ކޮމަންވެލްތު ގޭމްސްގައި ކުޅުނު މެޗުތަކުން މޮޅުވުމުން އިތުރު ހިތްވަރެއް ލިބުނު: ރަފާ

ކޮމަންވެލްތު ގޭމްސްގައި ކުޅުނު މެޗުތަކުން މޮޅުވުމަކީ، އިސްލާމިކް ސޮލިޑާރިޓީ ގޭމްްސްގައި ރަނގަޅަށް ކުޅުމަށް ލިބުނު ހިތްވަރެއް ކަމަށް ރާއްޖޭގެ ޓޭބަލް ޓެނިސް (ޓީޓީ) ތަރި އައިޝަތު ރަފާ ނާޒިމް ބުނެފިއެވެ.

ކޮމަންވެލްތު ގޭމްސްގައި ވާދަކޮށް ރަފާ ވަނީ ގްރޫޕް ސްޓޭޖްގެ އެއްވަނަ ހޯދައި، ގަދަ 32 ކުޅުންތެރިންގެ ހިމެނޭ ބުރުގައި ވާދަކޮށްފައެވެ. ނަމަވެސް އެ ބުރުގައި ރަފާއަށް ވަނީ ނާކާމިޔާބާ ކުރިމަތިލާން ޖެހިފައެވެ.

ތުރުކީގެ ކޮންޏާގައި ކުރިއަށް އިސްލާމިކް ސޮލިޑާރިޓީ ގޭމްސްގެ ޓީޓީ އަންހެން ސިންގަލްސް އިން ރަފާ ވަނީ ކުއާޓާ ފައިނަލާ ހަމައަށް ދަތުރުކޮށްފައެވެ. މުބާރާތުގެ ކުއާޓާ ފައިނަލަށް ރަފާ ދަތުރުކުރީ ކުޅުނު ފުރަތަމަ މެޗާއި، ގަދަ 16 ގެ މެޗު ކާމިޔާބުކޮށްގެންނެވެ. ފުރަތަމަ މެޗުގައި ރަފާ ނިކުތީ އުޒްބެކިސްތާނުގެ ރޮޒެލީނާ ހާދީޖޭވާއާ ދެކޮޅަށެވެ. ރަފާ ވަނީ 3-0 އިން ރޮޒެލީނާ ބަލިކޮށްފައެވެ.

ގަދަ 16 ގައި ރަފާ ކުޅުނީ، ޖޫބޫޓީގެ އޮމާރް ނާސިމާ ދެކޮޅަށެވެ. މި މެޗު ވެސް ރަފާ ކާމިޔާބުކޮށްފައިވަނީ ސީދާ ތިން ސެޓުންނެވެ. ނަމަވެސް ކުއާޓާ ފައިނަލްގައި ކެމަރޫންގެ ސާރާ ގަބްރިއޭލާއާ ވާދަކޮށް ރަފާ ވަނީ ސީދާ ތިން ސެޓުން ބަލިވެފައެވެ. ރަފާ އަކީ ޓީޓީ އިން އިސްލާމިކް ސޮލިޑާރިޓީ ގޭމްސްގެ ގަދަ އަށެއްގައި ހިމެނުނު ފުރަތަމަ ކުޅުންތެރިޔާއެވެ.

ރަފާ ބުނީ އޭނާގެ ފުރަތަމަ ކޮމަންވެލްތު ގޭމްސްގައި ވާދަކޮށް، ގްރޫޕް ސްޓޭޖް ފަހަނަ އަޅާ ގޮސް، ގަދަ 32 ގައި ކުޅެލަން ލިބުމަކީ ރަނގަޅު ތަޖުރިބާއެއް ކަމަށެވެ. ރަފާ ބުނީ ކޮމަންވެލްތު ގޭމްސްގެ މެޗުތަކުގެ ސަބަބުން އިސްލާމިކް ސޮލިޑާރިޓީ ގޭމްސްގެ މެޗުތަކުގައި ކުޅުމަށް ވަރަށް ބޮޑު ކޮންފިޑެންސް އެއް ލިބުނު ކަމަށެވެ. މީގެ އިތުރުން ރަފާ ބުނީ ކޮމަންވެލްތު ގޭމްސް އާއި އިސްލާމިކް ސޮލީޑަރިޓީ ގޭމްސްގައި ދެއްކުނު ކުޅުމާމެދު ހިތްހަމަ ޖެހޭ ކަމަށެވެ.

އިތުރަށް ވާހަކަ ދައްކަމުން ރަފާ ބުނީ އިސްލާމިކް ސޮލީޑާރިޓީ ގޭމްސްގެ ކުއާޓާ ފައިނަލަކީ މޮޅު ނުވެވޭނެ މެޗެއް ނޫން ކަމަށެވެ.

މީގެ އިތުރުން ރަފާ ބުނީ އާންމު ގޮތެއްގައި ކުޅެލަން ލިބެނީ އޭޝިއަން ގޭމްސް ނުވަތަ ސައުތު އޭޝިއަން ގޭމްސްގައި ކަމަށެވެ. ރަފާ ބުނީ އެ މުބާރާތްތަކުގައި ކުޅޭ ސްޓައިލާއި، މެދު އިރުމަތީގެ ޤައުމުތައް އަދި ޔޫރަޕުގެ ޤައުމުތަކުން ކުޅޭ ސްޓައިލް ތަފާތު ކަމަށެވެ. ނަމަވެސް އެ ސްޓައިލްގެ ކުޅުންތެރިންނާއެކު ވެސް ކުޅެލަން ލިބުމަކީ ރަނގަޅު ތަޖުރިބާއެއް ކަމަށް ރަފާ ބުންޏެވެ.

އިސްލާމިކް ސޮލިޑާރިޓީ ގޭމްސްގައި ދެން އޮތީ ޓީމު އިވެންޓެވެ.