ޤައުމީ ޓީމުން ބައިނަލްއަޤުވާމީ އެކުވެރިކަމުގެ މެޗުތަކެއް ކުޅެނީ

ރާއްޖޭގެ ޤައުމީ ފުޓުބޯޅަ ޓީމުން ބައިނަލްއަޤުވާމީ އެކުވެރިކަމުގެ މެޗުތަކެއް ކުޅޭ ގޮތަށް ހަމަޖައްސައިފިއެވެ.

މިކަން ހާމަކޮށްފައިވަނީ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ބައްސާމް އަދީލް ޖަލީލް ކުރެއްވި ޓުވީޓެއްގައެވެ.

އެ ޓުވީޓުގައި ބައްސާމް ބުނީ އަންނަ ސެޕްޓެމްބަރު މަހުގެ ތެރޭގައި ޤައުމީ ޓީމުން ބައިނަލްއަޤުވާމީ އެކުވެރިކަމުގެ ދެ މެޗެއް ކުޅޭ ގޮތަށް ހަމަޖެހިފައިވާ ކަމަށެވެ. އެއީ ލާއޯސް އަދި ބުރުނާއީ ދާރުއްސަލާމާ ދެކޮޅަށެވެ. މި މެޗުތައް ކުޅޭނީ ބުރުނާއީގައެވެ.

މިއަހަރުގެ ކުރީ ކޮޅު ވެސް ޤައުމީ ޓީމުން ވަނީ ބައިނަލްއަޤުވާމީ އެކުވެރިކަމުގެ މެޗެއް ކުޅެފައެވެ. މާލޭގެ ގަލޮޅު ރަސްމީ ދަނޑުގައި ބަންގްލަދޭޝްއާ ދެކޮޅަށް ކުޅުނު އެ މެޗުން ރާއްޖެ ވަނީ މޮޅުވެފައެވެ.

ޤައުމީ ޓީމުގެ ކޯޗު ފްރެންޗެސްކޯ މޮރިއޭރޯގެ ދަށުން ޤައުމީ ޓީމު މިހާތަނަށް ކުޅުނީ ހަތް މެޗެވެ. އޭނާގެ އިރުޝާދުގެ ދަށުން ޤައުމީ ޓީމު ވަނީ ފޯ ނޭޝަންސް ކަޕާއި، އޭޝިއަން ކަޕް ކޮލިފައިން ގްރޫޕް ސްޓޭޖުގެ މެޗުތައް ވެސް ކުޅެފައެވެ.