އިންޑިޔާގެ ފުޓްބޯޅަ ރައީސަށް ކުރި ކޮރަޕްޝަންގެ ތުހުމަތު އޭއެފްސީން ބަލަނީ
ޗައުބޭ އަށް ތުހުމަތުކޮށް އިންޑިޔާގެ ބޮޑުވަޒީރަށް ސިޓީ ވަނީ ފޮނުވާފައި
އިންޑިޔާގެ ފުޓްބޯޅަ ފެޑަރޭޝަނުގެ ރައީސް ކަލްޔާން ޗައުބޭ (ވ) އާއި ފީފާގެ ރައީސް އިންފަންޓީނޯ
އިންޑިޔާގެ ފުޓްބޯޅަ ފެޑަރޭޝަނުގެ ރައީސް ކަލިއާން ޗައުބޭ އަށް ކޮށްފައިވާ ކޮރަޕްޝަނުގެ ތުހުމަތު އޭޝިއަން ފުޓްބޯޅަ ފެޑަރޭޝަން (އޭއެފްސީ)އިން ބަލަން ފަށައިފި އެވެ.
ޗައުބޭ އަށް މި ތުހުމަތުކޮށްފައިވަނީ އިންޑިޔާގެ ފުޓްބޯޅަ ފެޑަރޭޝަނުގެ ކުރީގެ ލީގަލް ހެޑް ނިރަންޖަން ބައްޓަޗަރްޖީ އެވެ. އޭނާ ވަނީ ރައީސް ޗައުބޭ ގަވާއިދުތަކާ ހިލާފަށް ޕްރޮޖެކްޓްތައް ޓެންޑާކޮށް ފެޑަރޭޝަނުގެ ފައިސާއަށް ހިޔާނާތްވަމުންދާ ކަމަށް ބުނެ އިންޑިޔާގެ ބޮޑު ވަޒީރު ނަރެންދުރަ މޯދީ އަށް ސިޓީއެއް ފޮނުވާފަ އެވެ. މި ވާހަކަ ނޫސްތަކުގައި ޝާއިއު ކުރުމުން އޭއެފްސީން ބައްޓަޗަރްޖީގެ ކިބައިން އެދިފައިވަނީ އެކަމުގެ ތަފްސީލް ދިނުމަށެވެ. މި މައްސަލަ ބަލަނީ އޭއެފްސީގެ އެތިކްސް ކޮމިޓީއިންނެވެ.
މިކަމާ ގުޅިގެން ބައްޓަޗަރްޖީ ބުނީ އޭނާގެ ތުހުމަތުތައް އޮޅުން ފިލުވަން އޭއެފްސީން އުޅުމުން އެކަމާ އުފާކުރާ ކަމަށާއި އެދިފައިވާ ގޮތަކަށް ލިޔުމުން މި މަހުގެ 18 ވަނަ ދުވަހުގެ ކުރިން އޭއެފްސީ އަށް ތަފްސީލް ފޮނުވާނެ ކަމަށެވެ.
އިންޑިޔާގެ ފުޓްބޯޅަ ފެޑަރޭޝަނުގެ ރައީސް އިސްތިއުފާ ދިނުމަށް ކުރީގެ އެއްވަނަ ފޯވަޑް ބައިޗުން ބުޓިޔާ ވެސް ވަނީ މިދިޔަ ޖެނުއަރީ މަހު ގޮވާލައިފަ އެވެ. އޭނާ ވަނީ ވަނީ ފެޑަރޭޝަނުގައި ގޯސް އެތައްކަމެއް ހިނގައި އެކި ފަރާތްތައް ސަސްޕެންޑްކުރަމުންދާ ކަމަށާއި މިކަންކަން ކުށްވެރިކުރާ ކަމަށް ބުނެފަ އެވެ. ބުޓިޔާގެ ފާޑުކިއުން އެންމެ ބޮޑުވީ ފެޑަރޭޝަނުގެ ޖެނެރަލް ސެކްރެޓަރީ މަގާމުން ވަކިކުރުމުންނެވެ.
