މަސްތުވާތަކެތި އެތެރެކުރި ބިދޭސީއަކު ދައުވާއިން ސަލާމަތްވެއްޖެ

ރާއްޖެއަށް މަސްތުވާތަކެތި އެތެރެކުރި ބިދޭސީއެއްގެ މައްޗަށް އުފުލި ދައުވާއިން ސަލާމްވެއްޖެއެވެ.

މި ބިދޭސީ މީހާއަކީ ފެބްރުއަރީ 9، 2020 ވަނަ ދުވަހުގެ ރޭ 10:50 ހާއިރު ވެލާނާ އިންޓަރނޭޝަނަލް އެއަރޕޯޓަށް ޖެއްސި ފުލައިޓަކުން ރާއްޖެއަށް އައި މީހެކެވެ. މީނާ އަކީ ބަންގުލަދޭޝްއަށް ނިސްބަތްވާ އަހުމަދު ބެލާލްއެވެ.

ކްރިމިނަލް ކޯޓުން ހުރި ހުކުމްގައި ބުނެފައިވަނީ އަހުމަދު ބެލާލް ނަމަކަށް ކިޔާ މި މީހާ ގެނައި ލަގެޖް މޯލްޑިވްސް ކަސްޓަމްސް ސަރވިސް އިން ސްކޭންކޮށް ބެލިއިރު، ލަޖެގް ތެރޭގައި އޮތް 2 ފައިވާން ޖޯޑުގެ ތެރެއަށް އެއްޗެއް ކޮންސީލްކޮށްފައި ހުރިކަމަށް ތުހުމަތުކުރިވެގެން ބަލާ ފާސްކުރި އިރު، އެދަބަސްގެ ތެރެއިން ނެގި ފޮތި ކޮތަޅެއްގެ ތެރެއިން ނެގި ޕްލާސްޓިކް ކޮތަޅެއްގެ ތެރެއިން ނެގި 2 ފައިވާން ކޯޓުގެ ތެރެއިން ގިނަ އަދަދެއްގެ މަސްތުވާތަކެތި ފެނިފައިވާ ކަމަށެވެ.

އަދި އެ ތަކެތި ވަގުތީ ޓެސްޓްކިޓުން ޓެސްޓްކުރި އިރު، މެޓަމްފެޓަމިންއަށް ޕޮޒިޓިވްވެފައިވާ ކަމަށެވެ. 10 ޕެކެޓް ފެނުނު އިރު ޖުމްލަ 200 ގްރާމް ހުރިކަމަށް މި ހުކުމްގައި ބުނެފައިވެއެވެ.

މި މައްސަލައިގައި ހުކުމުގައި ބުނެފައިވަނީ މި މައްސަލައިގައި ފެނުނު މަސްތުވާތަކެތި ރައްކާކޮށްފައި ހުރީ 2 ފައިވާން ޖޯޑުގެ އެތެރެއަށް ސީލްކޮށްގެން ކަމަށެވެ. އަދި މަސްތުވާތަކެތި ކޮންސީލްކޮށްފައި ހުރި ފައިވާން އޮތީ ބޭރުން ޓޭޕް އޮޅާފައިވާ ޕްލާސްޓިކް ކޮތަޅެއްގައި ކަމަށެވެ. އެ ކޮތަޅު އޮތީ ލަޖެގްގެ ތެރޭގައި އޮތް ފޮތިކޮތަޅެއްގެ ތެރޭގައި ކަމަށެވެ. އާންމު ވިސްނުމުގެ މިންގަނޑުން ބަލާއިރު، އެފަދަ ގޮތަކަށް މަސްތުވާތަކެތި ކޮންސީލްކޮށްފައި ހުރުމުން ބަލާބެލުމަކަށް އެކަމެއް ނޭނގޭނެކަމަށް ބުނެފައިވެއެވެ. އަދި ކަސްޓަމްސް އޮފިސަރުންނަށް ވެސް އެއްޗެއް ކޮންސީލްކޮށްފައި ހުރިކަން ޝައްކުވެފައިވަނީ ސްކޭން މެޝިނުން އެ ބެލުމުން ކަމަށް ބުނެފައިވެއެވެ.

މި މައްސަލައިގައި އަހުމަދު ބެލާލްގެ ކުޑަކަމުދާތަކެތި ނެގި ތަހުލީލްކުރެވިފައިވާ ކަމަށާއި، ނަމަވެސް މަސްތުވާތަކެތީގެ އެއްވެސް ބާވަތަކަށް ފޮޒިޓިވްވެފައި ނުވާކަމަށް ވަނީ ބުނެފައެވެ. މަސްތުވާތަކެތީގެ ބާވަތްތަކަށް ޕޮޒިޓިވްވިނަމަ، މަސްތުވާތަކެތި ބޭނުންކުރާ އެތަކެތި ގެންގުޅޭ މީހެއްކަމުގެ އިހްތިމާލު އުފެއްދިދާނެކަމަށް ބުނެފައިވެއެވެ. ނަމަވެސް އެފަދަ އިހްތިމާލެއް ކުރުމުގެ ޖާގައެއް ނެތް ކަމަށް ވަނީ ބުނެފައެވެ. އަދި މި މައްސަލައިގައި ފެނުނު މަސްތުވާތަކެތި ބަންދުކޮށްފައިވާ އެއްޗަކުން ނުވަތަ ސީލްއަކުން ނުވަތަ ޓޭފްއަކުން އަހުމަދު ބެލާލްގެ ފިންގަޕްރިންޓް ލިފްޓްކުރެވިފައި ނުވާ ކަމަށްވެސް ވަނީ ބުނެފައެވެ.

މީގެ އިތުރުން މި މައްސަލައިގައި ހުށަހެޅިފައިވާ ހެތްކާއި ގަރީނާއަށް ބަލާއިރު އެކަށީގެންވާ ޝައްކެއް ނެތް މިންވަރަށް ކުށުގެ މާއްދީ ރުކުން ސަބިތުވެފައިވީނަމަވެސް، ކުށުގެ މައުނަވީ ރުކުން އެކަށީގެންވާ ޝައްކެއް ނެތް މިންވަރަށް ޕްރޮސެކިއުޝަނަށް ސާބިތުކޮށްދެވިފައިވާ ކަމަށް ޝަރީއަތަށް ބުރަ ނުވެވޭ ކަމަށް ވަނީ ބަޔާންކޮށްފައެވެ.

އެހެންކަމުން އަހުމަދު ބެލާލްގެ މައްޗަށް ކޮށްފައިވާ ޖަދުވަލު 1 ގައިވާ މަސްތުވާއެއްޗެއް ދިވެހިރާއްޖެއަށް އެތެރެކުރުމުގެ ކުށުގެ ދައުވާ، ދިވެހިރާއްޖޭގެ ގާނޫނު އަސާސީގެ 51 ވަނަ މާއްދާގެ (އ) ގައި ބުނާ އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުނުވާ ކަމަށް ކަނޑައަޅާ މިގޮތުގެ މަތިން ހުކުމްކޮށްފައިވެއެވެ.