ވެނުއާޓޫގެ ރައީސް ބޯލްޑްވިން ލޮންސްޑޭލް އަވަހާރަވެއްޖެ

ދެކުނު ޕެސިފެކް އޯޝަންގައި އޮންނަ ޖަޒީރާ ގައުމެއް ކަމަށްވާ ވެނުއާޓޫގެ ރައީސް ބޯލްޑްވިން ލޮންސްޑޭލް ހާޓް އެޓޭކް ޖެހުމުގެ ސަބަބުން އަަވަހާރަވެއްޖެއެވެ.

2014 ވަަނަ އަހަރުން ފެށިގެން ވެރިކަން ކުރައްވަމުން ގެންދެވާ ލޮންސްޑޭލް އަވަހާރަވެފައި ވަނީ ހޮނިހިރު ދުވަހުގެ މެންދަމު ކަަމަށް ރިޕޯޓުތައް ބުނެއެވެ. އެމަނިކުފާނު އަވަހާރަވެފައި ވަނީ ވެރިރަށް ޕޯޓް ވިލާގައެވެ.

ވެނުއާޓޫގެ ރައީސް އަވަހާރަވުމާ ގުޅިގެން އޮސްޓްރޭލިޔާގެ ގަވަނާ-ޖެނެރަލް ޕީޓާ ކޮސްގްރޯވް ވިދާޅުވީ ރައީސް ބޯލްޑްވިން ލޮންސްޑޭލް އަކީ ވެނުއާޓޫގެ ރައްޔަތުންނަށް ގަދަރުވެރިކަމާއި އަދި އަދަބުވެރިކަމާއެކު ޚިދުމަތް ކުރެއްވި ރައްޔިތުންގެ ލޯބި ލިބިވަޑައިގެން ހުންނެވި ބޭފުޅެއް ކަމަށެވެ.

2015 ވަނަ އަހަރު މާޗް މަހު ވެނުއާޓޫއަށް ނަގޫރޯޅި "ޕެމް" އަރާ 75،000 މީހުންގެ ގެދޮރު ގެއްލުވާލި ހާދިސާއަށް ފަހު އަސަރު ކުރި ސަރަހައްދުތައް އާރާސްތު ކުރުމުގެ ކަންކަން ވިލަރެސް ކުރެއްވީ ރައީސް ލޮންސްޑޭލްއެވެ.

މީގެ އިތުރުން ރައީސް ލޮންސްޑޭލްގެ ނައިބު ހިމެނޭ ކޮރަޕްޝަންގެ މައްސަލައެއް 2015 ގައި ފެންމަތިވެ، ގައުމު ކޮރަޕްޝަނުން ސަލާމަތް ކުރުމަށް ވައުދުވެވަޑައިގެންނެވިއެވެ.