ތިމާވެށީގެ ރައްކާތެރިކަމާއި ރާއްޖޭގެ ރައްކާތެރިކަމާއި ވަނީ ގުޅިފައި: ފައިސަލް ނަސީމް
ތިމާވެށީގެ ރައްކާތެރިކަމާއި އިޖުތިމާއީ ރައްކާތެރިކަމާއި، އިގްތިސާދީ ހަމަޖެހުމާއި ވަނީ ގުޅިފައި - ފައިސަލް
މޯލްޑިވްސް ނޭޝަނަލް ޑިފެންސް ފޯސްއިން ގުޅިގެން ބާއްވާ "އިންޑޯ-ޕެސިފިކް އެންވަޔަރަމަންޓް ސެކިޔުރިޓި ފޯރަމް 2022"ގައި ނައިބު ރައީސް ފައިސަލް ނަސީމް ވާހަކަދައްކަވަނީ
ތިމާވެށީގެ ރައްކާތެރިކަމަކީ ރާއްޖޭގެ ރައްކާތެރިކަމާއި ގުޅިފައިވާ ކަމެއް ކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ޔުނައިޑެޓް ސްޓޭޓްސް އިންޑޯ ޕެސިފިކް ކޮމާންޑް އާއި، މޯލްޑިވްސް ނޭޝަނަލް ޑިފެންސް ފޯސްއިން ގުޅިގެން ބާއްވާ "އިންޑޯ-ޕެސިފިކް އެންވަޔަރަމަންޓް ސެކިޔުރިޓި ފޯރަމް 2022"، ފެށުމުގެ ރަސްމިއްޔާތުގައި ވާހަކަދައްވަމުން އެމަނިކުފާނު ވަނީ ތިމާވެށީގެ ރައްކާތެރިކަމާއި އިޖުތިމާއީ ރައްކާތެރިކަމާއި، އިގްތިސާދީ ހަމަޖެހުމާއި ގުޅިފައިވާކަމަށް ވިދާޅުވެފައެވެ. ފައިސަލް ވިދާޅުވީ މިފަދަ ކަންކަމަކީ ގައުމުތަކުގެ ރައްކާތެރިކަމާއި ސަލާމަތަށް އަސަރު ކުރާ ކަމެއްކަމުގެ ހެކި ފެންނަން އެބަހުރި ކަމަށާއި، މިއީ އާއްމުކޮށް ގައުމުތަކުގެ ރައްކާތެރިކަމަށް ދިމާވާ ގޮންޖެހުންތަކާއި ޚިލާފު ހައްސާސް މައްސަލަ އެއް ކަމަށެވެ.
މޫސުމީ ބަދަލުތަކުން ރާއްޖެ އަށް ކުރާ އަސަރު އިތުރުވެފައިވުމާއި އެކު ތިމާވެށީގެ ސަބަބުން ކުރާ އަސަރުތައް ކުޑަ ކުރުމަށް އެކަށީގެންވާ މަސައްކަތްތަކެއް ކުރުމުގެ މުހިންމުކަން އިތުރުވެފައިވާ ކަމަށް ވެސް ފައިސަލް ވަނީ ވިދާޅުވެފައެވެ. އެހެންނަމަވެސް ބައިނަލްއަގުވާމީ ދުނިޔެއަށް ބަލާއިރު ވެސް ދުނިޔެ ހޫނުވުމުގެ އަސަރު ގައުމުތަކަށް ކުރާ މިންވަރު ނިސްބަތުން އިތުރުވެފައިވާކަމަށް ފައިސަލް ވިދާޅުވިއެވެ. އެހެންކަމުން މޫސުމަށް އަންނަ ބަދަލުތަކުން ތިމާވެއްޓަށް ކުރާ އަސަރުތަކުގެ މައްސަލަ އަކީ ހަމައެކަނި ރާއްޖެ ފަދަ ކުދި ގައުމުތަކަށް އަސަރުކުރާ ކަމެއް ކަމަށް މިހާރު ބުނެވެން ނެތް ކަމަށް ވެސް އެމަނިކުފާނު ވަނީ ވިދާޅުވެފައެވެ.
އޮގަސްޓް 1 އިން 4 އަށް ކުރިއަށްގެންދާ މި އަހަރުގެ "އިންޑޯ-ޕެސިފިކް އެންވަޔަރަމަންޓް ސެކިޔުރިޓި ފޯރަމް" ގައި، 21 ޤައުމަކުން ޖުމްލަ 100 އަށްވުރެ ގިނަ މަންދޫބުން ބައިވެރިވެއެވެ. އަދި، މި އަހަރުގެ ފޯރަމް ހޯސްޓްކުރާ ޤައުމުގެ ހައިސިއްޔަތުން، ދިވެހިރާއްޖެ ތަމްސީލުކުރާ ތިމާވެއްޓާ ގުޅުންހުރި އިދާރާތަކުން ކަނޑައަޅާފައިވާ 24 މަންދޫބުން ވެސް މި ފޯރަމްގައި ބައިވެރިވެލައްވައެވެ. ކޮންމެ އަހަރަކު ބާއްވަމުންދާ މި ފޯރަމް އެންމެ ފަހުން ދިވެހިރާއްޖޭގައި ބާއްވާފައިވަނީ 2014 ވަނަ އަހަރުއެވެ. ކޮވިޑުގެ ޚާއްޞަ ހާލަތާ ގުޅިގެން ވޭތުވެދިޔަ ދެ އަހަރު މިފޯރަމް ބޭއްވިފައިވަނީ ވަރޗުއަލްކޮށެވެ.
