އިންޑިއާގެ ގައުމީ ކޯޗު ނެގި ގޮތާމެދު ހިތްހަމަނުޖެހި ބުޓިޔާ އިސްތިއުފާދީފި

އިންޑިއާގެ އައު ގައުމީ ކޯޗު އައްޔަންކުރި ގޮތާމެދު ހިތްހަމަނުޖެހިގެން ކުރީގެ ގައުމީ ކެޕްޓަން ބައިޗުން ބުޓިޔާ ޓެކްނިކަލް ކޮމިޓީން އިސްތިއުފާދީފި އެވެ.

ބުޓިޔާ ބުނީ އިންޑިއާގެ ފުޓްބޯޅަ ފެޑަރޭޝަނުގެ ރައީސް ކަލިއާން ޗައުބޭ ޓެކްނިކަލް ކޮމިޓީއަށް ގެނައީ އެންމެ ނަމެއް ކަމަށާއި ކޯޗު އައްޔަންކުރީ ޓެކްނިކަލް ކޮމިޓީގެ ލަފާ ނުހޯދައި ކަމަށެވެ. އޭނާ ބުނީ ޓެކްނިކަލް ކޮމިޓީއަކީ ކަންކަން ނިންމުމުގެ ކުރިން ވަރަށް ފުޅާކޮށް ބަހުސްކުރެވެންޖެހޭ ތަނެއް ކަމަށާއި ނަމަވެސް އިންޑިއާގެ ފުޓްބޯޅަ ފެޑަރޭޝަނުން ޓެކްނިކަލް ކޮމިޓީގެ ބޭނުން ކަނޑުވާލާއިފާ ކަމަށެވެ.

އޭނާ ބުނީ ސްޕޭނުގެ ކޯޗު މެނިއަލް މާކުއޭޒް ކޯޗަކަށް ހަމަޖެއްސީ އޭނާއާ ޓެކްނިކަލް ކޮމިޓީން އިންޓަވިއު ކުރުމެއް ވެސް ނެތި ކަމަށާއި ޗައުބޭ ގެންދަނީ ގަވާއިދާ ހިލާފަށް ވަރަށް ގިނަ ކަންކަން ކުރަމުން ކަމަށެވެ.

އިންޑިއާގެ ގައުމީ ކޯޗުކަން ހުސްވީ އެ މަގާމުގައި ހުރި ކްރޮއޭޝިޔާގެ ކުރީގެ ޑިފެންޑަރު ސްޓިމަކް މަގާމުން ވަކިކުރުމުންނެވެ. އޭނާ މަގާމުން ވަކި ކުރީ ނަތީޖާ ނުނެރެވެވުމާއި ފެޑަރޭޝަނާ އެކަށީގެންނުވާ ޑިމާންޑްތައް ކުރާތީ ކަމަށްބުނެ އެވެ. ނަމަވެސް މަގާމުން ވަކިކުރުމާއެކު އޭނާ ވަނީ މުސާރަ ނުދޭ ކަމަށް ބުނެ އިންޑިއާގެ ފުޓްބޯޅަ ފެޑަރޭޝަން ގޮވައިގެން ފީފާގައި މައްސަލަ ޖައްސާނެ ކަމަށް ބުނެފަ އެވެ.

އިންޑިއާގެ ފުޓްބޯލް ފެޑަރޭޝަން ހިނގާ ގޮތާމެދު ބުޓިޔާ އާއި އެނޫން ވެސް ކުރީގެ ލެޖެންޑުން ދަނީ ގިނަ ތުހުމަތުތަކެއް ކުރަމުންނެވެ.