ޕޫރީއަކީ މިއަދު ދިވެހިންނަށް އާ ނަމަކަށް ނުވާނެއެވެ. ނަމަވެސް ދިވެހިންގެ ތެރޭގައި އާންމުކޮށް ފެންނަ ޕޫރީއާ ޚިލާފަށް، ޕާކިސްތާނުގައި ޕޫރީއޭ ކިއާ އުޅެނީ މުރަނަކޮށް ތެލުލާފައި އޮންނަ ރޮއްޓަކަށެވެ. ގޮދަން ފުށުން ތައްޔާރުކޮށްފައި އޮންނަ ޕޫރީއަކީ ހެނދުނުގެ ނާސްތާގެ އިތުރުން ލުއިކާނާއެއްގެ ގޮތުގައިވެސް ބައެއް ފަހަރު ބޭނުން ކުރާ އެއްޗެކެވެ. ކުޅި ރިހައެއްގެ ގޮތުގައި ޕޫރީ ބާޖީ ކައި އުޅޭ އިރު، ފޮނި އެއްޗެއްސާ ޖަހައިގެންވެސް ޕާކިސްތާނުގައި ޕޫރީ ކައެވެ. އެހެން ކަމުން، ޕޫރީއަކީ ކުޅި ރަހައިގެ އިތުރުން ފޮނި ރަހައަށް ލޯބިކުރާ މީހުންގެ މެދުގައިވެސް މަގުބޫލު ލުއިކާނާއަކަށް އޮންނަނީ ވެފައެވެ. ޖީބަށްވެސް އެހާމެ ލުއިވީމައެވެ.
އެއީ މާޒީއެވެ. މި ދުވަސްވަރަކީ ޕާކިސްތާނުގެ ބާޒާރުތަކުގައި ފަތުއަޑުކިއާފައި ތަކެތީގެ އަގުތައް އުފުލެމުންދާ ދުވަސްވަރެއް ކަމުން، ފައިސާ ދަބަހުގެ ގޮށް ބާރުކޮށްލުމަށް ޕާކިސްތާނުގެ ރައްޔިތުންނަށް ވަނީ މަޖުބޫރުވެފައެވެ. އެންމެ ބޮޑު ޝިކާރައަކަށް ވީ ޕޫރީ ފޭނުންނެވެ. ލުއިކާނާއެއްގެ ގޮތުގައި، މަގުތަކުންވެސް ލިބެން ހުރި ޕޫރީއަށް ނޫނެކޭ ބުނަން މަޖުބޫރުވެއްޖެއެވެ.
ޕާކިސްތާނުގެ ތަފާސް ހިސާބުތަކާ ބެހޭ ބިއުރޯއިން އޯގަސްޓް 1 ވަނަ ދުވަހު އާންމު ކުރި ޖުލައި މަހުގެ ކޮންޒިއުމާ ޕްރައިޒް އިންފްލޭޝަން ރޭޓް ވަނީ 24.9 ޕަސެންޓަށް އަރާފައެވެ. އެއީ ފާއިތުވީ 14 އަހަރު ދުވަހުގެ ތެރޭގައި ރެކޯޑް ކުރެވުނު އެންމެ މަތީ ރޭޓްއެވެ.
ޕޫރީއަށް ވަކިން ބަލާލަމާ ހިނގާށެވެ. މީގެ އަހަރެއްހާ ދުވަސް ކުރިން ޕުރީގެ އަގު އުޅުނީ 20 ޕާކިސްތާން ރުޕީޒް ނުވަތަ 0.09 އެމެރިކާ ޑޮލަރަށެވެ. ނަމަވެސް މިއަދު އަގު ދެގުނަ ބޮޑެވެ.
ކުރިން ޕޫރީ ލިބޭނެ 20 ޕާކިސްތާން ރުޕީޒްއަށް. މިހާރު ޕުރީ ލިބެނީ 40 ރުޕީޒްއަށް. މީގެ ކުރިން، ކާ ކޮންމެ ފަހަރަކު 4 ވަރަކަށް ޕޫރީ ކަން އަހަރެން. އެކަމަކު މިހާރު އެކަތި ދޭތިން ފުއްދާލަނީ. ދެން އެހެން ނޫނީ ކިހިނެއް ހަދާނީ؟ތަންވީރު އަހުމަދު؛ ޕާކިސްތާނުގައި ކަޑައަކުން ޚިދުމަތް ހޯދި މީހެއް
ތަފާސް ހިސާބުތަކާ ބެހޭ ބިއުރޯގެ ރެކޯޑްތަކަށް ބަލާއިރު، ޕާކިސްތާނަށް ލިބޭ އާމްދަނީއިން ބޮލަކަށް ޖެހޭ ނިސްބަތް ނުވަތަ ޕަރ ކެޕިޓާ އިންކަމް އުޅެނީ އަހަރެއްގެ މައްޗަށް 1666 ޑޮލަރުގައެވެ. އެއަކަށް ބަދަލެއް ނާދެއެވެ. އަސަރު ފޯރަނީ މުދާ ގަންނަ މިންވަރަށެވެ.
