އަފްޣާނިސްތާނުގައި ދެވުނު ބޮމުގެ ހަމަލާގައި ޝަހީދުވީ މީހުންގެ ޖަނާޒާ ބާއްވައިފި

އަފްޣާނިސްތާންގެ ވެރިރަށް ކާބުލްގައި ނަމާދު ވަގުތަކަށް ފުރި ބާރުވެފައި އޮތް މިސްކިތެއްގައި އިއްޔެ ހަވީރު ދިން ބާރުގަދަ ބޮމުގެ ހަމަލާގައި ޝަހީދުވި މީހުންގެ ޖަނާޒާގެ ކަންތައް ކުރިޔަށް ގެންގޮސްފިއެވެ. މިހަމަލާގައި 21 މީހުން ޝަހީދުވެ އިތުރު 33 މީހުން ވަނީ ޒަޚަމްވެފައެވެ. މަރުވި މީހުންގެ ތެރޭގައި މިސްކިތުގެ އިމާމް މީހާއާއި ބައެއް ކުޑަކުދިންވެސް ހިމެނޭކަމަށް ޚަބަރު ލިބެއެވެ.

ބުދަ ދުވަހުގެ ހަމަލާގައި ގޮއްވާލި ބޮން ބާރުގަދަކަމުން ބައެއް މީހުން މިސްކިތުގެ ކުޑަދޮރުން ބޭރަށްވެސް ވިއްސައިގެން ދިޔަކަމަށް މަންޒަރު ދުށް މީހުންނާ ހަވާލާދީ، ޚަބަރުތައް ބުނެއެވެ. މިހަމަލާ ދިނީ ކޮންބައެއް ކަމެއް އަދި ނޭގެއެވެ. މީގެ އެއް ހަފުތާ ކުރިންވެސް އެގައުމުގެ މިސްކިތެއްގައި ހަމަ މިފަދަ ބޮމެއް ގޮއްވާލައި، ތާލިބާން ޖަމާއަތަށް ނިސްބަތްވާ އިސް ދީނީ އިލްމުވެރިޔަކު ވަނީ ޝަހީދުވެފައެވެ. އެފަހަރުގެ ހަމަލާގެ ޒިންމާ އިސްލާމިކް ސްޓޭޓް ޖަމާއަތުން ވަނީ ނަގާފައެވެ.

ބުދަ ދުވަހުގެ ބޮމުގެ ހަމަލާ ދީފައި މިވަނީ ތާލިބާން ޖަމާއަތުގެ ގަބީލާތަކުގެ ވެރިންގެ ދުއިސައްތައެއްހާ އިސް މެމްބަރުން ބުރާސްފަތި ދުވަހު ބާއްވަން އުޅުނު ބައްދަލުވުމަކާ ދިމާކޮށެވެ. މިބައްދަލުވުން ބާއްވާފައިވަނީ ދެވަނައަށް އެންމެ ބޮޑު ސިޓީކަމަށްވާ ކަންދަންދަހާރުގައެވެ.