އަފްޣާނިސްތާނުގެ ބަގްރާމް އެއަރބޭސް އަނބުރާ އެމެރިކާ އަށް ނުދީފިނަމަ އެ ގައުމަށް ވަރަށް ނުބައި ކަންތައްތަކާ ކުރިމަތިލާން ޖެހިދާނެ ކަމަށް ޓްރަމްޕް އިންޒާރުދީފި

އަފްޣާނިސްތާނުގެ ބަގްރާމް އެއަރބޭސް އަނބުރާ އެމެރިކާ އަށް ނުދީފިނަމަ އެ ގައުމަށް ވަރަށް ނުބައި ކަންތައްތަކާ ކުރިމަތިލާން ޖެހިދާނެ ކަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދީފައެވެ.

ހޮނިހިރު ދުވަހު ޓްރަމްޕް މިހެން ވިދާޅުވުމުގެ ކުރިން، ތާލިބާނުން ހިންގާ ސަރުކާރުން ވަނީ އަފްޣާނިސްތާނުގެ ވެރިރަށް ކާބުލްއިން 64 ކިލޯމީޓަރު (40 މޭލު) ދުރުގައިވާ މި ބޮޑު އެއަރބޭސް އަނބުރާ ދިނުމަށް ޓްރަމްޕް ގޮވާލި ގޮވާލުން ބަލައިނުގަންނާނެ ކަމަށް ބުނެފައެވެ.

"އަފްޣާނިސްތާނުން ބަގްރާމް އެއަރބޭސް އެތަން އިމާރާތްކުރި ފަރާތަށް، އެމެރިކާ އަށް، އަނބުރާ ނުދީފިނަމަ، ނުބައި ކަންތައްތަކެއް ހިނގާނެ!!!" ކަމަށް ވިދާޅުވެ ޓްރަމްޕް ވަނީ އޭނާގެ ޓްރޫތް ސޯޝަލް ޕްލެޓްފޯމްގައި ލިޔުއްވާފައެވެ.

ބަގްރާމަކީ ވަރަށް ބޮޑު ސަރަހައްދެއް ހިމެނޭ ތަނެކެވެ. އަދި މިއީ 2001 ވަނަ އަހަރުގެ ސެޕްޓެމްބަރު 11 ގައި ނިއުޔޯކާއި ވޮޝިންގްޓަން ގައި އަލްޤައިދާ އިން ދިން ހަމަލާއާ ގުޅިގެން ހިނގި 20 އަހަރުގެ ހަނގުރާމައިގައި އެމެރިކާގެ ސިފައިންގެ މައި މަރުކަޒެވެ.

އެމެރިކާގެ ސިފައިންގެ ފަރާތުން "ޓެރަރިޒަމާ ދެކޮޅަށް ކުރާ ހަނގުރާމަ" ގެ ނަމުގައި ހިންގި ޢަމަލުތަކުގެ ތެރޭގައި، އެތައް ހާސް ބަޔަކު ވަނީ އެއްވެސް ދަޢުވާއެއް ނުވަތަ ޝަރީޢަތެއް ނެތި އެތަނުގައި އަހަރުތަކަކަށް ބަންދުކޮށްފައެވެ. އަދި އޭގެ ތެރެއިން ގިނަ ބަޔަކަށް އަނިޔާކޮށް އަދި ޓޯޗަރކޮށްފައިވެއެވެ.

2021 ވަނަ އަހަރު އެމެރިކާގެ ސިފައިން އަފްޣާނިސްތާނުން ފައިބައި، އަފްޣާނިސްތާނުގެ ސަރުކާރު ވެއްޓުމާއެކު، ތާލިބާނުން ވަނީ އެ ތަނުގެ ބާރު އަނބުރާ ހޯދާފައެވެ.

ޓްރަމްޕް ވަނީ ބަގްރާމް ގެއްލުމަކީ ވަރަށް ހިތާމަ ކުރައްވާ ކަމެއް ކަމުގައި އެތައް ފަހަރަކު ވިދާޅުވެފައެވެ. އަދި އެތަން ޗައިނާއާ ކައިރީގައި އޮތްކަން ވެސް ވަނީ ފާހަގަ ކުރައްވާފައެެވެ.

ބަގްރާމް އެއަރބޭސް ހޯދުމަށް އެމެރިކާ އިން މަސައްކަތް ކުރާ ކަން ފުރަތަމަ ފަހަރަށް ޓްރަމްޕް ހާމަ ކުރެއްވީ މިދިޔަ ބުރާސްފަތި ދުވަހު އިނގިރޭސި ވިލާތައް ކުރެއްވި ޒިޔާރަތުގެ ތެރޭގައެވެ.

ޓްރަމްޕް އިނގިރޭސި ބޮޑުވަޒީރު ކީރ ސްޓާމަރ އާއެކު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ އެމެރިކާ އިން އެތަން ހޯދުމަށް މަސައްކަތް ކުރަމުން ގެންދާ ކަމުގައެވެ.

ނަމަވެސް، އަފްޣާނިސްތާނުގެ އިސްވެރިން ވަނީ އެމެރިކާގެ ސިފައިން އަލުން އެތަނަށް އައުމާމެދު ދެކޮޅުހަދާފައެވެ.

ޒާކިރު ޖަލާލް ނަމަކަށް ކިޔާ އަފްޣާނިސްތާނުގެ ޚާރިޖީ ވުޒާރާގެ އިސްވެރިއަކު ހުކުރު ދުވަހު އެކްސް (ކުރީގެ ޓްވިޓަރ) ގައި ލިޔުއްވާފައި ވަނީ އެމެރިކާ އިން ޖެހޭނީ ސީދާ އަފްޣާނިސްތާނާ އެކު މުއާމަލާތް ކުރަން ކަމަށާއި، އަދި އެއީ އެމެރިކާ އިން އަފްޣާނިސްތާނުގެ އެއްވެސް ސަރަޙައްދެއްގައި ސިފައިން ނުބައިތިއްބާ ގޮތައް ކަމަށްވެސް އޭނާ ލިޔުއްވާފައިވެއެވެ.

އަފްޣާނިސްތާނުން އެމެރިކާގެ ސިފައިން ފޭބުމުގައި އެ އެއަރބޭސް ގެއްލުނީ ކުރީގެ ރައީސް ޖޯ ބައިޑެން ޢަމަލުކުރެއްވި ގޮތުން ކަމަށް ވިދާޅުވެ ޓްރަމްޕް މީގެ ކުރިން ތަކުރާރުކޮށް ފާޑުވިދާޅުވެފައެވެ.

އަދި ޓްރަމްޕް ވަނީ އަފްޣާނިސްތާނުގައި ޗައިނާގެ ނުފޫޒު އިތުރުވަމުންދާ ކަމާމެދު ވެސް ޝަކުވާ ކުރައްވާފައެވެ.

އެ އެއަރބޭސް އަލުން ހޯދުމަށް ސިފައިން ފޮނުވާނެތޯ ހޮނިހިރު ދުވަހު ނޫސްވެރިޔަކު ސުވާލުކުރުމުން، ޓްރަމްޕް ސީދާ ޖަވާބެއް ދެއްވުމުގެ ބަދަލުގައި ވިދާޅުވީ: "އެކަމާ ބެހޭގޮތުން ވާހަކަ ނުދައްކާނަން." ކަމަށެވެ.