ޕާކިސްތާނުގައި ކަޑައެއް ހިންގާ މުޙައްމަދު ޖާވިދު އައްބާސީ ލަފާ ކުރާ ގޮތުގައި، އޭނާގެ ކަޑައިން ޤަވައިދުން ޕޫރީ ކަމުން ދިޔަ ކަސްޓަމަރުންގެ 2 ބައިކުޅަ 1 ބައި މީހުން މިހާރު އެ ކަން ހުއްޓާލައިފިއެވެ.
އިންފްލޭޝަންގެ ސަބަބުން ހަމަ ޤައިމުވެސް އަހަރެމެންގެ ވިޔަފާރިއަށް ބަދަލުތަކެއް އަތުވެއްޖެ. އެންމެނަށްވެސް ބަދަލުތަކެއް އަތުވެއްޖެ. ކަސްޓަމަރުންގެ އަދަދު މަދުވެއްޖެ. ހަލްވާ، ރަވާ ޕުޑިންގް ކާ މީހުންގެ އަދަދު މަދުވެއްޖެ. ޕޫރީ ކާ މީހުންގެ އަދަދު ވަކިން ބޮޑަށް މަދުމުޙައްމަދު ޖާވިދު އައްބާސީ؛ ޕާކިސްތާނުގައި ކަޑައެއް ހިނގާ މީހެއް
ޕާކިސްތާނުގައި ޕޫރީގެ އަގު ބޮޑުވެފައި ވަނީ، އެ ތައްޔާރު ކުރަން ބޭނުން ވާ ސަމާނުގެ އަގު ބޮޑުވެގެންނެވެ. ގޮދަން ފުށުގެ އަގު 7 ޕަސެންޓް ބޮޑުވެފައި ވާ އިރު، ކަރަންޓަށް ކުރަން ޖެހޭ ހޭދަ، 52 ޕަސެންޓް ބޮޑުވެއްޖެއެވެ. ތަފާސް ހިސާބުތަކާ ބެހޭ ބިއުރޯއިން އާންމު ކޮށްފައި ވާ މައުލޫމާތަށް ބަލާއިރު ކުކިންގް އޮއިލްގެ އަގު ވަނީ 74 ޕަސެންޓަށް އުފުލިފައެވެ.
މީގެ ކުރިން މަހަކު ދެތިން ފަހަރު އަހަރެން މިތަނުން ކަން. އާއިލާ މެންބަރުންނަށް ގެއަށްވެސް ގެންދަން. އެކަމަކު މިހާރު، މިތަނުން ކާލެވެނީ މަހަކު 1 ފަހަރު. ގެއަށްވެސް އެއްޗެއް ގެންދެވެނީ މަހަކު 1 ފަހަރުފަޒާލް ރަހުމާން؛ ޕާކިސްތާނުގައި ކަޑައަކުން ޚިދުމަތް ހޯދި މީހެއް
އެހާ ހިސާބުން އަދި ނިމުނީއެއް ނޫނެވެ. ތަރުކާރީއާއި ކިރުގެ އަގުވެސް އިންތިހާ ބޮޑުވެ، ލުއި ކާނާއެއް ކާލާނެ ތަނަވަސްކަން ވަނީ ކުޑަވެފައެވެ.
އިންފްލޭޝަން އުފުލެމުން ގޮސް، މެދުފަންތީގެ އާއިލާތަކުގެ ގުދާރު ބިންދާލައިފި. . މީގެ ކުރިން ކޮންމެ ދުވަހަކު ކައި އުޅުނު ހަލްވާ ޕޫރީ ކާލެވެނީ ހާލަކުން ފަހަރަކު މިހާރުފާރޫޤު ޝާދު؛ ޕާކިސްތާނުގައި ކަޑައަކުން ޚިދުމަތް ހޯދި މީހެއް
ކޮންމެ ހާލެއްގައި ޤައުމު އޮތް ކަމުގައި ވީ ނަމަވެސް، ފޯރުންތެރިކަން ހުރި މީހުންނަށް ޚިދުމަތް ދިނުމަށް، ޕާކިސްތާނުގެ އެކި ހިސާބުތަކުގައި އަދިވެސް ޕޫރީ ތައްޔާރު ކުރުމުގެ މަސައްކަތް ކުރިއަށް ގެންދެއެވެ.
