އަލަމްގިރް، ނާޒިމް، ނަޝީދު އަދި ޑީއީޑީ ފުލުހަށް ދައުވާ އުފުލައިފި
04 މީހެއްގެ މައްޗަށް ދައުވާ އުފުލާފައިވޭ
ބަދު އަހުލާގީ އަމަލު ހިންގި މައްސަލައިގައި ލީކުވި ވީޑީއޯގައި ފެންނަ ކޮޓަރިި
ގިނަ އަދަދެއްގެ ދިވެހިންގެ ބަޔަކާ އެކު އެއްޖިންސުން ގުޅުން ހިންގިކަމަށް އިއުތިރާފުވެފައިވާ ބަންގްލަދޭޝްގެ ރައްޔިތެއްކަމަށްވާ އަލަމްގީރު އާއިއެކު ބަދު އަހުލާގީ އަމަލު ހިންގި މައްސަލައިގައި ޕްރޮސެކިއުޓަރ ޖެނެރަލް ދައުވާ އުފުލައިފިއެވެ.
ޕީޖީ އޮފީހުން ހޯމަ ދުވަހު ބުނީ، ބަނގްލަދޭޝް ރައްޔިތަކާއި، އިތުރު ބަޔަކު ބަދު އަހުލާގީ އަމަލު ހިންގިކަމަށް ތުހުމަތުކުރެވުނު މައްސަލައިގައި 04 (ހަތަރެއް) މީހެއްގެ މައްޗަށް ދައުވާ އުފުލާފައިވާ ކަމަށެވެ.
އެމީހުންގެ މައްޗަށް އުފުލާފައިވަނީ އެއްޖިންސުން ޖިންސީ ގުޅުން ހިންގުމުގެ ކުށުގެ ދަޢުވާއެވެ. އެ ދައުވާ 18 އޮގަސްޓު 2022 ދުވަހު ކްރިމިނަލް ކޯޓަށް ހުށައަޅާފައިވާ ކަމަށް ޕީޖީ އޮފީހުން މައުލޫމާތު ދެއެވެ.
މާލޭގެ އެޕާޓްމެންޓެއްގައި އަލަމްގީރު ތަފާތު އެކި މީހުންނާއެކު ބަދު އަހުލާގީ އަމަލު ހިންގާ މަންޒަރު ފެންނަ ވީޑިއޯތަކެއް މީސްމީޑިއާގައި ވަނީ ދައުރުވާން ފަށާފައެވެ. އެ ވީޑިއޯތައް ބޭނުންކޮށްގެން ބްލެކްމެއިލް ކުރަމުންދާ މައްސަލައެއް މިދިޔަ މަރޗް މަހު ފުލުހުންގެ ސަމާލުކަމަށް އައިސްފައިވާކަމަށް ފުލުހުން ވަނީ ބުނެފައެވެ. މި މައްސަލަތަކާއި ގުޅިގެން އަލަމްގީރު ހައްޔަރުކޮށްފައިވަނީ މިދިޔަ ޖުލައި މަހުގެ 12 ވަނަ ދުވަހުއެވެ.
މިމައްސަލައިގައި އެންމެ ފުރަތަމަ ދައުރުވާން ފެށި ވީޑިއޯތަކުގައި ފެންނަ މީހުން ހައްޔަރުކޮށް ބައެއް މީހުންގެ ޕާސްޕޯޓް ވަނީ މީގެކުރިން ހިފަހައްޓާފައެވެ. އެގޮތުން ރައްޔިތުންގެ މަޖިލީހުގެ ނޮޅިވަރަމް ދާއިރާގެ ކުރީގެ މެމްބަރު މުހައްމަދު ނަޝީދު (ކާނަލް) އާއި ކުރީގެ ރައީސް މުހައްމަދު ނަޝީދުގެ ކޮއްކޮ، ގާނޫނީ ވަކީލު ނާޒިމް ސައްތާރު، އަދި ޑްރަގް އެންޑް އެންފޯސްމަންޓް (ޑީއީޑީ)ގައި މަސައްކަތްކުރާ ފުލުހެއްކަމަށްވާ އަބްދުއްރަހުމާނު ރަފީއު ހައްޔަރުކުރިއެވެ. އޭގެ ފަހުންވެސް ގިނަ ބައެއްގެ މައްޗަށް ތަހުގީގު ފަށައި ޕާސްޕޯޓު ހިފަހައްޓާފައިވެއެވެ.
މި މައްސަލައިގައި ދައުވާ އުފުލާފައިވަނީވެސް އަލަމްގިރުގެ އިތުރުން އެ 3 މީހުންގެ މައްޗަށެވެ.
މި މައްސަލައާ ގުޅިގެން ބައެއް ވުޒާރާތަކާއި، ތައުލީމި ދާއިރާ އަދި އެމްއެންޑީއެފް އާއި ފުލުހުންގެ އިދާރާ ފަދަ ޔުނިފޯމް އެޅި މުއައްސަސާތަކުގެ މީހުން ވެސް ވަނީ ސަސްޕެންޑްކޮށްފައެވެ.
މި މައްސަލައިގައި ހިމެނޭ މީހުން ހައްޔަރުކުރުން ލަސްވެގެން ފުލުހުންނަށް އާންމު ރައްޔިތުންގެ ފާޑުކިޔުން ވަނީ އަމާޒުވެފައެވެ. މިކަމާ ގުޅިގެން ފުލުހުން ބުނެފައިވަނީ، ލީކްވި ވީޑިއޯތަކުގައި ފެންނަކަމަށް ތުހުމަތުކުރެވޭ މީހުން ހައްޔަރުކުރުމަށް ވަގުތު ނެގީ ބައެއް ފަރާތްތަކުން އެޑިޓްކޮށްގެން ފޮޓޯތައް ދައުރު ކުރަމުން ގޮސްފައިވާތީ، އިތުރަށް ބަލަންޖެހޭ ކަންކަން ހުރުމުންކަމަށެވެ.
