ޖޫން މަހު %80 މައްސަލަ ޕީޖީ އޮފީހަށް ސާބިތުކުރެވުނު
ޖުމުލަ 271 ދައުވާއެއް ޖޫން މަހު ކޯޓުތަކަށް ހުށަހެޅިފައިވޭ
ޖޫން މަހު 80 އިންސައްތަ މައްސަލަ ސާބިތު ކުރެވުނުކަމަށް ޕީޖީ އޮފީހުގެ ތަފާސްހިސާބުތަކުން ދައްކާ
ޕްރޮސެކިއުޓަރ ޖެނެރަލް އޮފީސް (ޕީޖީ)ން ދައުވާކޮށްފައިވާ މައްސަލަތަކުގެ ތެރެއިން ޖޫން މަހު 80 އިންސައްތަ މައްސަލަ ސާބިތުކުރެވުނު ކަމަށް އެ އޮފީހުގެ ތަފާސްހިސާބުތަކުން ދައްކައިފިއެވެ.
ޕީޖީ އޮފީހުގެ ތަފާސްހިސާބުތައް ދައްކާގޮތުން، ޖޫން މަހު 281 މައްސަލަ ޑިއުޓީ ޕްރޮސެކިއުޝަނަށް ހުށަހެޅިފައިވެއެވެ. އެގޮތުން ޖޫން މަހު ފުލުހުން ވަނީ 272 މައްސަލައެއް ޕީޖީ އޮފީހުގެ ޑިއުޓީ ޕްރޮސެކިއުޝަނަށް ހުށައަޅާފައެވެ. އެޗްއާރްސީއެމުންވެސް 5 މައްސަލައެއް ހުށައަޅާފައިވާއިރު، އޭސީސީން 4 މައްސަލައެއް ހުށައަޅާފައިވެއެވެ.
ޖޫން މަހު އެންމެ ގިނަ ދައުވާ ހުށަހެޅިފައިވަނީ ކްރިމިނަލް ކޯޓަށެވެ. އެގޮތުން ކްރިމިނަލް ކޯޓަށް 78 ދައުވާއެއް ހުށަހެޅިފައިވާއިރު، ޑްރަގް ކޯޓަށް 49 ދައުވާއެއް، އަދި ހުޅުމާލޭ މެޖިސްޓްރޭޓް ކޯޓަށް 16 ދައުވާއެއް ހުށަހެޅިފައިވެއެވެ.
ޕީޖީ އޮފީހުން މައުލޫމާތުދޭގޮތުގައި ޖުމުލަ 271 ދައުވާއެއް ޖޫން މަހު ކޯޓުތަކަށް ހުށަހެޅިފައިވެއެވެ. އޭގެ ތެރޭގައި ތަކުރާރުކޮށް ހުށައެޅުނު 104 މައްސަލައަކާއި އަލަށް ދައުވާ ކުރެވުނު 167 މައްސަލައެއް ހިމެނެއެވެ.
އޭގެ ތެރެއިން އެންމެ ގިނައީ މަސްތުވާތަކެއްޗާ ގުޅުންހުރި ދައުވާއެވެ. އެގޮތުން މަސްތުވާތަކެތި ބޭނުން ކުރުމުގެ 70 ދައުވާ، މަސްތުވާތަކެތި ޓްރެފިކް ކުރުމުގެ 37 ދައުވާ ހުށަހެޅިފައިވެއެވެ.
މަސްތުވާތަކެތީގެ އިތުރުން، ވައްކަމާއި، ކުޑަކުދިންނަށް ޖިންސީ ގޯނާ ކުރުމާއި، ބަނގުރާ ބުއިމާއި، މާރަމާރީ ހިންގުމުގެ މައްސަލަތައްވެސް ހުށައެޅިފައިވެއެވެ.
ވަކިވަކި މީހުންގެ މައްޗަށް އުުފުލާފައިވާ ދައުވާތަކަށް ބަލާއިރު، އެ 271 މައްސަލައިގައި 191 މީހަކަށް ދައުވާ އުފުލާފައިވެއެވެ. އޭގެ ތެރޭގައި 18 އަހަރާ 25 އަހަރާ ދެމެދުގެ 48 މީހުން ހިމެނޭއިރު، 26 އަހަރާ 35 އަހަރާ ދެމެދުގެ 88 މީހުން އަދި 36 އަހަރާ 49 އަހަރާ ދެމެދުގެ 45 މީހަކު ހިމެނެއެވެ.
އޭގެ އިތުރުން 50 އަހަރުން މަތީގެ 10 މީހެއްވެސް ހިމެނެއެވެ.
ޖޫން މަހު ކޯޓުތަކުގައި ތާވަލުކުރި މައްސަލަތަކަށް ބަލާއިރު، 101 ކޯޓަކަށް ދައުވާތައް ހުށަހޅައި، 1384 މައްސަލައެއް ކުރިއަށްގެންދެވިފައިވެއެވެ.
ޑްރަގް ކޯޓު ފިޔަވައި އެހެން ކޯޓުތަކުގައި ކުރިއަށް ދިޔަ މައްސަލަތަކަށް ބަލާއިރު، އޭގެ ތެރެއިން 80 އިންސައްތަ މައްސަލަ ސާބިތުވެފައިވެއެވެ. އެއީ 146 މައްސަލައެވެ. 15 މައްސަލައެއް ސާބިތުނުވާކަމަށް ނިންމާފައިވާއިރު، 5 މައްސަލައެއްގައި މަދަނީ މިންގަނޑުން ދައުވާ ބާތިލު ކުރުމަށް ވަނީ ނިންމާފައެވެ.
