ވެރިކަމުގެ ނިޒާމް ބަދަލުކުރުމަށް ފެންނަ ނުފެންނަ ވޯޓަކަށް އެހުމަށް ރައީސް ނަޝީދު ގަރާރެއް ހުށަހަޅުއްވައިފި
އެހެން ޕާޓީތަކަކާއެކު އިއްތިހާދުވުމުން، ސަރުކާރު ހިންގުން ގަޑުބަޑުވެ، ރައްޔިތުންނަށް ވެފައިވާ ވައުދުތައް ފުއްދާނުދެވި، ސަރުކާރާމެދު ޕާޓީގެ އާންމު މެންބަރުންގެ އިތުބާރު ކުޑަވަމުންދޭ
މިއަހަރަށް ރިޔާސީ ބަޔާން އިއްވުމަށް ބޭއްވެވި ޖަލްސާގެ ތެރެއިން
ރާއްޖޭގެ ވެރިކަމުގެ ނިޒާމް ބަދަލުކުރުމަށް އާންމު ފެންނަ ނުފެންނަ ވޯޓަކަށް އެހުމުގެ ގަރާރެއް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ރައީސް، ރައީސް މުހައްމަދު ނަޝީދު ހުށަހަޅުއްވައިފިއެވެ.
މި މަހުގެ 19 އިން 21 އަށް ބާއްވަން ތާވަލުކޮށްފައިވާ އެމްޑީޕީގެ 4 ވަނަ ކޮންގްރެސްއަށް ރައީސް ނަޝީދު ހުށަހެޅުއްވި ގަރާރުގައި ވިދާޅުވެފައިވަނީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީން ދިވެހި ދައުލަތުގެ ވެރިކަމުގެ ނިޒާމާއި، އިންތިހާބީ އުސޫލުތައް ކަނޑައަޅާފައިވާ ގޮތުން، ރިޔާސީ އިންތިހާބެއްގައި އެއް ޕާޓީއިން އެ އިންތިހާބު ކާމިޔާބުކޮށް، ސާފު ދާސާ މުތުލަގު ބާރުތަކަކާއެކު ސަރުކާރު ހިންގުމަށް އެއް ޕާޓީއަށް އާދެވުމަކީ ނާދިރުކަމަށްވެފައިވާ ކަމަށެވެ.
އަދި ވެރިކަމުގެ ނިޒާމާއި އިންތިހާބީ އުސޫލުތައް ރޭވިފައި އޮތްގޮތުން، ސަރުކާރުގެ އެންމެ އިސްފަރާތް (ރައީސުލްޖުމްހޫރިއްޔާ) ހޮވުމަށް ބާއްވާ އިންތިހާބު ކާމިޔާބުކުރުމަށްޓަކައި، އެ ޕާޓީން އެހެން ޕާޓީތަކަކާއެކު އިއްތިހާދުވުމުން، ސަރުކާރު ހިންގުން ގަޑުބަޑުވެ، އެ ޕާޓީން ރައްޔިތުންނަށް ވެފައިވާ ވައުދުތައް ފުއްދާނުދެވި، ސަރުކާރާމެދު ޕާޓީގެ އާންމު މެންބަރުންގެ އިތުބާރު ކުޑަވަމުންދާ ކަމަށެވެ.
އަދި ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއަށް ގެންނަ އިސްލާހުތަކުގެ ތެރޭގައި، ސަރުކާރުގެ އެންމެ އިސް ވެރިޔާއަކީ ރައްޔިތުންގެ މަޖިލީހުގެ މެންބަރުންގެ ތެރެއިން އިންތިހާބުކުރާ އެ މަޖިލީހުގެ އަގްލަބިއްޔަތު ލިބިފައިވާ ބޮޑުވަޒީރު ކަމުގައި ކަނޑައެޅުމަށާއި، އަދި ދައުލަތުގެ އެންމެ މަތީ ވެރިއަކީ ރައީސުލްޖުމްހޫރިއްޔާ ކަމަށާއި، ރައީސުލްޖުމްހޫރިއްޔާއަކު ކަނޑައަޅާނީ ރައްޔިތުންގެ މެދުގައި ނަގާ ރިޔާސީ އިންތިހާބުގެ ވޯޓުގައި އެންމެ ގިނަ ވޯޓު ލިބޭ މީހާ ކަމުގައި ކަނޑައެޅުމަށެވެ.
