ޝާހިދުގެ ތާއީދުވެސް ރިޔާސީ ނިޒާމަށް
ޝާހިދު ވިދާޅުވީ އެމަނިކުފާނު ބޭނުންފުޅުވަނީ ތިން ބާރު ވަކިވެފައި އޮތުންކަމަށް
ފޮރިން މިނިސްޓަރ އަބްދުﷲ ޝާހިދު
ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށް، ފޮރިން މިނިސްޓަރ އަދި އދ. ގެ އާއްްމު މަޖިލީހުގެ ރައީސް އަބްދުﷲ ޝާހިދުވެސް ވިދާޅުވެއްޖެއެވެ.
އަންގާރަ ދުވަހު ޝާހިދު ކުރެއްވި ޓްވީޓެއްގައި ވިދާޅުވީ، އެމަނިކުފާނު ތާއީދުކުރައްވަނީ ރައްޔިތުންގެ ސީދާ ވޯޓަކުން ދައުލަތާއި ސަރުކާރުވެރިޔާ ހޮވުމަށްކަމަށެވެ. އަދި ގާނޫނު ހެދުމުގެ ބާރާއި ސަރުކާރު ޒިންމާދުރުކުރުވުން ރައްޔިތުންގެ މަޖިލީހުގައި އޮތުމަށް ކަމަށްވެސް އެމަނިކުފާނު ވިދާޅުވިއެވެ.
މީގެ އިތުރުން އަދުލުއިންސާފު ގާއިމުކުރުން ފަނޑިޔާރުގޭގައި އޮތުމަށް ތާއީދުކުރައްވާކަމަށާއި، ގާނޫނަށް ބޯލެނބުމުގެ ސިފަ ވެރިންގެ ކިބައިގައި ހުންނަންޖެހޭކަމަށްވެސް އެމަނިކުފާނު ކުރެއްވި ޓްވީޓުގައި ވަނީ ވިދާޅުވެފައެވެ.
ޝާހިދު މިހެން ވިދާޅުވެފައިވާއިރު، ތިން ބާރު ވަކިވެފައިވާ ނިޒާމަކީ ރިޔާސީ ނިޒާމެވެ. މިގޮތަށް އެމަނިކުފާނު ވިދާޅުވީ ރާއްޖޭގެ ވެރިކަން ހިންގާ ނިޒާމު ބަރުލަމާނީ ނިޒާމަށް ބަދަލު ކުރުމަށް އެމްޑީޕީގެ ރައީސް، އަދި ކުރީގެ ރައީސް މުހައްމަދު ނަޝީދު އެ ޕާޓީގެ ކޮންގްރެސްއަށް އިސްލާހު ހުށަހަޅާފައިވާ ދަނޑިވަޅެއްގައެވެ.
ނަޝީދު ކޮންގްރެސްއަށް ހުށަހެޅުއްވި ގަަރާރަށް ތާއީދުނުކުރައްވާ ކަމަށާއި އެ ގަރާރު އަނބުރާ ގެންދެވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުވެސް ވަނީ ވިދާޅުވެފައެވެ. އެމަނިކުފާނު "ރާއްޖެ ޓީވީ"އަށް ދެއްވި ޚާއްސަ އިންޓަވިއުއެއްގައި ވިދާޅުވީ، އެމަނިކުފާނު ތާއީދުކުރައްވަނީ ރައްޔިތުންގެ ފުރިހަމަ އަޣުބަލިއްޔަތަކުން ހޮވޭ ރައީސަކާއެކު އެކުލެވޭ ސަރުކާރަކަށް، ހިންގުމުގެ ބާރު އޮތުންކަމަށެވެ. އަދި ރައްޔިތުން އިންތިޚާބުކުރާ މަންދޫބުންގެ މައްޗަށް އެކުލެވޭ ރައްޔިތުންގެ މަޖިލީހަކަށް ގާނޫނު ހެދުމުގެ ބާރު އޮތުމާއި، މިނިވަންކަމާއެކު ޝަރީއަތްކުރެވޭގޮތަށް ޖުޑިޝަރީ އޮތުމާއި، ތިންބާރު ވަކިކުރެވިފައި އޮތް މިފަދަ ނިޒާމެއް އެއީ އެމަނިކުފާނު ގަބޫލުކުރައްވާ ނިޒާމުކަމަށް ވިދާޅުވިއެވެ.
މިދިޔަ ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ނަޝީދު ވިދާޅުވީ، އެމަނިކުފާނު ބޭނުންފުޅުވަނީ ރާއްޖޭގައި ބަރުލަމާނީ ނިޒާމެއް އޮތުން ކަމަށެވެ. މި ނިޒާމުގެ ދަށުން ސަރުކާރު ހިންގުމުގެ އެންމެ އިސްފަރާތަކީ ބޮޑުވަޒީރު ކަަމަށާއި ސަރުކާރު އެކުލަވާލާނީ ރައްޔިތުންގެ މަޖިލީހުގެ ދެބައިކުޅަ އެއްބަޔަށްވުރެ ގިނަ ގޮނޑި ކާމިޔާބުކުރާ ޕާޓީއަކުންކަމަށާއި، އެއް ޕާޓީއަށް ރައްޔިތުންގެ މަޖިލީހުގެ އަޣުލަބިއްޔަތު ނުލިބިއްޖެނަމަ ރައްޔިތުންގެ މަޖިލީހުގެ ގޮނޑި ކާމިޔާބުކުރި އިތުރު ޕާޓީއަކާ ނުވަތަ ޕާޓީތަކަކާ ގުޅިގެން ސަރުކާރު އެކުލަވާލުމުގެ ފުރުސަތު، އިންތިޚާބުގައި އެންމެ ގިނަ ގޮނޑި ކާމިޔާބުކުރި ޕާޓީއަން އޮންނާނެކަން ގާނޫނު އަސާސީގައި ބަޔާންކުރާނެކަމަށް ވިދާޅުވިއެވެ.
ސަރުކާރު އެކުލަވާލައި އިއުލާންކުރުމަށް ކަނޑައަޅާ މުއްދަތު ގާނޫނު އަސާސީގައި ބަޔާންކުރުމާއި، އެ މުއްދަތުގެ ތެރޭގައި ސަރުކާރު އެކުލަވައިނުލެވިއްޖެނަމަ މަޖިލިސް އުވާލިކަން ރައީސުލްޖުމްހޫރިއްޔާ އިއުލާނުކުރަންވާނޭކަމާއި، އައު އިންތިޚާބަކަށް ދާންޖެހޭނެކަން ގާނޫނުއަސާސީގައި ބަޔާންކުރުންވެސް ރައީސް ނަޝީދު ހުށަހަޅުއްވާ އިސްލާހުގައި ހިމެނެއެވެ.
މީގެ އިތުރުން ބޮޑުވަޒީރުކަމަށް އައްޔަންކުރާނީ ރައްޔިތުންގެ މަޖިލީހުގެ އެންމެ ގިނަ ގޮނޑި ކާމިޔާބުކުރާ ޕާޓީއަކުން ކަނޑައަޅާ މީހެއްކަމަށް ގާނޫނު އަސާސީގައި ބަޔާންކުރުމާއި، ވަޒީރުންގެ މަޖިލިސް އެކުލަވާލާނީ ރައްޔިތުންގެ މަޖިލީހަށް އިންތިޚާބުކުރެވޭ ނުވަތަ އައްޔަންކުރެވޭ މެންބަރުންގެ ތެރެއިންކަން ގާނޫނު އަސާސީގައި ބަޔާންކުރުން ހިމެނެއެވެ.
