އުމުރުން 12 އަހަރުގައި ޤައުމީ ބެޑްމިންޓަން ޓީމުން ލައިބާ ޖާގަ ހޯދައިފި

ޤައުމީ ބެޑްމިންޓަން ޓީމަށް ކުޅުންތެރިން ހޮވުމަށް ކުރިއަށް ގެންދިޔަ ސެލެކްޝަންގައި ވާދަކޮށް، ޒުވާން ކުޅުންތެރިޔާ ލައިބާ އަޙުމަދު މަޚްލޫފް (އެލީ) ޤައުމީ ބެޑްމިންޓަން ޓީމުން ޖާގަ ހޯދައިފި އެވެ.

ޤައުމީ އަންހެން ޓީމާއި ފިރިހެން ޓީމަށް ވަނީ ޖުމުލަ 12 ކުޅުންތެރިން ނަގައިފަ އެވެ. އެގޮތުން ކުޅުންތެރިން ހޮވުމަށް ކުރިއަށް ގެންދިޔަ ސެލެކްޝަންގައި ވަނީ ޖުމުލަ 54 ކުޅުންތެރިން ވާދަކޮށްފަ އެވެ. އެއީ 32 ފިރިހެން ކުޅުންތެރިންގެ އިތުރުން، 22 އަންހެން ކުޅުންތެރިންނެވެ.

ޤައުމީ އަންހެން ސްކޮޑުން އުމުރުން 12 އަހަރުގެ ލައިބާ ޖާގަ ހޯދާފައިވާއިރު، ދެން ޤައުމީ އަންހެން ޓީމުގައި ހިމެނުނީ ފާތިމަތު ނަބާހާ (ނަބާ)ގެ އިތުރުން، އައިމިނަތު ނަބީހާ (ނަބީ)، ޔަލްވީ ޙުސެއިން ޒުހުރީ (13 އަހަރު)، ޝުބާ މުޙައްމަދު ޝަރީފް އަދި އައިޝަތު އާލިޝާ މޫސާ އެވެ.

ސެލެކްޝަންގައި ލައިބާ އެ ގުރޫޕުގައި ކުޅުނު ހުރިހާ މެޗަކުން މޮޅުވެފަ އެވެ. ޤައުމީ ޓީމުން ލައިބާ ޖާގަ ހޯދިއިރު، ފާއިތުވި މުއްދަތުގެ ތެރޭގައި ލައިބާ ވަނީ ބައިނަލްއަޤުވާމީ ގިނަ މުބާރާތްތަކެއްގައި ވާދަކޮށް ގިނަ ކާމިޔާބީތަކެއް ވެސް ހޯދައިފަ އެވެ.

ޤައުމީ ފިރިހެން ޓީމުގައި ހިމެނުނު ކުޅުންތެރިންނަކީ، ޒަޔާން ޒަކީ، ޙަސަން ޒަޔާން މުޙައްމަދު، އާދަމް މަހީން މުޙައްމަދު، ނިބާލް އަޙުމަދު، އިބްރާހީމް ނާޝިތު ހަމްދީ އަދި ހައިޝަމް އިބްރާހީމް އެވެ. މީގެ ތެރެއިން ނާޝިތު އަކީ ބެޑްމިންޓަން އެކަޑަމީ އޮފް ނައިފަރަށް ނިސްބަތްވާ ކުޅުންތެރިޔެކެވެ.

ޤައުމީ ބެޑްމިންޓަން ޓީމަށް ކުޅުންތެރިން ހޮވުނުގެ ސެލެކްޝަން ކުރިއަށް ގެންގޮސްފައިވާއިރު، މިއީ ޤައުމީ ޓީމުގެ ސެލެކްޝަނެއް އާންމުކޮށް ހުޅުވާލައިގެން ކުރިއަށް ގެންދިޔަ ފުރަތަމަ ފަހަރެވެ. މިވަގުތު ވޯލްޑް ބެޑްމިންޓަން ފެޑެރޭޝަން (ބީޑަބްލިއުއެފް) އިން ރާއްޖެ ސަސްޕެންޑު ކޮށްފައިވާއިރު، ބެޑްމިންޓަންގެ ކަންކަން ކުރިއަށް ގެންދަމުން އަންނަނީ ކޮމެޓީއަކާ ހަވާލު ކޮށްގެންނެވެ.