ތިން ގަޑިއިރު ހިނގާފައި، ހިލޭ ޕާން ލިބިދާނެކަމުގެ އުންމީދުގައި ސަލާން ޖަހަން

އަފްޣާނިސްތާނުގައި ތޯލިބާނުންގެ ވެރިކަމެއް ދެވަނަ ފަހަރަށް އައިފަހުން މިއޮގަސްޓް މަހުގެ 15 ވަނަ ދުވަހަށް އެއްއަހަރު ވީއިރު އެގައުމުގެ ހާލަތު ވަނީ ގޯހުންގޯހަށް ގޮސްފައެވެ. ކާބޯތަކެތީގެ ދަތިކަން ހުރި މިންވަރަކީ; ތިންގަޑިއިރު ހިގާފައި ވެރިރަށް ކާބުލްގެ ރެސްޓޯރަންޓަކުން ކަސްޓަމަރުން ދިއްކޮށްލާނެ ބާކީ ޕާންފަދަ ކާއެތިކޮޅަކަށް އުންމީދުކޮށްގެން ސަލާންޖަހަން ދާ މީހުން ގިނަކަމެވެ.  

އެތަނުން އެކަކީ ޝަކީލާއެވެ. އޭނަ ކިޔައިދިން ގޮތުގައި; އެފަދަ ދިގު ދަތުރެއް ފައިމަގުފައި ކުރަން މަޖުބޫރުކުރުވަނީ ބަޑުހައިހޫނުކަމެވެ. ކުދިންނަށް ކާންދެވޭނެ ގޮތެއް ނެތުމެވެ. އޭނާ ބުނިގޮތުގައި، ރޭގަޑުގެ ކެއުމަކީ އެމީހުންނަށް ކޮންމެ ދުވަހަކު ލިބޭ އެއްޗެއް ނޫނެވެ. އަފްޣާނިސްތާނުގެ ހާލަތު ގޯސްވެފައިވާތާ ދެތިން އަހަރު ވެއްޖެކަމަށާއި، އޭގެ ތެރެއިންވެސް ފާއިތުވި އަހަރެއްހާދުވަހުގެ ތެރޭގައި ފަގީރުކަން ވަރަށް ބޮޑަށް ފެތުރިފައިވާކަމަށް ޝަކީލާ ބުންޏެވެ.

އދ.ން ހާމަކޮށްފައިވާ ގޮތުގައި، މިއަދު އަފްޣާނިސްތާނުގެ ގާތްގަޑަކަށް ދެބައިކުޅަ އެއްބަޔަކީ ބަޑުހައިހޫނުކަމުގައި ދުވަސްތައް ހޭދަކުރަމުންދާ މީހުންނެވެ. އިންޓަރނޭޝަނަލް ރެސްކިއު ކޮމިޓީން މޭ މަހު ނެރެފައިވާ ރިޕޯޓެއްގައި ބުނެފައިވާގޮތުން އަފްޣާނިސްތާނުގެ 43 އިންސައްތަ މީހުންނަކީ ރެޔަކާއިދުވާލު އެއްފަހަރު ކައިގެން ތިބޭ މީހުންނެވެ. އަދި އެގައުމުން ސަރވޭ ކުރެވުނު މީހުންގެ 90 އިން ސައްތަ ބުނެފައިވަނީ އެމީހުންނަށް އެންމެ ދަތިވެފައިވަނީ ކާނެ އެއްޗެއް ލިބުމުގެ މައްސަލަކަމަށެވެ.

ހަތިޔާރުއެޅި ހަނގުރާމަވެރި ޖަމާއަތެއްގެގޮތުގައި މުޅިދުނިޔެވެސް ދަންނަ ތޯލިބާން ޖަމާއަތުން ދެވަނަ ފަހަރަށް އަފްޣާނިސްތާނަށް ވެރިވެގަތުމުން އެކަމުގެ އަދަބެއްގެގޮތުން އެމެރިކާއިން ވަނީ އެގައުމާ ދެކޮޅަށް ދަތިކުރުމުގެ ފިޔަވަޅު އަޅާފައެވެ. އަދި އެހީގެގޮތުގައި ދެވިފައި ސެންޓްރަލް ބޭންކުގައި ހުރި 9 ބިލިއަން ޑޮލަރު އެމެރިކާއިން ވަނީ އަތް ނުލެވޭގޮތް ހަދައި "ފްރީޒް"ކޮށްފައެވެ. އަފްޣާނިސްތާންގެ އަހަރީ ބަޖެޓުގެ 80 އިންސައްތައަކީ ބޭރުގެ އެހީކަމަށްވާއިރު، އެފައިސާ ބަންދުކޮށްލުން ވީ އަފްޣާނިސްތާނުގެ ރައްޔިތުންނަށް ވަރަށް ބޮޑު ނިކަމެތިކަމެއް ގެނުވިކަމަކަށެވެ. ނަތީޖާއެއްގެގޮތުން އިންތިހާ ދަރަޖައަށް ފަގީރުކަން އިތުރުވެ، ހަނަފަސްކަން ފެތުރި، ކުޑަކުދިންގެ ހަށިގަނޑު ރަނގަޅަށް ހެދިބޮޑުވުމަށް ބޭނުންވާ މުހިންމު މާއްދާތައް ނުލިބި، މެލްނިއުޓްރިޝަންގެ މައްސަލަތައް އިތުރުވެފައިވެއެވެ. ތޯލިބާން ޖަމާއަތުގެ ވެރިކަމުގެދަށުގައި ކުރިމަތިވި އެންމެ ބޮޑު އަނެއް މައްސަލައަކީ އަންހެނުން ވަޒީފާއަދާކުރުން ބަންދުކުރެވި އަންހެންކުދިންނަށް ސެކަންޑަރީ ތައުލީމު ބަންދުކޮށްލުމެވެ. އަންހެނުންގެ ހައްގުތައް ނިގުޅައިގަނެވި އެމީހުންގެ މުސްތަގުބަލު ބަނަވެފައިވެއެވެ.

ތޯލިބާނުންގެ ވެރިކަމަށް އަހަރެއްވީއިރުވެސް އަދި އެއްވެސް ގައުމަކުން އެސަރުކާރު ބަލައިގެންފައެއްނުވެއެވެ.

އެމެރިކާއާއި އެމެރިކާގެ ބައިވެރިން ބުނަނީ އަފްޣާނިސްތާނުގެ ތޯލިބާން ސަރުކާރަށް އެހީ ބަންދުކޮށްލީ ހަތިޔާރުއެޅި ޓެރަރިސްޓުންގެ ކަންކަމަށް ޚަރަދުކުރާނެތީކަމަށެވެ. އެމެރިކާއިން އެންމެ ބޮޑަށް ހޯދަމުން އައި އެކަކު ކަމަށްވާ އަލްގާއިދާގެ ލީޑަރު އައިމަން އައްޒަވާހިރީ ވަނީ އަފްޣާނިސްތާނުގައި ހުއްޓާއި އެމެރިކާ ސިފައިންގެ ޑްރޯން ހަމަލާއެއްގައި ދާދި ފަހުން މަރާލާފައެވެ.