އިތިއޯޕިއާގެ ބޮޑު ވަޒީރު މަގާމުން އިސްތިއުފާދެއްވިތާ އެއް ދުވަސް ނުވަނީސް އެ ގައުމުގައި ކުއްލި ނުރައްކަލުގެ ހާލަތު އިއުލާނުކޮށްފިއެވެ.
ހުކުރު ދުވަހުގެ ވަގުތެއްގައި އެ ގައުމުގައި ކުއްލި ނުރައްކަލުގެ ހާލަތު އިއުލާނުކުރީ އެ ގައުމުގެ ވަޒީރުންގެ މަޖިލީހުންނެވެ. ކުއްލި ނުރައްކަލުގެ ހާލަތު އިއުލާނުކުރެވުނު މުއްދަތާއި ސަރަހައްދު ކަށަވަރުނުވާ ކަމަށް އެ ގައުމުގެ މީޑިއާތަކުން ވަނީ ރިޕޯޓުކޮށްފައެވެ. ވަޒީރުންގެ މަޖިލީހާ ގާތް ގުޅުމެއް އޮންނަ ފަރާތަކާ ހަވާލާދީ އެ ގައުމުގެ މީޑިއާތަކުން ބުނެފައި ވަނީ ކުއްލި ނުރައްކަލުގެ ހާލަތު ތިން މަސް ދުވަހާއި ހަ މަސް ދުވަހުގެ މުހުލަތަކަށް ދެމެހެއްޓުމުގެ ވިސްނުމެއް އެ މަޖިލީހުން ގެންގުޅެމުންދާ ކަމަށެވެ. ވަޒީރުންގެ މަޖިލީހުން ބުނެފައި ވަނީ އެ ގައުމުގައި މިހާލަތު އިއުލާނުކުރަން ޖެހުނީ ގާނޫނު އަސާސީ ހިމާޔަތް ކުރުމުގެ ގޮތުން ކަމަށެވެ.
އެ ގައުމުގެ އިދިކޮޅު ޕާޓީއެއް ކަމަށްވާ އޮރޯމޯ ފެޑެރަލިސްޓް ކޮންގްރެސްގެ ޑެޕިއުޓީ ސެކްރެޓަރީ ޖެނެރަލް މިކަމާ ގުޅިގެން ވިދާޅުވެފައި ވަނީ އިތިއޯޕިއާއަށް މުޅިން އާ ސަރުކާރެއް ބޭނުންވާ ކަމަށާއި ރައްޔިތުންގެ ހައްގުތަކަށް އަރައިގަނެ ރައްޔިތުން މަރާ ސަރުކާރަކަށް ފުރުސަތު ނުދޭނެ ކަމަށެވެ.
އެ ގައުމުގެ ބޮޑުވަޒީރު އިސްތިއުފާދެއްވާފައި ވަނީ ސަރުކާރާ ދެކޮޅަށް ބޮޑެތި ފާޑުކިޔުންތަކެއް އަމާޒުވެފައިވާ ދަނޑިވަޅެއްގައެވެ. ސިޔާސީ ލީޑަރުން ހައްޔަރުކޮށް ޖަލަށް ލުމުގެ ސަބަބުން ބޮޑެތި ފިއްތުންތަކެއް އެ ގައުމުގެ ސަރުކާރަށް ކުރިމަތިވަމުންދިޔުމާ އެކު މި އަހަރުގެ ޖެނުއަރީ މަހުގެ ފަހުން މިހާތަނަށް 6،000 ސިޔާސީ ހައްޔަރީން ވަނީ ދޫކޮށްލާފައެވެ.
ބޮޑުވަޒީރުގެ އިސްތިއުފާއާ އެކު އެ ގައުމުގެ އެކި ސަރަހައްދުތަކުގައި ސިޔާސީ ހައްޔަރީން ދޫކޮށްލުމަށް ގޮވާލާ ގިނަ އަދަދެއްގެ މީހުން ދަނީ ސަރުކާރާ ދެކޮޅަށް އަޑުއުފުލާ މުޒާހަރާ ކުރަމުންނެވެ.
