ފްލެޓްތަކަށް އަންނަ އަހަރުގެ ކުރީކޮޅު ވަދެވޭނެ: އެމްޕީއެލް
ފްލެޓްތައް ނިންމާލެވޭނެކަމަށް ލަފާކުރަނީ މި އަހަރުގެ ފަހުކޮޅު
އެމްޕީއެލް ފްލެޓް
ހުޅުމާލޭ ދެވަނަ ފިޔަވަހީގައި އެމްޕީއެލްއިން އަޅަމުން އަންނަ ފްލެޓްތަކަށް އަންނަ އަހަރުގެ ކުރީކޮޅު ވަދެވޭނެކަމަށް އެ ކުންފުނީގެ ސީއީއޯ ޝާހިދު އަލީ ވިދާޅުވެއްޖެއެވެ.
އެމްޕީއެލްގެ ފްލެޓްތައް ލިބުނު ފަރާތްތައް މިހާރު އިއުލާންކޮށްފައިވާއިރު އެ ކުންފުނިން މިހާރު މަސައްކަތްކުރަމުން އަންނަނީ ވީހާވެސް އަވަހަށް ފްލެޓްތައް ނިންމައި މުވައްޒަފުންނާ ހަވާލު ކުރުމަށެވެ. ފްލެޓް ލިބުނު މުވައްޒަފުންނާއެކު އެއްބަސްވުންތަކުގައި ސޮއިކުރުމުގެ މަސައްކަތާއި އެ މުވައްޒަފުންނަށް މޮކް އެޕާޓްމަންޓުތައް ދައްކާލުމުގެ ކަންކަންވެސް މިހާރު ދަނީ ކުރިއަށެވެ.
މި މަސައްކަތްތައް ކުރިއަށްދާގޮތުގެ އެންމެ ފަހުގެ މައުލޫމާތު މީޑިއާތަކާ ހިއްސާކުރައްވަމުން އެމްޕީއެލްގެ ސީއީއޯ ޝާހިދު އަލީ ވިދާޅުވީ، ކުރިން ތާވަލުކޮށްފައި އޮތް ތާރީޚަށް ނުނިމުނީ ކޮވިޑް-19ގެ ސަބަބުން ދިމާވި ދަތިތަކާ ގުޅިގެންކަމަށެވެ. ނަމަވެސް ކޮންޓްރެކްޓަރާ ބައްދަލުކޮށް، މަސައްކަތްތައް ހަލުވިކަމާއެކު ކުރިއަށްގެންދިއުމަށް މަސައްކަތްކުރަމުން އަންނަކަމަށާއި، މިއަހަރު ނިމޭއިރު މަސައްކަތް އެއްކޮށް ނިންމާލެވޭނެކަމަށް ލަފާކުރެވޭކަމަށް އޭނާ ވިދާޅުވިއެވެ.
މިހާރު އޮތްގޮތުން އެ އެޕާޓްމަންޓުތައް ނިންމަންޖެހެނީ އަންނަ އޮކްޓޯބަރު މަހުގެ 31އަށެވެ. ނަމަވެސް މަސައްކަތް ލަސްވާނެކަމަށް ވަނީ ލަފާކޮށްފައެވެ.
ޝާހިދު ވިދާޅުވީ އެ ކުންފުނީގެ މުވައްޒަފުން ޕޭމަންޓް ދެއްކުމަށް ދެ އޮޕްޝަނެއް ކުރިން އޮތް ނަމަވެސް މިހާރު ތިން އޮޕްޝަނެއް ދީފައިވާ ކަމަށެވެ. އެގޮތުން، އެއްފަހަރާ ފައިސާދައްކަން ބޭނުންވާ ފަރާތްތަކަށް އެ ފުރުސަތު ދީފައިވާއިރު، ބޭންކް މެދުވެރިކޮށް ފައިސާ ދެއްކުމާއި އެމްޕީއެލްގެ ސްކީމްގެ ދަށުން ފައިސާ ދެއްކޭނެ އިންތިޒާމުވެސް ހަމަޖެހިފައިވާކަމަށް އޭނާ ވިދާޅުވިއެވެ. އަދި ޑައުންޕޭމަންޓް ދެއްކުމަށް މުވައްޒަފުންނަށް ލުއިގޮތެއް ހޯދައިދިނުމަށް، 9 މަހަށް ބަހާލައިގެން ޑައުންޕޭމަންޓް ދެެއްކޭނެ ގޮތް ހަދައިދީފައިވާ ކަމަށާއި، ބާކީ ޕޭމަންޓް ނަގަންފަށާނީ ޑައުންޕޭމަންޓް އެއްކޮށް ދައްކައި ނިމުމުން ކަމަށްވެސް ޝާހިދު ވިދާޅުވިއެވެ.
