ކެރަމް ވޯލްޑް ޗެމްޕިއަންޝިޕްގައި ވާދަކުރާނެ ރާއްޖޭގެ ޤައުމީ ޓީމު އެކުލަވާލައިފި

މިއަހަރު އޮންނަ ކެރަމް ވޯލްޑް ޗެމްޕިއަންޝިޕްގައި ވާދަކުރާނެ ރާއްޖޭގެ ޤައުމީ ކެރަމް ޓީމު އެކުލަވާލައިފިއެވެ.

މިމަހުގެ 18 އިން 21 އަށް ކުރިއަށް ދިޔަ ސެލެކްޝަންގައި ވަނީ ފިރިހެން ޓީމާއި އަންހެން ޓީމުގެ ކުޅުންތެރިން ހޮވާފައެވެ. ކޮންމެ ޓީމެއްގައި ވެސް ހިމެނެނީ ފަސް ކުޅުންތެރިންނެވެ.

ޤައުމީ ފިރިހެން ޓީމަށް ހޮވުނު ކުޅުންތެރިންނަކީ ރޭންކު އެކެއްގައި ހޮވުނު އާދަމް އަދީލް, ރޭންކް ދޭއްގައި ހޮވުނު މުޙައްމަދު މުންތަސިރު، ރޭންކް ތިނެއްގައި ހޮވުނު އެންމެ ފަހުގެ ޤައުމީ ޗެމްޕިއަން އިސްމާއިލް އަޒްމީން، ރޭންކް ހަތަރެއްގައި ހޮވުނު އިބްރާހިމް ހުޖާންގެ އިތުރުން ރޭންކް ފަހެއްގައި ހޮވުނު ޔަމާން އަބްދުލް ޖަލީލްއެވެ. މިއީ ޔަމާން ކެރަމް ސީނިއަރ ޤައުމީ ޓީމަށް ހޮވުނު ފުރަތަމަ ފަހަރެވެ.

އަންހެން ޓީމު ވެސް އެކުލަވާލާފައި ވަނީ ރޭންކް އުސޫލުންނެވެ. ސެލެކްޝަނުން އަންހެން ޓީމަށް ހޮވުނު ކުޅުންތެރިންނަކީ އެންމެ ފަހުގެ ޤައުމީ ޗެމްޕިއަން އާމިނަތު ވިދާދު، އައިޝަތު ފައިނާޒް، އައިޝަތު ނަހުފާ (މިއީ ނަހުފާ ސީނިއަރ ޤައުމީ ޓީމަށް ހޮވުނު ފުރަތަމަ ފަހަރު)، އާމިނަތު ވިޝާމާގެ އިތުރުން ފާތިމަތު ރަޔާނާއެވެ.

މުބާރާތަށް ޓީމު ސެލެކްޓުކޮށްފައިވާއިރު، މިއަހަރުގެ މުބާރާތް ކުރިއަށް ދާނީ އޮކްޓޫބަރު މަހުގެ ތިން ވަނަ ދުވަހުން ހަތް ވަނަ ދުވަހުގެ ނިޔަލަށް މެލޭޝިއާގައެވެ. މުބާރާތުގެ ކުރިން ޓީމު މެލޭޝިއާގައި ޓްރެއިނިން ކޭމްޕެއް ކުރިއަށް ގެންދާނެއެވެ. އެ ކޭމްޕަށް ޓީމު ފުރާނީ އަންނަ ސެޕްޓެމްބަރު މަހުގެ 15 ވަނަ ދުވަހުއެވެ.