ޕާޓީއަށް ފަންޑުކުރިގޮތާ ގުޅޭގޮތުން ކުރިޔަށްގެންދާ ތަހުގީގާގުޅިގެން އިމްރާން ޚާންއަށް ދެވަނަ ނޯޓިސް ދީފި

ޕާކިސްތާނު ތަހްރީކް އިންސާފު (ޕީޓީއައި) ޕާޓީއަށް ފަންޑުކުރި ގޮތާއި ގުޅޭގޮތުން ޕާކިސްތާނުގެ ފެޑެރަލް އިންވެސްޓިގޭޝަން އެޖެންސީ(އެފްއައިއޭ)ން ކުރިޔަށް ގެންދާ ތަހުގީގާ، ގުޅިގެން އެޕާޓީގެ ޗެއަރޕަރސަން އިމްރާން ޚާންއާއި ސެކެޓްރީ ޖެނެރަލް އަސްއަދް އުމަރަށް އަނެއްކާވެސް ނޯޓިސް ފޮނުވާފައިވާކަމަށް އެ އެޖެންސީން ބުނެފިއެވެ.

މި ތަހުގީގަށް އިމްރާން ޚާންގެ އެއްބާރުލުން ނުލިބޭކަމަށާއި، މިގޮތަށް ތިންވަނަ ނޯޓިސް ފޮނުވައިފިނަމަ ޕާޓީގެ ލީޑަރުން ހައްޔަރުކުރުމުގެ އަމުރެއް އެ އެޖެންސީއަށް ނެރެވޭނެކަމަށް ޕާކިސްތާނުގެ މީޑިޔާ ރިޕޯޓްތައް ބުނެއެވެ.

ޕާކިސްތާނުގެ އެފްއައިއޭން ކުރިޔަށްގެންދާ މިތަހުގީގަކީ ބޭރު ގައުމުތަކުގެ 5 ކުންފުންޏަކުން ގަވާއިދާ ޚިލާފަށް ޕީޓީއައިއަށް ފަންޑުކުރި މައްސަލައެކެވެ. މިއިން އެއްވެސް ކުންފުންޏަކުން ޕާޓީއަށް ފަންޑުކުރިކަން އެޕާޓީން ޕާކިސްތަނުގެ އިލެކްޝަންސް ކޮމިޝަނާއި ފެޑެރަލް ބޯޑު އޮފް ރެވެނިޔުއަށް ހުށަހެޅި ރިޕޯޓްތަކުގައި ނެތެވެ.

މިކުންފުނިތަކަކީ; އެމެރިކާ، އިނގިރޭސިވިލާތް، އޮސްޓްރޭލިއާ، ބެލްޖިއަމް އަދި ކެނެޑާއަށް ނިސްބަތްވާ ކުންފުނިތަކެވެ. މީގެތެރެއިން ބައެއް ކުންފުނިތައް ހުއްޓާލާފައިވާއިރު އަނެއްބައި ކުންފުނިތައް އަދިވެސް ހިންގަމުން އަންނަކަމަށް އެފްއައިއޭން ބުނެއެވެ.

މިތަހުގީގާ ގުޅިގެން ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ވިދާޅުވެފައިވަނީ، މި މައްސަލައާ ގުޅިގެން އެފްއައިއޭން ކުރިޔަށްގެންދާ ތަހުގީގަށް އެއްވެސް މައުލޫމާތެއް ދެއްވަން ޖެހިވަޑައިނުގަންނަވާކަމަށެވެ. މައުލޫމާތު ދެއްވުމަށް އެދި އެފްއައިއޭން އިމްރާން ޚާންއަށް އަރުވާފައިވާ ނޯޓިސްއާ ގުޅިގެން އިމްރާން ޚާން ވަނީ، އެމަނިކުފާނުގެ އަމިއްލަފުޅު ބޭންކު އެކައުންޓްގެ މައުލޫމާތު ހިއްސާކުރުމަށް ދެކޮޅަށް ހައްދަވާފައެވެ. ދަންނަވާ ސުވާލުތަކަށް ޖަވާބުދެއްވައި، މައުލޫމާތު ފޯރުކޮށްދެއްވަން ޖެހިވަޑައިނުގަންނަވާކަމަށް ވިދާޅުވެ އިމްރާން ޚާންގެ ފަރާތްޕުޅުން، ކުރީގެ އެޓަރނީ ޖެނެރަލް އަންވަރު މަންސޫރު ވަނީ އެފްއައިއޭއަށް ޖަވާބު ދެއްވާފައެވެ.

މީގެއިތުރުން އިމްރާން ޚާން ވަނީ ދެދުވަސްތެރޭ ނޯޓިސް އަނބުރާ ނުގެންގޮސްފިނަމަ އެފްއައިއޭ އާ ދެކޮޅަށް ގާނޫނީ ފިޔަވަޅު އަޅުއްވާނެކަމުގެ އިންޒާރުވެސް ދެއްވާފައެވެ.