ދުނިޔޭގެ ފެންވަރުގެ މޮޅެތި އެތުލީޓުންނާއެކު ވާދަކޮށްލުމުގެ ފުރުސަތު ލިބޭނެ ދުވަހެއްގެ އިންތިޒާރުގައި ދިވެހި އެތުލީޓުން ތިއްބާ، މޯލްޑިވްސް ބޮޑީބޯޑިންގ އެސޯސިއޭޝަން (އެމްބީބީއޭ) އިން އިސްނަގައިގެން އައިބީސީގެ ވޯލްޑް ޓުވަރއެއް ރާއްޖޭގައި ބާއްވާނެ ފުރުސަތު ހޯދިއެވެ. ދެ އަހަރުގެ ބުރަ މަސައްކަތުން މުބާރާތް ރާއްޖޭގައި ބޭއްވޭނެކަމުގެ ޔަގީންކަން ލިބުމުން އެންމެ ބޮޑު އުފަލެއް ލިބުނު އެއް އެތުލީޓަކީ، ޤައުމީ ބޮޑީބޯޑިން ޗެމްޕިއަން އަލީ ޚުޝްރުވާން އަޙުމަދު (ކުޑަ އައްޔަ) އެވެ. ސަބަބުތައް ގިނަ ގުނައެވެ.
ކުޑަ އައްޔަގެ ކެރިއަރުގައި އޭނާއަށް ޤައުމީ ފެންވަރުވައި ނުލިބޭ ވަނަ އެއް ނެތެވެ. ކާމިޔާބު ނުކުރެވޭ މުބާރާތެއް ނެތެވެ. ކުޅިވަރުގެ ދާއިރާއިން ނުލިބޭ އެވޯޑެއް ވެސް ނެތެވެ. ކުޅިވަރުގެ ކުޅެގެން ޤައުމަށް ރީތި ނަމާއި ޝަރަފު ހޯދައިދިން އެވޯޑު އޭނާ އަށް ވަނީ ލިބިފައެވެ. ކުޅިވަރުގެ ދާއިރާއިން ހިތްވަރު ދިނުމުގެ ޤައުމީ އިނާމު ވެސް ކުޑަ އައްޔަ އަށް ވަނީ ލިބިފައެވެ.
މި ހުރިހާ ވަނަތަކާއިއެކުވެސް ކުޑަ އައްޔަގެ ކެރިއަރުގެ އެންމެ ބޭނުންވާ އަމާޒަށް ވާސިލް ނުވެވެއެވެ. މާލީ ގޮތުން ބަލާއިރު ރާއްޖޭގެ ބޮޑީބޯޑިން އެހާ ކުރިއަރާފައި ނެތުމުން އައިބީސީގެ އެންމެ މަތީ ފަންތީގެ މުބާރާތްތަކުގައި ވާދަކުރެވޭނެ ފުރުސަތު އޭނާ އަށް ނެތުމެވެ. އައިބީސީ ވޯލްޑް ޓުއާގެ މުބާރާތްތައް އޮންނާނީ ޔޫރަޕްގެ ގައުމުތަކާއި ދެކުނު އެމެރިކާ އަދި އެފްރިކާގެ ގައުމުތަކުގައެވެ. އަހަރަކު 7 މުބާރާތުގައި ވާދަކޮށްލަން ކުރަން ޖެހޭ ހަރަދަކީ އެމްބީބީއޭގެ އަހަރީ ބަޖެއްޓަށް ވުރެވެސް ބޮޑު ޚަރަދެކެވެ. އޭޝިއާ ސަރަހައްދުގައި ވޯލްޑް ޓުއާގެ މުބާރާތެއް ނުބާއްވާތީ ކުޑަ ހަރަދަކުން މުބާރާތައް ދެވޭނެ ފުރުސަތު އޮތީ ނުލިބިފައެވެ.
