މެސީއާ އެއް ޓީމެއްގައި ހުރެވުމަކީ ނަސީބެއް: ރާމޯސް

ޕެރިސް ސެއިންޓް ޖާމަން (ޕީއެސްޖީ)އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީއާ އެއް ޓީމެއްގައި ހުރެވުމަކީ ނަސީބެއް ކަމަށް ސާޖިއޯ ރާމޯސް ބުނެފިއެވެ.

ސްޕެއިންގެ ރެއާލް މެޑްރިޑު ދޫކޮށް ރާމޯސް ޕީއެސްޖީއަށް ބަދަލުވީ 2021 ވަނަ އަހަރުއެވެ. ހަމަ އެއަހަރު މެސީ ވަނީ ސްޕެއިންގެ ބާސެލޯނާ ދޫކޮށް ޕީއެސްޖީއަށް ބަދަލުވެފައެވެ. ލަލީގާގައި ކުޅުނު ދުވަސް ވަރު މި ދެ ކުޅުންތެރިންނަކީ ވަރަށް ވާދަވެރި ދެ ކުޅުންތެރިންނެވެ. ދަނޑު މަތީގައި މި ދެ ކުޅުންތެރިންގެ ވާދަވެރިކަން ވަރަށް ބޮޑަށް ފެނެއެވެ.

މެސީއާ ގުޅޭ ގޮތުން ވާހަކަ ދައްކަމުން ރާމޯސް ބުނީ، މެސީއާ އެއް ޓީމެއްގައި ހިމެނުނަކީ އޭނާ އަށް ލިބޭ ނަސީބެއް ކަމަށާއި، މެސީއަށް މަރުހަބާ ކިޔާކަށް ނުޖެހޭނެކަމަށެވެ. ރާމޯސް ބުނީ މެސީ އަކީ ކިހާ ފެންވަރެއްގެ ކުޅުންތެރިޔެއްކަން އެންމެނަށް ވެސް އިނގޭނެ ކަމަށާއި، އޭނާގެ އުންމީދަކީ އެގޮތުގައި މެސީ ދެމިހުރުން ކަމަށެވެ.

ރަމޯސްގެ އިތުރުން ޕީއެސްޖީގެ ކެޕްޓަން މާކީނިއޯސް ވެސް ބުނީ މެސީ އަކީ އޭނާގެ މަގާމުގައި ވަރަށް ރަނގަޅަށް ކުޅެމުން އަންނަ ކުޅުންތެރިއެއް ކަމަށެވެ. މީގެ އިތުރުން މާކީނިއޯސް ބުނީ އައު ކޯޗަށް ކުޅުންތެރިން އެންމެ އެކަށީގެންވާ މަގާމުތައް އިނގޭނެ ކަމަށާއި، މެސީ އަކީ ތަފާތު މޮޅު ކުޅުންތެރިއެއް ކަމަށެވެ.

މެސީއާއެކު ޕީއެސްޖީން އަންނަނީ ކުރިއަށް އޮތް ސީޒަންގެ ޗެމްޕިއަންސް ލީގު ކާމިޔާބުކުރުމަށް ބުރަ މަސައްކަތް ކުރަމުންނެވެ.