބޭފުޅުން ގުޅިގެން ފައިސާއަށް ބޮޑެތި އަދަދު ތަކުން ޚިޔާނާތްތެރިވަމުން ދާކަމުގެ އަޑުތައް އައީ ފެތުރެމުންނެވެ.

ނަޖީބު ގެންދަވަނީ އޭނާއަށް އަދަބު ދެވެމުން ދަނީ ސިޔާސީގޮތުން ކަމަށް ވިދާޅުވަމުންނެވެ. ނަމަވެސް ވެރިކަމުގައި އޮތީ ނަޖީބު ނިސްބަތްވެވަޑައިގަންނަވާ ޕާޓީކަމުން، އެއީ މާ ހަމަޖެހޭ ވާހަކަފުޅަކަށް ނުވެއެވެ.

ފެޑަރަލް ކޯޓުގެ ނިންމެވުމާއެކު ނަޖީބު 12 އަހަރުގެ ޖަލު ހުކުމް ތަންފީޒުކުރައްވަން ޖެހިވަޑައިގަންނަވާނެއެވެ.

ފަހު ވަގުތުވެސް ހުކުމް ފަސްކުރެއްވޭތޯ ނަޖީބު ބެއްލެވިއެވެ. މިގޮތުން ފެޑަރަލް ކޯޓުގެ އެންމެ ފަހުގެ ނިންމުން އިއުލާންކުރުމުގެ ކުރިން، ދެމަސް ދުވަހަށް ފައިނަލް ވަރޑިކްޓް ފަސް ކުރުމަށާއި އަދި އިސް ފަޑިޔާރު ބަދަލު ކުރެއްވޭތޯ ނަޖީބު ރައްޒާގު ބެއްލެވިއެވެ. މިގޮތުން އިސްފަޑިޔާރުގެ ފިރިކަލުންނަކީ އޭނާއާ ދެކޮޅަށް ސޯޝަލް މީޑިޔާގައި ފާޑުފާޑު އެއްޗެތި ލިއުއްވާ ބޭފުޅެއް ކަމަށާއި، އެހެންކަމުން ގޮތް ނިންމަވާއިރު ފިރިކަލުންގެ ނުފޫޒު އިސް ފަޑިޔާރުގެ މައްޗަށް ފޯރާފައި އޮވެދާނެކަމަށް ވިދާޅުވިއެވެ. އަދި ނަޖީބުގެ ފަރާތްޕުޅުން އަލަށް އައްޔަން ކުރެވުނު ވަކީލުން މައްސަލައިގެ ތެރެޔަށް ވަނުމަށް އަދި ދެ މަސްދުވަސް ދެއްވުމަށްވެސް އެދި ވަޑައިގެންފައިވެއެވެ.

ނަމަވެސް ފެޑަރަލް ކޯޓުގެ އިސް ފަޑިޔާރު ވަނީ، މިއީ ވަރަށް ސާފުކޮށް ފެންނަން އޮތް، ކޮރަޕްޝަނާއި ވައްކަމުގެ މައްސަލައެއް ކަމަށާއި، ހައިކޯޓުގެ ހުކުމް ބަދަލުކުރަންޖެހޭ ސަބަބެއް ނެތްކަމުގައި ވިދާޅުވެފައެވެ.