އެހެންނަމަވެސް މިއަހަރު އެ މަންޒަރު ބަދަލުވެއްޖެއެވެ. އޭޝިއާ ސަރަހައްދުގައި ބޭއްވި ފުރަތަމަ ވޯލްޑް ޓުއާ މުބާރާތް، ވިޒިޓް މޯލްޑިވްސް ޕްރޯ 2022 އާއިއެކު ރާއްޖޭގެ ބޮޑީބޯޑިންއަށް އާ ދިރުމެއް ލިބިއްޖެއެވެ. ކުޑަ އަައްޔަގެ ކެރިއަރުގެ އެންމެ ބޮޑު ހުވަފެނުގައި ކުލަޖެއްސުމަށް ފުރުސަތު ލިބިއްޖެއެވެ. ދުނިޔޭގެ ޗެމްޕިއަނުންނާއިއެކު ވާދަކޮށްލަން ފުރުސަތު ލިބިއްޖެ އެވެ. ރާއްޖޭގެ ހުނަރުވެރިންގެ ފެންވަރު ދައްކާލާނެ މަގު ފަހި ވެއްޖެއެވެ.
އަބަދުވެސް ޤަބޫލުކުރެވިފައި އޮންނަނީ ބޭރުގެ މަތީ ފަންތީގެ އެތުލީޓުންނާ ދިވެހި އެތުލީޓުންނަށް ވާދަ ނުކުރެވޭނެ ކަމަށެވެ. އެހެން ހީވެސް ވެދާނެއެވެ، ސަބަބަކީ ވަސީލަތްތަކާއި، ވާދަކުރަން ލިބޭ މުބާރާތްތަކުގެ އަދަދަށް ބަލާއިރު، ދިވެހި އެތުލީޓުންނަށް މީގެ ކުރިން އެފަދަ ފުރުސަތުތަކެއް ލިބިފައި ނެތުމެވެ. ރާއްޖޭގެ ބޯޑަރުންނަކީ ހުނަރުވެރި ބައެއްކަަން ސާބިތުކޮށްދިނީ ކުޑަ ކުޑަ ދިވެހިރާއްޖޭގެ ކުޑަ އައްޔައެވެ.
މޯލްޑިވްސް ޕްރޯގެ ފިރިހެން އޯޕަން ބައިގެ ތިން ވަނަ ބުރުގެ ހީޓު ފަހެއްގައި ކުޑަ އައްޔަ ވާދަކުރަން ޖެހުނީ ދުނިޔޭގެ ރޭންކިންގެ ދެ ވަނައިގައި އޮތް ޓަނާ މެކް ޑެނިއެލްއާއެވެ. ލެވެލްގެ ގޮތުން ބަލާ ނަމަ، ކުޑަ އައްޔަ އަށްވުރެ ހުރިހާ ގޮތަކުން ޓަނާ މޮޅެވެ. ޓަނާ އަކީ ބޮޑީބޯޑިންގައި ދުނިޔޭގެ އެތައް ރެކޯޑެއް އޮތް އެތުލީޓެކެވެ. ވޯލްޑް ޓުވަރގެ އެކި މުބާރާތްތަކުން ވަނަ ހޯދުމުގެ އިތުރުން ޓަނާ އަކީ ބޮޑީ ބޯޑިންގެ މަތީ ފަންތީގެ މުބާރާތެއްގައި 20.00 ގެ ސްކޯއެއް ހޯދި ފުރަތަމަ އެތުލީޓެވެ.
ތިން ވަނަ ބުރުގައި މިފަހަރު ޓަނާ އަށް ގަދަ އެއް ނުދެއްކުނެވެ. މިފަހަރު ޖެހުނީ ރާޅުގަނޑުގެ ބޮޑެތި ރާޅުތަކުގައި ކުޑަ އައްޔަގެ ފަހަތުން އިސްޖަހާލާށެވެ. ގައުމީ ޗެމްޕިއަން ކުޑަ އައްޔަ އަތުން ޓަނާ ބަލިވުން ވެގެންދިޔައީ މިފަހަރުގެ މޯލްޑިވްސް ޕްރޯގައި އެންމެ ގިނަ ބަތަކަށް ސިހުން ގެނުވި ނަތީޖާ އަށެވެ. އެންމެ ގިނަ ބަޔަކު ކެނޑިނޭޅި ދެއްކި ބޮޑު ވާހަކައަށެވެ. ދިވެހިރާއްޖޭގެ ބޮޑީބޯޑިން އަށް ދުނިޔޭގެ އެތުލީޓުން ބަލަމުން އައި ގޮތް ބަދަލުކޮށްލަން މަޖުބޫރުވި ނަތީޖާއަކަށެވެ.
