އިތިއޯޕިއާގެ ސިޔާސީ ކުށްވެރިންނަށް މައާފްދީ އެ ކުށްވެރިން ތިބި ޖަލު ބަންދުކުރަނީ

އިތިއޯޕިއާގެ ސިޔާސީ ކުށްވެރިން، މިނިވަންކޮށް ވެރިރަށް އެޑީސް އަބާބާގައި ހުންނަ ޖަލު ބަންދުކުރުމަށް ނިންމައިފި ކަމަށް އެގައުމުގެ ސަރުކާރުން ބުނެފިއެވެ.

އިތިއޯޕިއާގެ ސަރުކާރުން ބުނީ އެ ފިޔަވަޅަކީ ރިކޮންސިލިއޭޝަނަށް ދިއުމަށް ހިތްވަރު ދިނުމަށް އެޅި ފިޔަވަޅެއް ކަމަށެވެ.

ސިޔާސީ ފަރާތްތަކުގެ މައްޗަށް އުފުލާފައިވާ ދައުވާ އަނބުރާ ގެންގޮސް ޖަލަށްލާފައިވާ ސިޔާސީ ގައިދީންނަށް މައާފްދޭން ނިންމާފައިވާ ކަމަށް އިތިއޯޕިއާގެ ބޮޑުވަޒީރުގެ އޮފީހުން ބުނެފައިވާ ކަމަށް އެޑީސް ސްޓޭންޑަޑް މެގަޒިންގައި ވެއެވެ.

"މިހާރު ދައުވާ އުފުލިފައިވާ ސިޔާސީ ފަރާތްތަކާއި އަދި ކުރިން ހުކުމް އިއްވިފައިވާ ފަރާތްތަކުގެ ދައުވާ ބާތިލްކުރުން ނުވަތަ މައާފް ދިނުމަށް ވަނީ ނިންމާފައި،" ހައިލިމަރިއަމް ދެސަލަން ބުދަ ދުވަހު ވިދާޅުވި ކަމަށް އޭއެފްޕީގައި ރިޕޯޓްކޮށްފައިވެއެވެ.

ބޮޑުވަޒީރު ދެސަލަން މިކަން އިއުލާނުކުރައްވާފައި ވަނީ ވެރިކަން ކުރާ ކޯލިޝަން، އިތިއޯޕިއަން ޕީޕްލްސް ރިވޮލިއުޝަނަރީ ޑެމޮކްރެޓިކް ފްރޮންޓްގެ އިތުރު މެމްބަރުންނާ އެކު ހުންނަވައެވެ.

ސަރުކާރުން ވަނީ އެގަމުގައި އަނިޔާވެރި ލާއިންސާނީ އަމަލުތައް ހިންގާ ކަމަށް އެންމެ މަޝްހޫރު، މައިކަލާވީ ޑިޓެންޝަން ސެންޓަރު ވެސް ބަންދުކުރަން ނިންމާފައިވާކަން އިއުލާނުކޮށްފައެވެ.

ޑިޓެންޝަން ސެންޓަރު ބަދަލުކުރަން ނިންމާފައި ވަނީ ޒަމާނީ ދާރުލް އާސާރަކަށް ކަމަށް ސަރުކާރުން ބުނި ކަމަށް މީޑީއާ އިން ބުނެއެވެ.