މިއީ ކޯޗިންގ ކެރިއަރުގެ އެންމެ އުނދަގޫ ޗެލެންޖު، ފުރަތަމަ ޑިވިޝަނަށް ގެންދިއުމަކީ އުނދަގޫ މަސައްކަތެއް- އާފިއު

ބުރު ސްޕޯރޓްސް ކްލަބާއެކު ދެވަނަ ޑިވިޝަންގައި ކުރަމުން އަންނަ މަސައްކަތަކީ ކޯޗިންގ ކެރިއަރުގައި އެންމެ އުނދަގޫ ޗެލެންޖްކަމަށް ކޯޗު އާފިއު މުޙައްމަދު ހާމިދު ބުނެފިއެވެ.

ނިސްބަތުން ރަނގަޅު ސްކޮޑަކާއެކު ދެވަނަ ޑިވިޝަންގައި ވާދަކުރަމުން އަންނަ ބުރުގެ ކޯޗު އާފިއު ބުނީ އޭނާއަށް ލިބިފައި އޮތީ ކުޅުންތެރިންނަށް ބެލިޔަސް, މެނޭޖްމަންޓަށް ބެލިޔަސް ރަނގަޅު ޓީމެއްކަމަށެވެ. ހުރިހާ ކުޅުންތެރިންނާއި, މެނޭޖްމަންޓުންވެސް ބޮޑު އެއްބާރުލުމެއް ދޭކަމަށާއި, އެއީ ކުރިއަށްދާން ލިބޭ ވަރަށް ބޮޑު ހިތްވަރެއް އަދި ފަސޭހައެއް ކަމަށް އާފިއު ބުންޏެވެ. އާފިއު ބުނީ ބުރުގެ މެނޭޖްމަންޓުން މިހާރު މަސައްކަތްކުރާ ގޮތަށް ކުރާނަމަ ކާމިޔާބީއާ ހަމައަށްދާން އުނދަގޫ ނުވާނެކަމަށެވެ.

ބުރުގެ އަމާޒުހުރީ ފުރަތަމަ ޑިވިޝަނުން ޖާގަ ހޯދުމަށެވެ. އެކަމަކު އާފިއު ބުނީ އެކަމަށް އެއްޗެއް ބުނަން އަދި އަވަސް ކަމަށާއި, ފުރަތަމަ އަމާޒަކީ ދެވަނަ ޑިވިޝަންގެ ފައިނަލަށް ދިއުންކަމަށެވެ. އެކަމަކު މަސައްކަތްކުރަނީ ފުރަތަމަ ޑިވިޝަނަށް ދިއުމުގެ އަމާޒުވެސް ވިސްނުމުގައި ބައިންދައިގެންކަމަށް ވިކްޓްރީއާއި, ނިއުރޭޑިއަންޓާއި ވެލެންސިޔާއަށްވެސް ކުރިން ކުޅުނު އާފިއު ބުންޏެވެ.

ބުރު ވަނީ ގްރޫޕް ސްޓޭޖްގައި ފުރަތަމަ ފަސް މެޗުންވެސް މޮޅުވެ, ސެމީ ފައިނަލްގެ ޖާގަ ޔަޤީންކޮށްފައެވެ. މިހާތަނަށް ސެމީގެ ޖާގަ ޔަޤީންކުރި ހަމައެކަނި ޓީމަކީ ބުރު ސްޕޯރޓްސް ކްލަބެވެ.