ކުރިޔަށް އޮތް ރިޔާސީ އިންތިޚާބުގައި ވާދަކުރައްވާ ދިވެހި ރައްޔިތުންގެ ޕާޓީ (ޑީއާރުޕީ)ގެ ލީޑަރު އަދި ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރުގެ ރަނިންމޭޓަކަށް ފާތުމަތު ޝީރީން އަބްދުﷲ ހަމަޖައްސަވައިފިއެވެ.

ޖާބިރުގެ ރަނިންގމޭޓަކު ކަނޑައެޅުމާއި ގުޅޭގޮތުން ޑީއާރުޕީން ނެރެފައިވާ ގަރާރުގައި ބުނެފައިވަނީ 2023 ވަނަ އަހަރުގެ ރިޔާސީ އިންތިޚާބުގައި ޑީއާރުޕީގެ ފަރާތުން ވާދަކުރައްވާ ކެންޑިޑޭޓަކީ ޕާޓީގެ ލީޑަރ ހ.ތިމާވެށި އަބްދުﷲ ޖާބިރުކަމަށް ކައުންސިލުގެ މެމްބަރުން ކަނޑައަޅާފައިވާކަމަށެވެ. އެކަން ޖާބިރު ގަބޫލުކުރައްވާ ރަނިންގމޭޓަކަށް ޖާބިރު ބޭފުޅަކު ކަނޑައަޅުއްވާފައިވާކަމަށެވެ. ޖާބިރު ވެރިކަމަށް ކުރިމަތިލައްވާނީ އަންހެން ކެނޑިޑޭޓަކާއި އެކުގައި ކަމަށް ވަނީ މީގެކުރިން ވިދާޅުވެފައެވެ.

އެގޮތުން ރަނިންގމޭޓަކަށް ކަނޑައަޅުއްވާފައިވަނީ ރާއްޖޭގެ ސިޔާސީ މައިދާނުގައި މަސައްކަތްކުރައްވާ ތަޖުރިބާ ލިބިވަޑައިގެން ހުންނެވި ކުރިން ރައްޔިތުންގެ މަޖިލީހުގެ ގއ އަތޮޅުގެ މެމްބަރުކަންވެސް ގިނަ ދުވަސްތަކެއްވަންދެން ކުރައްވާފައިވާ މ.ސެރީން ފާތުމަތު ޝީރީން އަބްދުﷲ ކަމަށެވެ.

ޖާބިރު ވަނީ އޭނާގެ ވެރިކަމެއްގައި އެކުލަވާލާނެ ވުޒާރާތަކާއި ވުޒާރާތަކަށް އައްޔަންކުރާ ބޭފުޅުންގެ ނަންތައް ވެސް ހާމަކުރައްވާފައެވެ.

އެގޮތުން ފަތުރުވެރިކަމާއި ބެހޭ ވުޒާރާއަށް ޝިހާމް، ފޮރިން މިނިސްޓަރަކަށް ދިޔާނާ، ބަންޑާރަ ނައިބަކަށް އިޝްރާގް ތައުފީގު، ހޯމް މިނިސްޓަރަކަށް މުހައްމަދު ޖާބިރު، ޑިފެންސް މިނިސްޓަރަކަށް އައިމިނަތު ޖާބިރު، ކެބިނެޓް ސެކެޓްރީއަކަށް އައްޒާމް، އިސްލާމިކް މިނިސްޓަރަކަށް އަފީފް، ޖެންޑަރ މިނިސްޓަރަކަށް ރިސާލަތު، ޕްލޭނިންގ އަދި ހައުސިން މިނިސްޓަރަކަށް ރިޝްފާ، ފިޝަރީޒް މިނިސްޓަރަކަށް އެންސިސް ވަސީމް، އެޑިއުކޭޝަން މިނިސްޓަރަކަށް މަސްއޮޑި ނައީމް އަދި ޓްރާންސްޕޯޓް ސިވިލް އޭވިއޭޝަން އެންޑް ހެރިޓޭޖް މިނިސްޓަރަކަށް މުއާޒް އަބްދުﷲ ޖާބިރު އައްޔަން ކުރައްވާނެކަމަށް ވަނީ ވިދާޅުވެފައެވެ.

ވެރިކަމަށް ކުރިމަތިލައްވަން ނިންމެވީ ސިޔާސީ ނުފޫޒެއް ނެތި ރައްޔިތުންނަށް ޚިދުމަތް ކުރެއްވޭނީ އޭނާއަށް ކަމަށް ޤަބޫލުކުރައްވާތީ ކަމަށް ވެސް އޭނާ ވަނީ ވިދާޅުވެފައެވެ.