1978 ގައި ނުކުތް މިޔުޒިކަލް "ގްރީސް" ފިލްމުން ދުނިޔޭގެ މަޝްހޫރުކަމަށް އައި ލަވަކިޔުންތެރިޔާ އޮލީވިޔާ ނިއުޓަން ޖޯން، އުމުރުން 73 އަހަރުގައި މަރުވެއްޖެ އެވެ. އިނގިރޭސިވިލާތަށް އުފަން، އޮސްޓްރޭލިޔާގެ ލަވަކިޔުންތެރިޔާ އަދި އެކްޓްރެސް މަރުވީ ކެންސަރު ބަލީގައެވެ.
އޮލީވިޔާ ނިއުޓަން ޖޯންގެ މަރާ ގުޅިގެން އޭނާގެ ފޭނުންނާ މިޔުޒިކްއާއި ފިލްމްގެ ދާއިރާގެ މަޝްހޫރު އެކި ފަރާތްތަކުން ދަނީ ތައުޒިޔާ ފާޅުކުރަމުންނެވެ. އޮލީވިޔާއާ އެކު ގްރީސް މިޔުޒިކަލްގައި އުޅުނު ޖޯން ޓްރަވޮލްޓާ ވެސް ވަނީ ތައުރީފުން ފުރިގެންވާ ބަސްތަކުން ޓްވީޓެއް ކޮށްފައެވެ. ޖޯންއާ އެކު އޮލީވިޔާ ފަހުންވެސް ވަނީ ވަރަށް ކާމިޔާބު ދެފިލްމު ހަދާފައެވެ. އެއަށް ފަހު އޮލީވިޔާ ވަނީ ކަންޓްރީ ސިންގަރއެއްގެ ގޮތުންވެސް މަޝްހޫރުކަން ހޯދާ ކާމިޔާބު އެތައް މިލިއަން އަލްބަމްތަކެއް ނެރެފައެވެ.
އޮލީވިޔާ ނިއުޓަން ޖޯން މަރުވެފައިވަނީ ކެލިފޯނިޔާގައި ހުންނަ އޭނާގެ ގޭގައި އާއިލާ މީހުންނާއި ބައެއް ގާތް ރައްޓެހިން އޭނަ ކައިރީގައި ތިބެގެންނެވެ.
އޭނާ ކެންސަރު ބައްޔަށް ޑަޔަގްނޯސް ވީ 1992 ވަނަ އަހަރުއެވެ. އެއަށް ފަހު ކެންސަރަށް ފަރުވާ ހޯދުމަށް ކެންސަރ ރިސަރޗްގެ މަސައްކަތް ހަލުވި ކުރުމަށް އޭނާ ވަރަށް ބޮޑަށް ކެމްޕެއިން ކޮށްފައިވެއެވެ. އަދި އެކަމަށް އޮލީވިޔާ ނިއުޓަން ޖޯން ފައުންޑޭޝަންގެ ނަމުގައި އަމިއްލަ ފައުންޑޭޝަނެއް ހަދައިގެންވެސް އައީ މަސައްކަތް ކުރަމުންނެވެ. ކެންސަރު ބަލި މީހުންނަށް ހިތްވަރުދީ އެމީހުންގެ އުންމީދު އައުކޮށްދިނުމަށް ވެސް އޮލީވިޔާ ނިއުޓަން ޖޯން ވަރުބަލި ކަމެއް ނެތި އައީ މަސައްކަތް ކުރަމުންނެވެ. މިކަމުގެ އަގު އިނގިރޭސި ރާނީ ވެސް ވަނީ ވަޒަން ކުރައްވާ 2020 ވަނަ އަހަރު ވަނީ ޑޭމްހުޑްއެއް ދެއްވާފައެވެ.
އޮލީވިޔާ ނިއުޓަން ޖޯން މަރުވުމާއި ގުޅިގެން އޭނާގެ ފިރިމީހާ ޖޯން އީސްޓަރލިންގ ނެރުނު ބަޔާނެއްގައި ބުނެފައިވަނީ އޭނާ މަރުވެފައިވަނީ ހޯމަ ދުވަހު ކަމަށެވެ. އަދި އޭނާ އޮލީވިޔާ ދެކެނީ ތިރީސް އަހަރުވަންދެން އުރަމަތީގެ ކެންސަރާ ދެކޮޅަށް އޭނަކުރި މަސައްކަތުގައި އުންމީދު އަދި ކާމިޔާބުގެ ރަމްޒްގެ ގޮތުގައި ކަމަށެވެ. އޭނާ ދަންނަ އެންމެންވެސް ބުނެފައިވަނީ އޮލީވިޔާ އަކީ މީހުންނަށް ވަރަށް ވެސް ހިތްހެޔޮ، އުފާވެރި މިޒާޖެއްގެ ރަނގަޅު މީހެއްކަމުގައެވެ.
އޮލީވިޔާ ނިއުޓަން ޖޯންއަކީ އަށްޑިހައިގެ އަހަރުތަކުގައި ރާއްޖޭގައި މިޔުޒިކަށް ލޯބިކުރާ މީހުންގެ މެދުގައިވެސް ވަރަށް ބޮޑަށް މަޝްހޫރު ވެގެން ގޮސްފައިވާ ލަވަކިޔުންތެރިއެކެވެ.
