ފަރަށް އެރި އޭއެމް އާގަމް ސަތޭކަ މިލިޔަނުން ޖޫރިމަނާކޮށްފި
15 އޯގަސްޓު 2022 | ހޯމަ 09:31ގެއްލުންތައް ބަލައި ވަޒަންކޮށް ކަނޑައެޅުނު ޖުމްލަ ޖޫރިމަނާއާއި ބަދަލުގެ އަދަދަކީ 152،569،800
ވ. އަތޮޅުގެ މާގުޅި ފަޅުގެ އުތުރުން އޮންނަ ކަނޑުއޮޅިން ވަނުމުގެ ތެރޭގައި އޭއެމް އާގަމް ނަކަމަށް ކިޔާ ބާޖެއް ފަަރަށް އަރައި ލިބުނު ގެއްލުން
ވ. އަތޮޅުގެ މާގުޅި ފަޅުގެ އުތުރުން އޮންނަ ކަނޑުއޮޅިން ވަނުމުގެ ތެރޭގައި އޭއެމް އާގަމް ނަކަމަށް ކިޔާ ބާޖެއް ފަަރަށް އަރައި ލިބުނު ގެއްލުމުގެ ބަދަލުގައި 100 މިލިއަން ރުފިޔާއިން އެ ބާޖުގެ ވެރިފަރާތް ޖޫރިމަނާކޮށްފިއެވެ.
މިކަމާއި ގުޅޭގޮތުން އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އިން ބުނީ 1 މެއި 2022 ގައި ފަރަށް އެރި މި ބާޖަކީ އިންޑިއާއިން ހިލަ ހިފައިގެން އޭއެމް އަލްޕިޓި ނަމަކަށް ކިޔާ ބޯޓާއެކު ވ. ރަކީދޫއަށް ދަތުރުކުރި ބާޖެއް ކަމަށެވެ.
މި ބާޖު ފަރަށް އެރުމާއި ފުޅިގެން އެ ފަރުގެ މާހައުލަށް ލިބުނު ގެއްލުންތަކަށް ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނޫނުގެ ދަށުން ހެދިފައިވާ ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދުގެ ދަށުން 100 މިލިއަން ދިވެހި ރުފިޔާއިން އެ އުޅަނދުގެ ވެރިފަރާތް ޖޫރިމަނާކޮށްފައިވާ ކަމަށެވެ.
އަދި އެ އެޖެންސިއަށް 30 ދުވަހުގެ ތެރޭގައި އެ ޖޫރިމަނާގެ ފައިސާ ދެއްކުމަށް އެ އުޅަނދުގެ ދިވެހިރާއްޖޭގެ އެޖެންޓު، މެއިންލޭންޑް ޝިޕިންގ ޕްރައިވެޓް ލިމިޓެޑަށް 15 އޮގަސްޓުގައި އަންގާފައިވާ ކަމަށެވެ.
މި ބާޖު ފުންކޮށް ނިމުމުން އެ ސަރަހައްދުގެ ތިމާވެއްޓަށް ލިބުނު ގެއްލުންތައް ބެލުމަށް އެ އެޖެންސީއާއި އެ އުޅަނދުގެ ވެރިފަރާތް ގުޅިގެން އެ ސަރަހައްދު ބަލައި ޖޮއިންޓް-ސަރވޭއެއް ކުރެވިފައިވާ ކަމަށެވެ. އެގޮތުން ބެލި ބެލުމުން އެ ފަރުގެ 6054 އަކަމީޓަރުގެ ސަރަހައްދަކަށް ބޮޑެތި ގެއްލުންތަކެއް ލިބިފައިވާކަން ފާހަގަކުރެވިފައިވާ ކަމަށެވެ.
އަދި ތިމާވެއްޓަށް ގެއްލުން ލިބުނު ގެއްލުންތައް ބަލައި ވަޒަންކޮށް ކަނޑައެޅުނު ޖުމްލަ ޖޫރިމަނާއާއި ބަދަލުގެ އަދަދަކީ 152،569،800 (ސަތޭކަ ފަންސާސް ދެމިލިއަން ފަސްލައްކަ ފަސްދޮޅަށް ނުވަހާސް އަށްސަތޭކަ) ރުފިޔާއެވެ. ނަމަވެސް ގާނޫނުގެ ދަށުން ޖޫރިމަނާގެ ގޮތުގައި ކަނޑައެޅެން އޮންނަ އެންމެ ބޮޑު އަދަދަކީ 100 މިލިއަން ރުފިޔާކަމުގައިވާތީ 100 މިލިއަން ރުފިޔާ ޖޫރިމަނާގެ ގޮތުގައި 30 ދުވަހުގެ ތެރޭގައި އެ އެޖެންސީއަށް ދަައްކާ ހަލާސްކުރުމަށް ވަނީ އަންގާފައެވެ.
އީޕީއޭއިން ބުނެފައިވަނި ގާނޫނުގެ 10 ވަނަ މާއްދާގެ ދަށުން ބާޖު ފަރަށް އަރައިގެން ފަރަށް ލިބިފައިވާ ގެއްލުމުގެ ބަދަލު ޝަރީއަތް މެދުވެރިކޮށް ހޯދުމުގެ މަސައްކަތް އެޓަރނީ ޖެނެރަލްގެ އޮފީހާއެކުގައި ފެށިފައިވާ ކަމަށެވެ.
