ޔޫކްރެއިނުން ގޮވާން ބަރުކޮށްގެން 4 ބޯޓު ފުރައިފި

ޔޫކްރެއިނުން ގޮވާން ބަރުކޮށްގެން ހަތަރު ބޯޓު ފުރާފައިވާކަމަށް ތުރުކީގެ ޑިފެންސް މިނިސްޓްރީން ބުނެފިއެވެ.

ރޮއިޓަރސްގައި ރިޕޯޓުކޮށްފައިވާގޮތުން، ވެވިފައިވާ އެއްބަސްވުމުގެ ދަށުން އާދިއްތަ ދުވަހު ޔޫކްރެއިނުން ގޮވާން ބަރުކޮށްގެން ހަތަރު ބޯޓު ވަނީ ފުރާފައެވެ.

ޔޫކްރެއިންގެ ގޮވާން އެކްސްޕޯޓްކުރުމުގެ މަސައްކަތް އަލުން ފަށާފައިވާއިރު، އެކަން ބެލުމަށް އިސްތަންބޫލްގައި ވަނީ ޖޮއިންޓް ކޯޑިނޭޝަން ސެންޓަރެއް އެކުލަވާލާފައެވެ. ޖޮއިންޓް ކޯޑިނޭޝަން ސެންޓަރގައި; ރަޝިއާ، ޔޫކްރެއިން، ތުރުކީ އަދި އދ.ގެ މަންދޫބުން ހަރަކާތްތެރިވެއެވެ.

އދ. އާއި ތުރުކީ އިސްވެ އޮވެ، ޔޫކްރެއިނާ ރަޝިއާއާ ދެމެދު އެއްބަސްވުމެއް އެކުލަވާލައި، ޔޫކްރެއިންގެ ގޮވާން އެކްސްޕޯޓްކުރުމުގެ މަސައްކަތް ކުރުމަށް ފަށާފައިވަނީ، ދުނިޔޭގެ ބާޒާރަށް ނެރެވޭ ގޮވާމުގެ ސަޕްލައި މަދުވެ އޭގެ ސަބަބުން ކާނާގެ ކާރިސާއަކާ ކުރިމަތިލާންޖެހިދާނެކަމުގެ އިންޒާރާއެކުއެވެ.

ޖޮއިންޓް ކޯޑިނޭޝަން ސެންޓަރުން ވަނީ، ގޮވާން ބަރުކޮށްގެން ޔޫކްރެއިންގެ ފަސް ބޯޓެއް ފުރުމަށް ހަމަޖެހިފައިވާކަމަށް ބުނެފައެވެ.