އަދި ދައުލަތުގެ އެންމެ މަތީވެރިޔާގެ ބާރުތަކާއި، ބޮޑުވަޒީރަކު ސަރުކާރު ހިންގާއިރު ރައީސުލްޖުމްހޫރިއްޔާއަށް ލިބިދޭ ބާރުތަކާއި އަދާކުރަންޖެހޭ މަސްއޫލިއްޔަތުތައް ކަނޑައެޅުމަށާއި، އަދި ރައްޔިތުންގެ މަޖިލީހުގައި ދާއިރާތުގެ މެންބަރުން ތަމްސީލުވާނޭ ގޮތްތަކާއި، އަދި ރައްޔިތުންގެ މަޖިލީހުގެ އިންތިހާބުގައި ސިޔާސީ ޕާޓީތަކުން ހޯދާ ވޯޓުގެ ނިސްބަތަށް ބަލައި ޕާޓީއަށް ހާއްސަކުރެވޭ (ނެޝަނަލް ލިސްޓް) ގެ މެންބަރުން ހިމެނޭ އުސޫލު ކަނޑައެޅުމަށް ގަރާރުގައި ވަނީ ވިދާޅުވެފައެވެ.
މީގެ އިތުރުން ރައްޔިތުންގެ މަޖިލީހުގެ މެންބަރުންގެ ޖުމްލަ އަދަދު 87 މެންބަރުންނަށްވުރެ އިތުރު ނުވާނޭ ހަމައަކުން ރައްޔިތުންގެ މަޖިލީހުގެ ޖުމްލަ އަދަދު ހިފެހެއްޓިފައި އޮތުމާއި، ސަރުކާރު ހިންގަނީ ރައްޔިތުންގެ މަޖިލީހުގެ މެންބަރުންގެ ތެރެއިން އެކުލަވާލެވޭ ވަޒީރުންގެ މަޖިލީހަކުން ކަމުގައި ކަނޑައެޅުމަށާއި، އަދި ސުޕްރީމްކޯޓުގެ ފަނޑިޔާރުންގެ އަދަދަކީ 5 ފަނޑިޔާރުން ކަމުގައި ކަނޑައެޅުމަށާއި، އަދި ޖުޑީޝަލް ސަރވިސް ކޮމިޝަން އެކުލެވިގެންވާ ގޮތަށް ގެންނަ ބަދަލުތައް ކަނޑައެޅުމަށާއި، އަދި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު އަސާސީ ސިފަތައް ގާނޫނު އަސާސީގައި ކަނޑައެޅުމާއެކު، މި ކަންކަން ގާނޫނުއަސާސީގައި ހިމަނައި ބަޔާން ކުުރުމަށް ގަރާރުގައި އެދިފައިވެއެވެ.
ގަރާރުގައި ރައީސް ނަޝީދު ވިދާޅުވެފައިވަނީ ދިވެހިރާއްޖޭގެ ވެރިކަމުގެ ނިޒާމު ބަދަލުކުރުމަށް ފެންނަ ނުފެންނަ ވޯޓަކަށް އެހުމަށާއި، އެ ވޯޓުގެ ނަތީޖާއަކީ ދިވެހިރާއްޖޭގައި އޮންނަން ފެންނަ ވެރިކަމުގެ ނިޒާމަކީ ބަރުލަމާނީ ނިޒާމު ކަމަށް ފާސްވެއްޖެ ނަމަ، މި ބަދަލުތައް ގާނޫނު އަސާސީއަށް ގެނައުމަށް ގަރާރުގައި ވަނީ ވިދާޅުވެފައެވެ.
ރައީސް ނަޝީދު މި ގަރާރު ހުށަހަޅުއްވާފައިވަނީ އެމްޑީޕީގެ ނައިބްރައީސް މުހައްމަދު ޝިފާޒުގެ ތާއީދާއެކުއެވެ.
