އަފްޣާނިސްތާނުގައި އަންހެނުން ކުރި މުޒާހަރާއެއް ތާލިބާން ހަނގުރާމަވެރިން ރޫޅާލައިފި

އަފްޣާނިސްތާނުގައި އަންހެނުން ނުކުމެ ކުރިޔަށްގެންދިޔަ މުޒާހަރާއެއް ތާލިބާން ހަގުރާމަވެރިން ރޫޅާލައިފިއެވެ. އަންހެނުން މުޒާހަރާކުރުން މިއީ މަދުން ނޫނީ އެގައުމުން ނުފެންނަ މަންޒަރެކެވެ. ތާލިބާން ޖަމާއަތުން އަފްޣާނިސްތާނުގެ ވެރިކަން އަލުން އަތުލިތާ އެއްއަހަރުވާން މިވަނީ ކައިރި ވެފައެވެ.

ހޮނިހިރު ދުވަހު މުޒާހަރާކުރި ސާޅީހަކަށް އަންހެނުން ގޮވާލާފައިވަނީ ތާލިބާންގެ ވެރިކަމުގައި ނިގުޅައިގެންފައިވާ ހައްގުތައް އަލުން ލިބިދިނުމަށެވެ. ޚާއްސަކޮށް އަންހެނުންނާއި އަންހެންކުދިންނަށް ކިޔެވުމާއި ވަޒީފާއަދާކުރުން ބަންދުކޮށްފައިވާތީ އެކަމާ އަޑުއުފުލަން މަސައްކަތްކޮށްފައިވެއެވެ. ނަމަވެސް ހަތިޔާރުއެޅި ތާލިބާން ސިފައިން ވަނީ ޖައްވަށް ބަޑިޖަހައި މުޒާހަރާ ހުއްޓުވާފައެވެ. އަދި އަންހެނުންގެ މޯބައިލް ފޯނުތައް އަތުލާފައިވެއެވެ. މީގެ އިތުރުން މުޒާހަރާގެ ޚަބަރުތައް ގެނެސްދިން ނޫސް ވެރިންނަށްވެސް ތާލިބާން ސިފައިން ތަކުރާރުކޮށް އަނިޔާކޮށްފައިވާކަމަށްވެއެވެ.

މުޒާހަރާކުރި އަންހެނުން ބޭނުންކުރި ޝިއާރަކީ "އޮގަސްޓް 15އަކީ ކަޅު ދުވަހެއް" މި ޝިއާރެވެ. އެދުވަހަކީ އަފްޣާނިސްތާނުގެ ވެރިކަމުން ފައްސާލިތާ 20 އަހަރު ފަހުން އަނެއްކާ ތާލިބާން ޖަމާއަތުން އެގައުމުގެ ވެރިކަން ފޭރިގަތް ދުވަހެވެ.

ތާލިބާނުން އަލުން ވެރިކަމަށް އައުމަށްފަހު ފުރަތަމަ ބުނެފައިވަނީ އަންހެނުންނަށް މިނިވަންކަން ދޭނެކަމަށެވެ. ނަމަވެސް ކުއްލިއަކަށް ވަނީ އަންހެންކުދިންގެ ސެކަންޑަރީ އެޑިޔުކޭޝަން މަނާކޮށް، އަދި ބުރުގާއެޅުން މަޖްބޫރުކޮށްފައެވެ. އަދި ގިނަ ދާއިރާތަކުގައި އަންހެނުން ވަޒީފާ އަދާކުރުންވެސް ވަނީ މަނާކޮށްފައެވެ.