ކ.ތުލުސްދޫ ކައުންސިލުން ކާބޯތެކެތީގެ ކުނި އަޅާ ޑަސްބިންތަކުގައިވާ ކުނިތައް މޫދަށް އަޅަމުންދަނީ ކުނި މެނޭޖުކުރުމާބެހޭ ގަވާއިދާ ކަނޑައެޅިގެން ޚިލާފަށްކަމަށްވާތީ، އެކައުންސިލު 45،000 ރުފިޔާއިން ޖޫރިމަނާކޮށްފިއެވެ.

އެކަމާއި ގުޅޭގޮތުން އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ)ން ބުނީ ކ. ތުލުސްދޫގެ ކުނި އަޅާ ޑަސްބިންގައިވާ ކުނިތައް މޫދަށް އެޅުން ވަގުތުން ހުއްޓާލުމަށާއި، ތުލުސްދޫ ކައުންސިލްގެ އިދާރާގެ މައްޗަށް އަޅާ އިދާރީ ފިޔަވަޅެއްގެ ގޮތުގައި ބުދަ ދުވަހުން ފެށިގެން ސަރުކާރު ބަންދު ދުވަސްތައް ހިމަނައިގެން 30 (ތިރީސް) ދުވަހުގެ ތެރޭގައި ރަށު ފެންވަރުގައި ކުނި މެނޭޖްކުރުމުގެ ޕްލޭން ތައްޔާރުކޮށް އީޕީއޭ އާ ޙިއްސާކުރުމަށް އަންގާފައިވާކަމަށެވެ. އަދި ކުނި މެނޭޖުކުރުމާބެހޭ ގަވާއިދުގެ ދަށުން ކަނޑައަޅާފައިވާ މިންގަނޑާއި ޚިލާފަށް ކުނި މެނޭޖްކުރުމުގެ މަސައްކަތް ކޮށްފައިވާތީ، ސާޅީސް ފަސްހާސް ރުފިޔާ އިން ޖޫރިމަނާގެ ގޮތުގައި އެޖެންސީއިން ކަނޑައަޅައި ސަރުކާރު ބަންދު ދުވަސްތައް ނުހިމަނައި 30 ދުވަހުގެ ތެރޭގައި ޖޫރިމަނާ ފައިސާ ދެއްކުމަށް އަންގާފައިވާކަމަށެވެ.

އަދި ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމަށްޓައި ހެދިފައިވާ އެންމެހާ ޤާނޫނާއި ގަވާއިދުތަކަށް ބޯލަބައި ކިޔަމަންތެރިވެ، އެއާއި ޚިލާފު އެންމެހާ ޢަމަލުތަކަކުން ދުރުވެ ތިބުމަށް މާލެ އަތޮޅު ތުލުސްދޫ ކައުންސިލްގެ އިދާރާއަށް ވަނީ އެންގާފައި ކަމަށް އީޕީއޭން ބުނެއެވެ.

ތުލުސްދޫ ކައުންސިލުން އެ ރަށުގައި ބަހައްޓާފައި ހުންނަ ޑަސްބިންތައް މޫދަށް ހުސްކުރާ މަންޒަރު ފެންނަ ވީޑިއޯތަކެއް ދާދިފަހުން ވަނީ އާންމުވެފައެވެ.