ސަލްމާން ރުޝްދީ ވެންޓިލޭޓަރުގައި، އެއް ލޮލުގެ ފެނުން ގެއްލިދާނެ: އޭޖެންޓް

އިސްލާމް ދީނަށް ފާޑުކިޔައި ލިޔުންތަކެއް ލިޔެފައިވާ އިނގިރޭސިވިލާތުގެ ލިޔުންތެރިޔާ، ސަލްމާން ރުޝްދީއަށް ހުކުރު ދުވަހު ދިން ހަމަލާއާއި ގުޅިގެން އޭނާއަށް ފަރުވާދެމުން ދަނީ ވެންޓިލޭޓަރުގައި ކަމަށް އޭނާގެ އޭޖެންޓް އެންޑްރޫ ވައިލީ ބުނެފިއެވެ.

ވައިލީ ނެރުނު ސްޓޭޓްމަންޓް އެއްގައި ބުނީ ރުޝްދީގެ ހާލު ރަނގަޅު ނޫން ކަމަށެވެ. އޭނާއަށް ދިން ހަމަލާއާއި ގުޅިގެން އަތުގެ ނާރުތައް ހަލާކުވެފައިވާ ކަމަށާއި ލިވަރއަށް ވަޅި ހެރުމުން ލިވަރ އަށްވެސް ގެއްލުން ލިބިފައިވާ ކަމަށެވެ. އަދި އޭނާގެ އެއް ލޮލުގެ ފެނުން ގެއްލިގެންދިއުން ގާތް ކަމަށް ވެސް އޭނާގެ އޭޖެންޓް ވަނީ ބުނެފައެވެ.

ރުޝްދީއަށް ހަމަލާ ދީފައިވަނީ ހުކުރު ދުވަހު އެމެރިކާގެ ޝަޓޯކުވާ އިންސްޓިޓިއުޝަން ގައި ލެކްޗަރއެއް ދިނުމަށް ގޮސް ހުއްޓައެވެ. އޭނާސްޓޭޖަށް އަރަން ދިޔަ ވަގުތު މީހަކު ފަހަތުން އައިސް ހަމަލާ ދިން ކަމަށް މަންޒަރު ދުށް މީހުން ބޭރުގެ މީޑިއާތަކަށް ކިޔައިދީފައިވާއިރު އެމެރިކާގެ ފުލުހުން ވެސް ވަނީ އޭނާއާށް ވަޅިން ހަމަލާ ދީފައިވާ ކަމަށްބުނެފައެވެ.

އެމެރިކާގެ ފުލުހުންނާއި ހަވަލާދީ ބޭރުގެ މީޑިއާތަކުގައި ބުނެފައިވަނީ އޭނާ ކަރަށް މަދުވެގެން އެއް ފަހަރު ވަޅި ހަރާފައިވާ ކަމަށެވެ. އަދި ބަނޑަށް ވެސް މަދުވެގެން އެއް ފަހަރު ވަޅި ހަރާފައިވާ ކަމަށް ވެސް ފުލުހުން ވަނީ ބުނެފައެވެ. އޭނާއަށް ހަމަލާ ދިނުމުން އަވަސް ފަރުވާ ދިނުމަށް ހޮސްޕިޓަލަށް ގެންދިޔައީ ހެލިކަޕްޓަރުގައެވެ.

އޭނާ ހޮސްޕިޓަލް އަށް ގެންދިޔުމުށް ގިނަ އަދަދެއްގެ ސަރޖަރީތައް ހައްދާފައިވާ ކަމަށް ވެސް ބޭރުގެ މީޑިއާތަކުން ރިޕޯޓް ކުރެއެވެ.

ރުޝްދީއަށް ހަމަލާދިން މީހާ ވަނީ އެ ސަރަހައްދުން އަތުލައިގެންފައެވެ. އެގޮތުން، އޭނާއަށް ހަމަލާދިން ކަމުުގެ ތުހުމަތުގައި ހައްޔަރު ކޮށްފައިވަނީ އެމެރިކާގެ ނިއުޖަރޒީއަށް ނިސްބަތްވާ އުމުރުން 24 އަހަރުގެ ހާދީ މަތާރު އެވެ. އަދި މިހާތަނަށް ހަމަލާގެ ފަހަތުގައިވާ ސަބަބެއް ހޯދިފައިނުވާ ކަމަށާއި ނަމަވެސް މަތާރު މަސައްކަތް ކުރީ އެކަނި ކަމަށް ބެލެވޭ ކަމަށް އެމެރިކާގެ ފުލުހުން ވަނީ ބުނެފައެވެ.

ރުޝްދީއަށް ހަމަލާ ދިން ވަގުތު އެތަނުގައި ހަރަކާތްތެރިވި އެސޯސިއޭޓް ޕްރެސްގެ ނޫސްވެރިޔަކު ބުނި ގޮތުގައި ރުޝްދީއަށް 6 ނޫނީ8 ފަހަރު ވަޅިން ހަމަލާދިނެވެ. އޭނާ އަށްހަމަލާ ދޭން ފެށުމުން އެތަނުގައި ތިބި މީހުން ތިބީ ހަދާނެ ގޮތެއް ނޭނގިފައި ކަމަށް ވެސް އޭނާ ބުންޏެވެ.

އިސްލާމް ދީނަށް ފާޑުކިޔައި، ޚިޔާލު ފާޅު ކުރުމުގެ މިނިވަންކަމަށް ވަކާލާތު ކުރާ ރުޝްދީ މަޝްހުރުވެފައިވަނީ އޭނާގެ "ދަ ސެޓެނިކް ވަރސަސް" ފޮތާ ގުޅިގެންނެވެ. އެ ފޮތްމުސްލިމް ބައެއް ޤައުމުތަކުން މަނާ ކޮށްފައިވާއިރު އެ ފޮތާ ގުޅިގެން 1980 ވަނަ އަހަރު އީރާނުން ވަނީ އޭނާ މަރާލަން ޖެހޭ ކަމަށް ބުނެ ފަތުވާ ވެސް ނެރެފައެވެ.