ސަސްޕެންޑުކޮށްފައިވާ އޯލް އިންޑިއަން ފުޓުބޯޅަ ފެޑެރޭޝަން (އޭއައިއެފްއެފް)ގެ ރައީސްކަމަށް އެ ގައުމުގެ ފުޓުބޯޅަ ލެޖެންޑް ބައިޗުން ބުޓިއާ ވާދަކުރަން ނިންމައިފިއެވެ.

މިކަން ހާމަކޮށްފައިވަނީ އެ ގައުމުގެ ނޫސްތަކުގައެވެ. ބުޓިއާއާ ހަވާލާދީ އެ ގައުމުގެ ނޫހެއްގައި ބުނެފައިވަނީ، އެ މަގާމަށް ވާދަކުރަން އޭނާ ނިންމީ އިހްތިރާމް ލިބިފައިވާ މަޝްހޫރު ފުޓުބޯޅަ ކުޅުންތެރިންގެ އެދުމުގެ މަތިން ކަމަށެވެ. އޭނާ ބުނީ ސުޕްރީމް ކޯޓުން ނިންމާފައިވާ ނިންމުމުން އަރައިގަނެ، ހައްލެއް ހޯދައި އިންޑިއާގެ ކުޅުންތެރިންނަށް އެ ގައުމުގެ ފުޓުބޯޅައަށް ޚިދުމަތްކުރުމުގެ ފުރުސަތު ލިބޭނެކަމަށް އުންމީދުކުރާ ކަމަށެވެ. މީގެ އިތުރުން އޭނާ ބުނީ އިންޑިއާ ރަނގަޅީ ކުޅުންތެރިންގެ ގޮތުން އެކަނި ނޫންކަން ސާބިތުކޮށްދޭން ބޭނުންވާކަމަށެވެ. އޭގެ އިތުރުން އިދާރީ ހިންގުމުގެގޮތުން ވެސް އިންޑިއާއަކީ ރަނގަޅު ގައުމެއްކަން ދައްކައިދޭން ބޭނުންވާކަމަށެވެ.

ބުޓިއާއަކީ 1995 ވަނަ އަހަރުން ފެށިގެން 2011 ވަނަ އަހަރާ ހަަމައަށް އިންޑިއާގެ ގައުމީ ޓީމަށް ކުޅެފައިވާ، އެ ގައުމުގެ ލެޖެންޑެކެވެ. އިންޑިއާއާއެކު އޭނާ ވަނީ އޭއެފްސީ ޗެލެންޖް ކަޕް އެއްފަހަރު، ސާފް ޗެމްޕިއަންޝިޕް ތިންފަހަރު، ނެހްރޫ ކަޕް ދެފަހަރު ކާމިޔާބުކޮށްފައެވެ. މީގެ އިތުރުން ސައުތު އޭޝިއަން ގޭމްސްގައި ރަން މެޑަލްވެސް ހޯދާފައިވެއެވެ.

އެ ގައުމުގެ ފުޓުބޯޅަ ފެޑެރޭޝަންގެ ރައީސްކަމަށް ވާދަކުރުމުގެ މުއްދަތު ވަނީ ހުކުރު ދުވަހު ހަމަވެއެވެ. މި މުއްދަތުގެ ތެރޭގައި އެކި ފަރާތްތަކުން އެ މަގާމަށް ކުރިމަތިލާފައިވާކަމަށް އެ ނޫހުގައި ބުނެފައިވެއެވެ. އޭގެ ތެރޭގައި ކުރީގެ މަޝްހޫރު ގޯލް ކީޕަރު ކަލްޔަން ޗައުބޭވެސް ހިމެނެއެވެ.

ތިން ވަނަ ފަރާތެއްގެ ނުފޫޒު ފޯރާފައިވާކަމަށް ބުނެ ދުނިޔޭގެ ފުޓުބޯޅައިގެ މައި އިދާރާ (ފީފާ)އިން ވަނީ އިންޑިއާގެ ފުޓުބޯޅަ ފެޑެރޭޝަން ސަސްޕެންޑުކޮށްފައެވެ. އެއީ އެ ފެޑެރޭޝަންގެ ރައީސްކަމުގެ މަގާމުގައި ހުރި ޕްރަފުލް ޕަޓޭލް މަގާމު ދުރުކުރުމަށް އެ ގައުމުގެ ސުޕްރީމް ކޯޓުން ނިންމާފައި ވަނިކޮށެވެ. އެއަށްފަހު އެ ގައުމުގެ ސުޕްރީމް ކޯޓުން ވަނީ އެ އިދާރާގެ ހިންގުން އެޑްމިނިސްޓްރޭޓިވް ކޮމެޓީއަކާ ހަވާލުކޮށްފައެވެ. އެ ކޮމެޓީވެސް އެކުލަވާލީ ސުޕްރީމް ކޯޓުންނެވެ. ފީފާގެ އުސޫލު ބުނާގޮތުން، ފީފާގެ މެމްބަރު ފެޑެރޭޝަންތައް ވާންޖެހޭނީ ސިޔާސީ އަދި ގާނޫނީ ނުފޫޒުން އެއްކިބާވެފައިވާ ތަންތަނަށެވެ.

އޭއިއެފްއެފްގެ އިންތިޚާބު އަންނަ ސެޕްޓެމްބަރު މަހުގެ 15ގެ ކުރިން ބާއްވަން ޖެހެއެވެ. ފީފާއިންއިން ވަނީ އޭއައިއެފްއެފްއިން އެއްވެސް ފަރާތެއްގެ ނުފޫޒެއް ނެތި، އަމިއްލައަށް ހިންގަން ފެށުމާއެކު ސަސްޕެންޝަން އުވާލާނެކަމަށް ބުނެފައެވެ.

ފީފާގެ މި ސަސްޕެންޝަނުގެ ސަބަބުން، އަންނަ އޮކްޓޫބަރު މަހު އިންޑިއާގައި ބޭއްވުމަށް ހަމަޖެހިފައިވާ 17 އަހަރުން ދަށުގެ އަންހެން ވޯލްޑް ކަޕެއް ނުބޭއްވޭނެއެވެ. މީގެ އިތުރުން ބައިނަލްއަގުވާމީ މުބާރާތެއްގައި އިންޑިއާއަށް އަދި އެ ގައުމުގެ ކުލަބަކަށް ވެސް ބައިވެރިނުވެވޭނެއެވެ.