ރާއްޖޭގެ ނޫސްވެރިންގެ ރައްކާތެރިކަމާއި، ކުރިއެރުމަށް ކުރަން ޖެހޭ މަސައްކަތްތަކެއް އެބަހުރި ކަމަށް އިންޓަރނޭޝަނަލް ފެޑަރޭޝަން އޮފް ޖަރނަލިސްޓްސް (އޭޝިއާ-ޕެސިފިކް)ގެ ޑިރެކްޓަރ ޖޭން ވޯރތިންގޓޮން ވިދާޅުވެއްޖެއެވެ.

ރާއްޖޭގެ އަންހެން ނޫސްވެރިންނާއި ބައްދަލުކުރުމަށް އަންގާރަ ދުވަހު ސޮލައިޓްގައި ބޭއްވި ބައްދަލުވެއްގައި "ރާއްޖެ އެމްވީ" އަށް މައުލޫމާތުދެއްވަމުން އޭނާ ވިދާޅުވީ ފުލުހުންނާއި ނޫސްވެރިންނާއި ދެމެދު ރަނގަޅު ގުޅުމެއް އޮތުން ވަރަށް މުހިންމު ކަމަށެވެ. އަދި ނޫސްވެރިންނަކީ ދައުލަތާއި، އިދާރާތަކުގެ އިތުރުން އާއްމުންގެ އިތުބާރު ލިބިފައިވާ ބަޔަކަށް ވާން ޖެހޭ ކަަމަށެވެ.

އަދި ކުރިއަށް އޮތް 2023ގެ އިންތިޚާބު ކަވަރު ކުރާ އިރު ނޫސްވެރިންނަށް މައުލޫމާތު ހޯދުމަށް ހުރަސްތައް ކުރިމަތިނުވާނެކަން ޔަގީންކޮށް، ނޫސްވެރިން ޒިންމާދާރުކަމާއި އެކު މަސައްކަތް ކުރާކަން ޔަގީން ކުރަން އިންތިޚާބުގެ ކަވަރޭޖްގެ މަސައްކަތްތައް ވަރަށް ކައިރިން ބައްލަވާނެ ކަމަށް ވެސް އޭނާ ވިދާޅުވިއެވެ.

ނޫސްވެރިކަމުގެ ސިނާއަތުގައި މަސައްކަތްކުރާ ގިނަ އަދަދެއްގެ ނޫސްވެރިންނާއި ބައްދަލުވެފައިވާ ކަމަށާއި ރާއްޖޭގައި ނޫސްވެރިން އެކަކު އަނެކަކާއި ގުޅިގެން ވަރަށް ގާތުން މަސައްކަތްކުރާކަން ފާހަގަކުރެވިފައިވާ ކަމަށް އޭނާ ވިދާޅުވިއެވެ. އަދި ރާއްޖޭގެ ނޫސްވެރިންނަށް ދިމާވެފައިވާ ގޮންޖެހުންތަކާއި މެދު މައުލޫމާތު އޮޅުން ފިލުވާފައިވާ ކަމަށާއި ރާއްޖޭގެ ނޫސްވެރިކަން ކުރިއަރުވަން ކުރަން ޖެހޭ ގިނަ މަަސައްކަތްތަކެއް އަދި ވެސް އެބަ ހުރި ކަމަށް އޭނާ ވިދާޅުވިއެވެ.

އަންގާރަ ދުވަހުގެ ނޫސްވެރިންގެ ބައްދަލުވުމުގައި ނޫސްވެެރިން ވަނީ ނޫސްވެރިންނަށް ދިމާވާ ގޮންޖެހުންތައް ޖޭން އާއި ހިއްސާކޮށްފައެވެ. ޚާއްސަކޮށް އަންހެން ނޫސްވެރިންނަށް ދިމާވާ ދަތިތަކުގެ މައުލޫމާތު އޭނާ އާއި ނޫސްވެރިން ވަނީ ހިއްސާކޮށްފައެވެ. އެގޮތުން ގިނަ އަދަދެއްގެ އަންހެން ނޫސްވެރިން ރާއްޖޭގައި މަސައްކަތް ކުރަމުންދާއިރު އަދި ވެސް ޖިންސީ ތަފާތުކުރުންތަކާއި ދިމާވާކަން ބައެއް ނޫސްވެރިން ފާހަގަކޮށްފައިވެއެވެ. އެހެންނަމަވެސް ކުރިއާއި އަޅާ ބަލާ އިރު މިހާރު އަންހެން ނޫސްވެރިންނަށް މި ދާއިރާގައި ފުރުސަތު ބޮޑުކަން ނޫސްވެރިން ވަނީ ފާހަގަކޮށްފައެވެ. މީގެ އިތުރުން ހަނގާ ކުރުމާއި ޖިންސީ ފުރައްސާރައިގެ އަމަލުތައް މަދުން ނަމަވެސް ދިމާވުމަކީ މި ދާއިރާގައި މަސައްކަތްކުރާ އަންހެނުންނަށް ދިމާވާ ގޮންޖެހުމެއް ކަމަށް ނޫސްވެރިން ފާހަގަކުރިއެވެ.