ނައިފަރުގައި ކަރަންޓު ކެނޑޭތާ ދެ ދުވަސް، ހައްލެއް ނުލިބޭ
ނައިފަރުގައި ކަރަންޓުގެ ޚިދުމަތް ދެމުން ދަނީ ފެނަކައިން
ނައިފަރު
ދެ ދުވަސް ވީ އިރުވެސް ޅ.ނައިފަރަށް ދިމާވެފައިވާ ކަރަންޓު ކެނޑުމުގެ މައްސަލަ އަށް ހައްލެއް ނުލިބޭ ކަމަށާއި ފެނަކައިން އެކަމަށް އެކަށީގެންވާ ސަމާލުކަމެއް ނުދޭ ކަމަށް ޅ. ނައިފަރު ކައުންސިލުގެ ރައީސް މުޙައްމަދު ރަޝީދު ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަށާއިރު ޕްރޮގްރާމަށް ދެއްވި ބަސްތީގަތުމެއްގައެވެ.
ނައިފަރުގައި ކަރަންޓުގެ ޚިދުމަތް ދެމުން ދަނީ ފެނަކައިންނެވެ. މިދިޔަ ދެ ދުވަހު ވަރަށް ގިނަ ފަހަރު ރަށުން ކަރަންޓު ކެނޑުމުގެ މައްސަލަ ދިމާވެ، އާންމުންގެ ޝަކުވާ ވަނީ ބޮޑުވެފައެވެ. އެގޮތުން ބުރާސްފަތި ދުވަހުގެރޭ ވެސް އެތައް އިރެއް ވަންދެން ރަށުން ކަރަންޓު ކެނޑި ކަނު އަނދިރީގައި އާއްމުން ތިބެން ޖެހުނު ކަމަށް އެ ރަށު ބައެއް މީހުން ވަނީ ބުނެފައެވެ. މި ކަމާއި ގުޅޭގޮތުން ސުވާލު ދެންނެވުމުން، ނައިފަރު ކައުންސިލްގެ ރައީސް ވިދާޅުވީ އެ ރަށަށް ދިމާވެފައިވާ ކަރަންޓު ކެނޑުމުގެ މައްސަލަ އަށް އަދި ހައްލެއް ނުލިބޭ ކަމަށެވެ.
މިދިޔަ ދެ ދުވަހު ވެސް އެ ރަށުގެ އެކި ހިސާބުތަކުން ކަރަންޓު ކެނޑެމުންދާކަމަށާއި އަދި ދެ ގަޑިއިރު ވަރު ކަރަންޓު ލިބުމަށް ފަހު އަނެއްކާވެސް ކަރަންޓު ކެނޑޭކަމަށް އޭނާ ވިދާޅުވިއެވެ. އަދ މި މައްސަަލަ އަށް ދެ ދުވަސްވި އިރު ވެސް އެކަށީގެންވާ ހައްލެއް ނުލިބޭކަމަށް ރަޝީދު ވިދާޅުވިއެވެ. މީގެއިތުރުން އެ ރަށުގެ އާބާދީ އަށް ކަރަންޓުގެ ޚިދުމަތް ފޯރުކޮށްދޭނެ ކެޕޭސިޓީ މިވަގުތު އެ ރަށުގައި ނެތް ކަމަށާއި އަދި އެއްވެސް އިންޖީނަކަށް މައްސަލަ އެއް ޖެހިއްޖެ ނަމަ ރަށުގެ ބޮޑުބަޔަކުން ކަރަންޓު ކެނޑޭކަމަށް ރަޝީދު ވިދާޅުވިއެވެ. އަދި މި މައްސަލަ މެނޭޖުކުރަމުން ދަނީ ރަށުގެ ބޮޑު ބަޔަކުން ކަރަންޓު ކަނޑައިގެން ކަމަށް ވެސް ރަޝީދު ވިދާޅުވިއެވެ.
ކަރަންޓު ކެނޑުމުގެ ސަބަބުން އާއްމުންގެ ވިޔަފާރިތަކަށާއި އާއްމުންނަށް ވަރަށް ބޮޑެތި މައްސަލަތަކެއް ދިމާވާތީ އެކަމާއި މެދު ކަންބޮޑުވުންތައް ހުރިކަަމަށް އޭނާ ވިދާޅުވިއެވެ.
މިއީ މީގެ ކުރިން ވެސް ދިމާވަމުން އައި މައްސަލައަކަށް ވާއިރު މި ކަމަށް އެކަށީގެންވާ ހައްލެއް ގެނައުމަށް މަސައްކަތް ކުރަމުންދާތަން ނުފެންނަ ކަަމަށް ވެސް އޭނާ ވަނީ ވިދާޅުވެފައެވެ. މިހާރު ރަށުގައި ހުރީ 800 މެގަވޯޓުގެ ޖެނަރޭޓަރާއި، 600 މެގަވޯޓް އަދި 700 މެގަވޯޓުގެ ޖަަނަރޭޓަރ ކަމަށް އޭނާ ވިދާޅުވިއެވެ. އެ ޖެނެރޭޓަރުތަކަކީ ފުރިހަމައަށް ކަރަންޓު އުފައްދާދެވޭ ގޮތަށް ހުރި ޖެނެރޭޓަރުތަކެއް ނޫންކަމަށް ވެސް ރަޝީދު ފާހަގަކުރެއްވިއެވެ.
މިހާރުވެސް 6000 މީހުންނަށް ވުރެ ބޮޑު އާބާދީއެއް އޮންނަ ނައިފަރުގައި އަދިވެސް އާބާދީ ދަނީ އިތުރުވަމުންނެވެ. އަދި ކުރިއަށް އޮތީ ރަމަޟާން މަސް ކަމަށްވުމާ އެކު އިތުރަށް ކަރަންޓު ބޭނުން ކުރާނެތީ މިކަމަށް ދުރާލާ ތައްޔާރުވާން ޖެހޭ ކަމަށް ރަޝީދު ވިދާޅުވިއެވެ. ޕީޕީއެމްގެ ކައުންސިލް މެންބަރު ރަޝީދު ވިދާޅުވީ ރަށުގެ ކަރަންޓަށް ދިމާވެފައިވާ މައްސަލަ ހައްލުކުރުމަށް މި ވަގުތު މަސައްކަތް ކުރަމުންދާ ކަމަށެވެ. އެހެންނަމަވެސް އެ ރަށުގެ ކަރަންޓުގެ މައްސަލަ އަށް ދާއިމީ ހައްލެއް ގެނައުމަށް އުންމީދީ މަސައްކަތްތަކެއް ނުކުރެވޭ ކަމަށް އޭނާ ވިދާޅުވިއެވެ.
