ސޫދާންގެ ޚައްތޫމް އެއާޕޯޓުން ފުރައިގެން އިތިއޯޕިއާގެ އަޑިސް އަބާބާ އަށް ދަތުރު ކުރި އިތިއޯޕިއަން އެއާލައިންސްގެ މަތިންދާ ބޯޓެއްގައި ތިބި ދެ ޕައިލެޓުންވެސް ނިދާފަ ތިބުމުގެ ސަބަބުން ޖައްސަން އޮތް ގަޑިއަށް ބޯޓު ނުޖެއްސި މައްސަލަތަކެއް ކުރިމަތިވެއްޖެއެވެ.
އޭވިއޭޝަން އާއި ބެހޭ ޚަބަރުތައް ގެނެސް ދޭ ޕަބްލިކޭޝަނަކާއި ހަވާލާދީ ބޭރުގެ ބައެއް ޚަބަރު ޗެނެލްތަކުން ބުނެފައިވާ ގޮތުގައި ބޯޓު ޖައްސަން އޮތް ގަޑިއަށް ނުޖައްސާ ރަންވޭ ދޫކޮށް ދިއުމުން އެއަރ ޓްރެފިކް ކޮންޓްރޯލް އިން ޕައިލެޓުންނާއި ގުޅަން މަސައްކަތް ކޮށްފައިވެއެވެ. އަދި ޕައިލެޓުންނަށް ހޭލެވި ދެވަނަ ބުރަކަށް ގޮސް ބޯޓު ސަލާމަތުން ޖައްސާފައިވާ ކަމަށް އެވިއޭޝަން ހެރަލްޑް އާއި ހަވާލާދީ ލިބޭ ޚަބަރުތައް ބުނެއެވެ.
މައްސަލަ ދިމާވި އިތިއޯޕިއަން އެއާލައިންސްގެ ބޯޓުގެ ކްރޫ ތަހުގީގެއް ނިމެންދެން ސަސަޕެންޑްކޮށްފައިވާ ކަމަށް އިތިއޯޕިއާ ސްޓޭޓް ނިއުސް އައުޓްލެޓް އިން ބުނެފައިވާ ކަމަށް ޚަބަރު ލިބެއެވެ. މިކަން އިތިއޯޕިއަން އެއާލައިންސްއިން ވެސް ވަނީ ކަށަވަރު ކޮށްދީފައެވެ. އަދި ތަހުގީގަށް ބިނާކޮށް މިކަމަށް އެކަށީގެންވާ ފިޔަވަޅުވެސް އަޅާނެ ކަމަށް އެފަރާތުން ބުނެފައިވެއެވެ.