ޓަނާ ބަލިކުރުމަށްފަހު ހަތަރު ފިރިހެން އޯޕަން ބައިގެ ހަތަރުވަނަަ ބުރުގައިވެސް ކުޑަ އައްޔަ ތަފާތު ދެއްކިއެވެ. ޓަނާ ބަލިކުރީ ނަސީބަކުން ނޫންކަން ސާބިތުކޮށްދިނެވެ. ދުނިޔޭގެ ރޭންކިންގައި އުޅޭ ފްރާންސްގެ ޔަން ސަލައުން ބަލިކޮށް ކުއާޓާ ފައިނަލުން ޖާގަ ހޯދިއެވެ.
ދެން އޮތީ ޑްރޮޕް ނީ ބައެވެ. މި ބައިގެ ސެމީ ފައިނަލާއި ހަމައަށް އައްޔަ ދަތުރުކޮށް ދުނިޔޭގެ ރޭންކިންގެ ތެރެއަށް ޖެހިލިއެވެ. މިއީ ހަމަ ޔަގީނުންވެސް އައްޔަގެ ކެރިއަރުގެ އެންމެ ބޮޑު އެއް ކާމިޔާބީއެވެ. ސެމީ ފައިނަލުގައި އޭނާ ބަލިވީ ދުނިޔޭގެ ޗެމްޕިއަންކަން 8 ފަހަރު ހޯދާފައިވާ ޑޭވިޑް ހަބާޑުއާއެވެ. އެ މެޗަށް ފަހު ހަބާޑު ވަނީ ރާއްޖޭގެ އެތުލީޓުންގެ ފެންވަރަށް ތައުރީފުކޮށްފައެވެ. އަލަށް މިފަދަ ބޮޑު މުބާރާތެއްގައި ވާދަކޮށް ދިވެހި އެތުލީޓުން ދައްކައިދިން ފަންވަރާއި ހިތްވަރު އޭނާ ފާހަގަކުރިއެވެ.
ކުޑަ އައްޔަގެ ހުވަފެން ހަގީގަތަކަށް ވެއްޖެއެވެ. ދިވެހި ދިދަ ވޯލްޑް ޓުއާ މުބާރާތުގެ އެންމެ މަތީ ފަންތީގައި ވިހުރާލެވިއްޖެއެވެ. ކެރިއަރުގެ މުހިންމު ހިސާބެއްގައި ދުނިޔޭގެ ޗެމްޕިއަނުންނާ ވާދަކުރެވިއްޖެއެވެ. ދުނިޔޭގެ ޗެމްޕިއަނުންގެ ލޯތްބާއި އިހުތިރާމު ހޯދައިފިއެވެ. ދުނިޔޭގެ ރޭންކިންގެ ގަދަ 12 އަށް ޖެހިލައިިފިއެވެ. ވޯލްޑް ޓުއާ މުބާރާތްތަކުގައި ވާދަކޮށް ދުނިޔޭގެ ޗެމްޕިއަނުން ބަލިކުރެވޭނެކަން އައްޔަ ދައްކާލިއެވެ. ކުޑަ އައްޔަ ސާބިތުކޮށްދިނީ މި ކުޑަ ކުޑަ ދިވެހިރާއްޖޭގެ އެތުލީޓުންނަކީ ވެސް ހުނަރުވެރި ބައެއްކަމެވެ. މާލޭ ވަރުނުލާ ރާޅުގަނޑުން ނުކުމެ ދުނިޔޭގެ ރާޅުތަކާއި ހަމައަށް އޭނާގެ ޖާދޫތައް މިހާރު ފޯރައިފިއެވެ.