އެމެރިކާއިން އަލްޤައިދާގެ އިސް ލީޑަރު މަރާލައިފި
މަރާލި ކަމަށް ބުނަނީ އައިމަން އަލް ޒަވާހިރީ
އަލްޤައިދާގެ ލީޑަރު އައިމަން އަލް ޒަވާހިރީ
ޑްރޯން ހަމަލާއެއްގައި އަލްޤައިދާގެ ލީޑަރު ކަމަށްވާ އައިމަން އަލް ޒަވާހިރީ މަރާލާފައިވާ ކަމަށް އެމެރިކާއިން ބުނެފިއެވެ.
މިކަން އެމެރިކާގެ ރައިސް ޖޯ ބައިޑަން ވަނީ ކަށަވަރުކޮށްދެއްވާފައެވެ. އެމަނިކުފާނު ވިދާޅުވީ އަލް ޒަވާހިރީ މަރާލާފައިވަނީ އެ ޤައުމުން އަފްޣާނިސްތާނުގެ ވެރިރަށް ކާބުލްގައި ހިންގި ކައުންޓަރ ޓެރަރިޒަމް އޮޕަރޭޝަނެއްގައި ކަމަށެވެ.
ސީއެންއެންގައި ރިޕޯޓްކޮށްފައިވާ ގޮތުުގައި އަލް ޒަވާހިރީ މަރާލާފައިވަނީ އަފްޣާނިސްތާނުގައެވެ. އޭނާ މަރާލިއިރު އުމުރުން 71 އަހަރުއެވެ.
އަލް ޒަވާހިރީއަކީ އަލްޤައިދާގެ އެންމެ އިސްކޮށް ހަރަކާތްތެރިވާ އެކަކު ކަމަށް ބޭރުގެ މީޑިއާތަކުން ރިޕޯޓްކުރެއެވެ. އެގޮތުން، އުސާމާ ބިން ލާދިންގެ ފިޒީޝަނުގެ ގޮތުގައި ވެސް އޭނާ މަސައްކަތްކޮށްފައިވާ ކަމަށް ވަނީ ރިޕޯޓްކޮށްފައެވެ.
ބައިޑަން ވިދާޅުވީ އަލްޤައިދާގެ ލީޑަރު މަރާލެވުމަކީ އެ ޖަމާއަތުގެ ސަބަބުން ގެއްލުން ލިބުނު އެމެރިކާގެ އާއިލާތަކަށް ހިތްހަމަޖެހުން ލިބިގެންދާނެ ކަމެއް ކަމަށެވެ. އެގޮތުން، ހަމަލާތަކުގެ ފަހަތުގައި އައިމަން އަލް ޒަވާހިރީ ވެސް އިސް ރޯލެއް އަދާކޮށްފައިވާ ކަމަށާއި އޭނާއަށް ލިބިފައިވަނީ ހައްޤު އަދަބު ކަމަށް ބައިޑަން ވިދާޅުވިއެވެ.
އެމެރިކާގެ ސީނިއަރ އެޑްމިނިސްޓްރޭޝަން އޮފިޝަލަކާ ހަވާލާދީ ސީއެންއެންގައި ބުނެފައިވަނީ އަފްޣާނިސްތާނުގައި އަލްޤައިދާއަށް އަމާޒުކޮށް ޑްރޯން ހަމަލާތަކެއް ދީފައިވާ ކަމަށެވެ. އަދި އެ އޮޕަރޭޝަން ވަރަށް ކާމިޔާބު ކަމަށް ވަނީ ބުނެފައެވެ. މި ހަމަލާތަކުގައި އާއްމުންގެ އެއްވެސް މީހަކު މަރު ނުވާ ކަމަށް ވެސް ވަނީ ބުނެފައެވެ.
