މިއަހަރުގެ ދެވަނަ ކުއާޓަރގައި އާމްދަނީގެ ގޮތުގައި އާރްޑީސީއަށް 104 މިލިއަން ރުފިޔާ
ފައިދާގެ ގޮތުގައި 15.20 މިލިއަން ރުފިޔާ ލިބުނު
ރޯޑް ޑިވެލޮޕްމަންޓު ކޯޕަރޭޝަން (އާރްޑީސީ) ގެ މެނޭޖިންގ ޑިރެކްޓަރ މޫސާ އަލީ މަނިކު (މޫކޭ)
މިއަހަރުގެ ދެވަނަ ކުއާޓަރުގައި ރޯޑް ޑިވެލޮޕްމަންޓު ކޯޕަރޭޝަން (އާރްޑީސީ) އަށް އާމްދަނީގެ ގޮތުގައި 104 މިލިއަން ރުފިޔާ ލިބިއްޖެއެވެ.
އާރްޑީސީ އިން އާންމު ކޮށްފައިވާ ރިޕޯޓުން ދައްކާ ގޮތުން ފުރަތަމަ ކުއާޓަރގައި 69.18 މިލިއަން ރުފިޔާ ލިބުނުއިރު ދެވަނަ ކުއާޓަރގައި 104.84 މިލިއަން ރުފިޔާ ވަނީ ލިބިފައެވެ. އެކުންފުންޏަށް ފައިދާގެ ގޮތުގައި 15.20 މިލިއަން ރުފިޔާ ވަނީ ލިބިފައެވެ. މިއީ މިއަހަރުގެ ފުރަތަމަ ކުއާޓަރުގައި އެކުންފުންޏަށް ލިބުނު މިންވަރަށްވުރެ 52 ޕަސެންޓު އިތުރުވުމެކެވެ.
އާރްޑީސީ އިން ބުނީ އެކުންފުނިން މިއަހަރު ނިންމާލާނީ ފައިދާއާއި އެކު ކަމަށެވެ. އަދި މިއަހަރަށް ކަނޑައަޅާފައިވާ އަމާޒުތައް ވެސް އަހަރު ނިމެންވާއިރަށް ހާސިލް ކުރާނެ ކަމަށް އެކުންފުނިން ބުނެއެވެ.
އާރްޑީސީއަކީ ރާއްޖޭގެ އެކި ރަށްރަށުގެ މަގު ހެދުމުގެ މަގުސަދުގައި ރައީސުލްޖުމްހޫރިއްޔާ އިބްރާހީމް މުޙައްމަދު ސާލިހް އުފައްދަވާފައިވާ ކުންފުންޏެއްކަމަށާއި، އާރްޑީސީއާއި އެކު އުފެދުނު އެހެން ކުންފުނިތަކާއި އަޅާ ބަލާއިރު، އާރްޑީސީން ބޮޑެތި ކުރިއެރުންތަކެއް ހޯދާފައިވާ ކަމަށް އެ ކުންފުނީގެ މެނޭޖިންގ ޑިރެކްޓަރ މޫސާ އަލީ މަނިކު (މޫކޭ) ވަނީ މީގެކުރިން ރާއްޖެޓީވީގެ ޕްރޮގްރާމެއްގައި ބައިވެރިވެވަޑައިގެން ވިދާޅުވެފައެވެ.
މޫކޭ ވިދާޅުވީ، ކުރިޔަށް އޮތް އަހަރުތަކުގައި އާރްޑީސީ އިން އިތުރު ކާމިޔާބީތައް ހޯދާނެކަމަށާއި، އެކަމަށް ގަދައަޅާ މަސައްކަތްކުރާނެކަމަށެވެ. އަދި އާރްޑީސީގެ ސްޓާފުންނަކީ އެއް އަޒުމެއްގައި، ވަރުބަލިކަމެއްނެތި އެއް ޓީމެއްގެގޮތުގައި މަސައްކަތްކުރާ ސްޓާފުންތަކެއްކަމަށާއި، ކުރިޔަށް އޮތް ދުވަސްތަކުގައި އާރްޑީސީ އިން ކަނޑައެޅި ލަނޑުދަނޑިތައް ހާސިލްކުރާނެކަމަށެވެ.
