ޔޫކްރެއިންގެ ގޮވާން ބަރުކޮށްފައިވާ ބޯޓުތައް ފުރުމަށް ތައްޔާރުވެފައި
4 އޯގަސްޓު 2022 | ބުރާސްފަތި 03:26ޔޫކްރެއިންގެ ގޮވާން އެކްސްޕޯޓް ނުކުރެވި ލަސްވަމުން ދިޔުމުގެ ސަބަބުން ދުނިޔޭގެ ބާޒާރުތަކުގައި ގޮވާމުގެ ބާވަތްތައް މަދުވެ ޚާއްސަކޮށް ގޮދަނުގެ އަގުތައްވަނީ ވަރަށް ބޮޑަށް މައްޗަށް ގޮސްފައި
ޔޫކްރެއިންގެ ގޮވާމުގެ ބާވަތްތައް ބަރުކޮށްގެންދާ ބޯޓު
ޔޫކްރެއިންގެ ގޮވާމުގެ ބާވަތްތައް ބަރުކޮށްފައިވާ ބޯޓުތައް ފުރުމަށް ތައްޔާރުވެފައިވާކަމަށް ޔޫކްރެއިންގެ ފޮރިން މިނިސްޓަރ ޑިމިޓްރޯ ކުލީބޭ ވިދާޅުވެއްޖެއެވެ.
ޔޫކްރެއިންގެ ގޮވާން އެކްސްޕޯޓް ނުކުރެވި ލަސްވަމުން ދިޔުމުގެ ސަބަބުން ދުނިޔޭގެ ބާޒާރުތަކުގައި ގޮވާމުގެ ބާވަތްތައް މަދުވެ ޚާއްސަކޮށް ގޮދަނުގެ އަގުތައްވަނީ ވަރަށް ބޮޑަށް މައްޗަށް ގޮސްފައެވެ. އދ. އާއި ތުރުކީ މެދުވެރިއަކަށް ވެގެން ޖުލައި މަހުގެ 22 ވަނަ ދުވަހު ރަޝިޔާއާއި ޔޫކްރެއިނުން ވަނީ ތުރުކީގެ އިސްތަންބޫލްގައި ޔޫކްރެއިންގެ ގޮވާން އެކްސްޕޯޓް ކުރުމުގެ އެއްބަސްވުމެއްގައި ސޮއިކޮށްފައެވެ.
ޔޫކްރެއިންގެ ފޮރިން މިނިސްޓަރ ކުރެއްވި ޓްވީޓެއްގައި ވިދާޅުވީ މިއެއްބަސްވުމާއި އެއްގޮތަށް ރަޝިޔާއިން އަމަލުކުރާނަމަ ގޮވާމުގެ ބާވަތްތައް ގަންނަން ބޭނުންވާ ފަރާތްތަކާ ހަމައަށް ގޮވާންތައް ދާނެކަމަށާއި އަދި މަތިވެފައިވާ ގޮވާމުގެ ބާވަތްތަކުގެ އަގު ކުޑަކުރުމަށް އެހީވެދޭނެކަމަށެވެ. އެއްބަސްވުމާ އެއްގޮތަށް ޔޫކްރެއިން ކަންކަންކުރާނެކަމަށާއި ދުނިޔެއަށް ބޭނުންވާ ކާބޯތަކެތި ބޭނުންވާ މިންވަރަށް ފޯރުކޮށްދިނުމުގައި ޔޫކްރެއިން ދެމި އޮންނާނެކަމަށެވެ.
އެއްބަސްވުމުގެ ދަށުން ގޮވާމުގެ ބާވަތްތައް ބަރުކޮށްގެންދިޔަ ފުރަތަމަ ބޯޓު ރަޒޯނީ ވަނީ ބުދަ ދުވަހު ލުބުނާނަށް ގޮސްފައެވެ. އެބޯޓު އޮޑެއްސާ ބަނދަރުން ފުރީ 26،567 ޓަނުގެ ގޮވާމުގެ ބާވަތްތައް ބަރުކޮށްގެންނެވެ.
ޔޫކްރެއިން އަކީ ދުނިޔޭގެ ބާޒާރުތަކަށް ގޮވާމުގެ ބާވަތްތައް އެންމެ ގިނައިން އެކްސްޕޯޓްކުރާ 5 ގައުމުގެ ތެރޭގައި ހިމެނޭ ގައުމެކެވެ.
