ކާޑެއްދޫ ބަނދަރު ތަރައްގީ ކުރުމުގެ ފުރަތަމަ ފިޔަވަހީގެ މަަސައްކަތް ނިންމާލައިފި

ގދ.ކާޑެއްދޫ ބަނދަރު ތަރައްގީކުރުމުގެ މަޝްރޫއުގެ ފުރަތަމަ ފިޔަވަހިގެ މަސައްކަތްކޮށް ނިންމާލައިފިއެވެ.

ކާޑެއްދޫ ބަނދަރުގެ މަސަައްކަތް މިނިސްޓްރީ އޮފް ނޭޝަނަލް ޕްލޭނިން، ހައުސިންގ އެންޑް އިންފްރާސްޓަރަކްޗަރ އިން ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއެވެ. އެ ކުންފުނިން ބުނި ގޮތުގައި ބަނދަރުގެ ފުރަތަމަ ފިޔަވަހީގެ މަސައްކަތް ނިންމާލާފައިވަނީ މިދިޔަ ޖުލައި މަހުގެ 25 ވަނަ ދުވަހުއެވެ.

ގދ. އަތޮޅަކީ 21،000 ރައްޔިތުންގެ ބޮޑު އާބާދީއެއް އޮންނަ އަތޮޅެކެވެ. މި އާބާދީގެ ބޮޑު ބައެއް ވައިގެ މަގުން ގދ. އަތޮޅަށް ދަތުރުކުރުމަށް ބޭނުންކުރާ މައިގަނޑު މަންޒިލަކީ ކާޑެއްދޫ އެއަރޕޯޓެވެ. ނަމަވެސް އެ ރަށުގެ ބަނދުރު ހަލާކުވެ ބައެއް ވެއްޓުމުން ރަށަށް އަރައި ފޭބުމުގައި އެއަަރޕޯޓަށްދާ ރައްޔިތުންނަށް ވަނީ ދަތިވެފައެވެ.

ކާޑެއްދޫގައި މިހާރު ބޭނުން ކުރަމުންދާ ބަނދަރަކީ މީގެ 28 އަހަރު ކުރިން އެރަށުގެ އެއަރޕޯޓް ތަރައްގީ ކުރިއިރު ހަދާފައިވާ ބަނދަރެކެވެ. ކާޑެއްދޫގެ ބަނދަރަކީ ކޮންމެ ދުވަހަކުވެސް އެތައް ރައްޔިތުންތަކެއް ޚިދުމަށް ހޯދަމުން އަންނަ ބަނދަރެއް ކަމުން އެ ބަނދަރު ތަރައްގީ ކުރުމުން ހިދުމަތް ހޯދާ ރައްޔިތުންނަށް ވަރަށް ބޮޑު ލުޔެއް ލިބިގެންދާނެ ކަމަށް އެމްޓީސީސީން ބުނެއެވެ.

މި މަޝްރޫޢުގެ ދަށުން މިހާރު ހުރި ހާބަރ ބޭސިން ފުންކުރުމާއި، އެއްގަމުތޮށި ލުމާއި، ހާބަރ ޕޭވްމަންޓް ހެދުމާއި، ބަނދަރު ބައްތި ހަރުކުރުމުގެ މަސައްކަތް ވަނީ ނިންމާފައެވެ. މި މަސައްކަތް އެ ކުންފުންޏާ ހަވާލު ކުރީ 9.52 މިލިއަން ރުފިޔާއަށެވެ.