އެމްޕީއެލް ފްލެޓްތަކުގެ ޑައުންޕޭމަންޓް ދެއްކުމަށްފަހު އިންސްޓޯލްމަންޓް ދެއްކުމަށް އެ ކުންފުނީގެ މުވައްޒަފުންނަށް ވަނީ 20 އަހަރުގެ މުއްދަތެއް ދީފައެވެ.
އެ ކުންފުނީގެ ޗެއަރމަން ކެޕްޓަން މުހައްމަދު ޝަރީފް ވިދާޅުވީ، ފްލެޓްތައް ވީހާވެސް އަވަހަށް ނިންމުމަށް ބޯޑުން ކުރެވެންހުރި ހުރިހާ މަސައްކަތެއް ކުރަމުން އަންނަ ކަމަށެވެ. އަދި ބޭނުންވަނީ އެ ފްލެޓްތަކަކީ ދިރިއުޅެން ހިތްފަސޭހަ ތަނަކަށް ހެދުމަށް ކަމަށް ވެސް އޭނާ ވިދާޅުވިއެވެ.
އެމްޕީއެލްއިން ހުޅުމާލޭގެ ދެވަނަ ފިޔަވަހީގައި އަޅަމުން އަންނަ ފްލެޓްތަކަކީ ޖާގައިގެ ގޮތުން، އެ ސަރަހައްދުގައި ހަދަމުން އަންނަ އެހެން އެޕާޓްމަންޓުތަކާ އަޅައިބަލާއިރު ބޮޑެތި އެޕާޓްމަންޓުތަކެކެވެ. އެ އެޕާޓްމަންޓުތައް ޑިޒައިންކޮށްފައިވަނީ ވީހާވެސް ފަސޭހަކަމާއެކު ދިރިއުޅެވޭ ގޮތަކަށް ބަލައިގެންކަމަށް އެމްޕީއެލްއިން މައުލޫމާތުދެއެވެ.
އެ ކުންފުނިން އަންނަނީ 15 ބުރީގެ 3 ޓަވަރުގެ މަސައްކަތް ކުރަމުންނެވެ. މި ޓަވަރުތަކުގައި 534 އެޕާޓްމަންޓް ހިމެނޭއިރު އެއީ 1 ކޮޓަރީގެ 204 ފްލެޓާއި 2 ކޮޓަރިއާއި މެއިޑް ރޫމް ހިމެނޭ 330 ފްލެޓެވެ.
އެމްޕީއެލްއިން ވަނީ ޖާގައަށް ބަލައި، އެއްކޮޓަރިއާއި، 1+2 ކޮޓަރީގެ ފްލެޓްތައް ދެ ކެޓަގަރީއަކަށް ބަހާލާފައެވެ. 1 ކޮޓަރީގެ ފްލެޓްތަކުގެ ޓައިޕް އޭ ފްލެޓުތަކުގައި 454 އަކަފޫޓު ހުންނައިރު، ޓައިޕް ބީގައި 471 އަކަފޫޓު ހުރެއެވެ. އަދި 1+2 ކޮޓަރީގެ ފްލެޓްތަކުގެ ޓައިޕް އޭގައި 670 އަކަފޫޓު ހުންނައިރު ޓައޕް ބީގައި 686 އަކަފޫޓު ހުރެއެވެ.
