ކ. މާލެ
|
6 އޯގަސްޓް 2022 | ހޮނިހިރު 13:36
ހޮސްޕިޓަލުގެ ސްޓްރެޗަރ ހުރި ހާލަތު
ހޮސްޕިޓަލުގެ ސްޓްރެޗަރ ހުރި ހާލަތު
ފޭސްބުކް
މީހަކު މަރުވުމުން
މީހަކު މަރުވުމުގައި ޅ އަތޮޅު ހޮސްޕިޓަލުގެ އިހުމާލެއް އޮތްތޯ ބަލަނީ
 
އިހުސާން މަރުވީ ހާރޓްއެޓޭކެއް ޖެހިގެން، ހުކުރު ދުވަހުގެ ވަގުތެއްގައި
 
އިހުސާންގެ މަރުގައި އެއްވެސް އިހުމާލެއްވާނަމަ ފިޔަވަޅު އަޅާނެކަމަށް ހޮސްޕިޓަލުން ބުނޭ
 
އޭނާ މަރުވީ ފަރުވާ ނުލިބި ލަސްވުމުންކަމަށް އާއިލާއިން ބުނޭ

މިދިޔަ ހުކުރު ދުވަހު ޅ ނައިފަރުގައި މީހަކު މަރުވުމުގައި އެ ރަށުގައި ހުންނަ އަތޮޅު ހޮސްޕިޓަލުގެ އެއްވެސް އިހުމާލެއް ވޭތޯ ބަލަން އިންކުއަރީއެއް ފަށައިފިއެވެ.

އެ ހޮސްޕިޓަލުން ހުކުރު ދުވަހުގެ ރޭ ނެރުނު ބަޔާނެއްގައި ވަނީ، ޅ ނައިފަރު، ހަވީރީ ހިޔާ، އިހުސާން އަލީ މަރުވުމާގުޅިގެން މީޑިއާގައި އާއްމުކޮށްފައިވާ ރިޕޯޓެއްގައި، އެ ހޮސްޕިޓަލުގެ އިހުމާލެއް ވާކަމަށް ބުނެފައިވާތީީ، އެ ދުވަހު ހޮސްޕިޓަލުން އަމަލުކޮށްފައިވާ ގޮތް ބަލައި ހޮސްޕިޓަލުގެ އެއްވެސް އިހުމާލެއްވޭތޯ ބެލުމުގެ އިންކުއަރީއެއް ފަށާފައިވާ ކަމަށެވެ. އަދި މި މައްސަލައާ ގުޅިގެން ފާހަގަކުރެވޭ ކަންކަމުގައި އަމަލުކުރާނެ ވަކިގޮތެއް ބަލައި، އިހުމާލުވެފައިވާނަމަ ފިޔަވަޅުއެޅުމަށް ކަމާބެހޭ އިދާރާތަކަށް ހުށަހަޅާނެ ކަމަށްވެސް ވަނީ ބުނެފައެވެ.

ޅ އަތޮޅު ހޮސްޕިޓަލުން މިހެން ބުނެފައިވަނީ އިހުސާންއަށް އަވަސް ފަރުވާ ދިނުމުގައި އެ ހޮސްޕިޓަލުން އިހުމާލުވެފައިވާކަމަށް އޭނާގެ އާއިލާއިން ބުނެފައިވާތީއެވެ. އޭނާގެ ކޮއްކޮ ފޭސްބުކްގައި ހިއްސާކޮށްފައިވާ ޕޯސްޓެއްގައި ބުނީ، އިހުސާން ބަނދަރުމަތީގައި ހުއްޓައި ހާރޓްއެޓޭކެއް ޖެހިގެން ވެއްޓުމުން ވަގުތުން އެމްބިއުލާންސަށް ގުޅިކަމަށެވެ. ނަމަވެސް ހޮސްޕިޓަލުން ޖަވާބު ނުދިނުމުން ޕިކަޕަކަށް އަރުވައިގެން އޭނާ ގެންދިޔަކަމަށާއި، ހޮސްޕިޓަލަށް ގެންގޮސް އަރުވާނެ ސްޓްރެޗަރއެއް ނުލިބިގެންވެސް އެތައް އިރަކު މަޑުކުރަންޖެހުނު ކަމަށެވެ.

ޅ އަތޮޅު ހޮސްޕިޓަލުގެ އިހުމާލުން މީހަކު މަރުވިކަމަށް އޭނާގެ އާއިލާއިން ބުނޭ - ފޭސްބުކް

އޭނާ ބުނެފައިވާ ގޮތުގައި، އެ ހޮސްޕިޓަލުގެ އެމްބިއުލާންސް ޑްރައިވަރު ކައިރީ ސްޓްރެޗަރއެއް ހޯދަން ބުނުމުން ޖަވާބުގައި ބުނީ ސްޓްރެޗަރގެ މައްޗަށް އޮތީ މުދާ އަރުވާފައި ކަމަށެވެ. އަދި މުދާތައް ނަގައި ސްޓްރެޗަރ ނެރެން ގިނައިރު ވާނެކަމަށް އެ ޑްރައިވަރު ބުނިކަމަށް އިހުސާންގެ ކޮއްކޮ ކުރި ޕޯސްޓުގައި ވަނީ ބުނެފައެވެ.

އެމްބިއުލާންސް ނުލިބުމުން އިހުސާން ގެންދިޔަ ޕިކަޕް - ފޭސްބުކް

ސްޓްރެޗަރއެއް ނުލިބުމުން ޕިކަޕުގައި ތިބި ދެ މީހުންނާއި މަގުމަތިން ދިޔަ ބަންގަލްދޭޝްގެ ރައްޔިތަކު ވެގެން އިމަޖެންސީ ރޫމުން އެނދެއް ބޭރަށް ގެނެސް އިހުސާނު އެތެރެއަށް ގެންދިޔަ ކަމަށާއި، އެވަގުތުވެސް ހޮސްޕިޓަލުގެ އެއްވެސް މީހަކު އެހީނުވާކަމަށް އޭނާ ވަނީ ބުނެފައެވެ.

އިހުސާން އަލީ މަރުވެފައިވަނީ ޅ އަތޮޅުގެ ހޮސްޕިޓަލުގެ އިހުމާލުންކަމަށް އޭނާގެ އާއިލާއިން ބުނެއެވެ. އަދި މި މައްސަލަ މިހާރު ކަމާބެހޭ ފަރާތްތަކަށް ހުށަހަޅާފައިވާ ކަމަށްވެސް އެ އާއިލާއިން ބުނެއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އައިޝަތު ރިޔާޒް
0%
0%
0%
100%
0%
0%
ކޮމެންޓް