މިސީޒަންގެ އިނގިރޭސި ޕްރިމިއަރ ލީގުގައި ލިވަޕޫލް އަމިއްލަ ދަނޑުގައި ކުޅުނު ފުރަތަމަ މެޗު ޕޮއިންޓަކުން ފުއްދާލަން ޖެހިއްޖެއެވެ.

ކްރިސްޓަލް ޕެލަސްއާ ވާދަކުރި މެޗު ލިވަޕޫލް ޕޮއިންޓަކުން ފުއްދާލަން ޖެހުނީ 1-1 ން އެއްވަރުވެގެންނެވެ. މެޗުގައި ލިވަޕޫލަށް ދިމާވި އެންމެ ބޮޑު މައްސަލަައަކީ 1-0 ން ފަހަތުގައި ވަނިކޮށް, ބެންފީކާއިން ގެނައި އުރުގުއޭގެ ފޯވާޑް ނޫނޭޒްއަށް ސީދާ ރަތްކާޑެއް ދެއްކުމެވެ. ލިވަޕޫލަށް ބަދަލުވެ ފުރަތަމަ ކުޅުނު ދެ މެޗުގައި ތަފާތު ދައްކާ ލަނޑުޖެހި ނޫނޭޒްއަށް ރަތްކާޑް ދެއްކީ ކްރިސްޓަލް ޕެލަސްގެ ޑިފެންޑަރު އެންޑަރސެން މޭގައި ބޮލުން ޖެހުމުންނެވެ. މިއީ ނޫނޭޒް ލިވަޕޫލް ދަނޑުގައި ކުޅުނު ފުރަތަމަ މެޗެވެ. އޭރު ކްރިސްޓަލް ޕެލަސް އޮތީ ފުރަތަމަ ހާފްގައި ވިލްފްރެޑް ޒަހާ ޖެހި ލަނޑުން ކުރީގައެވެ.

ނޫނޭޒްއަށް ރަތްކާޑް ދެއްކިތާ ހަތަރު މިނިޓްފަހުން ލިވަޕޫލަށް ނަތީޖާ ހަމަހަމަކޮށްދިނީ ލުއިސް ޑިއާޒްއެވެ. 57 ވަނަ މިނިޓްގައި ދެއްކި ރަތްކާޑްގެ ސަބަބުން ލިވަޕޫލުން މެޗުގެ ދެވަނަ ހާފްގެ ބޮޑުބައި ކުޅުނީ 10 ކުޅުންތެރިންނާއެކުއެވެ.

ލިވަޕޫލް އޮތީ ދެ މެޗުން ދެ ޕޮއިންޓާއެކު 12 ވަނާގައެވެ.