މަނީ ލޯންޑަރިންގގެ ތުހުމަތުގައި ޕާކިސްތާނުގެ ބޮޑުވަޒީރާއި ދަރިކަލުން ކޯޓަށް ހާޒިރުވުމަށް އަންގައިފި

ޕާކިސްތާނުގެ ބޮޑުވަޒީރު ޝަހްބާޒް ޝަރީފާއި ދަރިކަލުން މުހައްމަދު ހަމްޒާ ޝަހްބާޒް، މަނީ ލޯންޑަރިންގގެ ތުހުމަތުގައި ޕާކިސްތާންގެ ލާހޫރުގެ ޚާއްސަ ކޯޓަކަށް ހާޒިރުވުމަށް އަންގައިފިއެވެ. މިގޮތުން ކޯޓަށް ހާޒިރުވުމަށް އަންގާފައިވާ ތާރީޚަކީ ސެޕްޓެމްބަރ 7 ވަނަ ދުވަހެވެ. އެދެބޭފުޅުންގެ މައްޗަށް ކުރެވޭ ދައުވާއަކީ; 66.9 މިލިއަން އެމެރިކާ ޑޮލަރު މަނީ ލޯންޑަރކުރެއްވިކަމުގެ ދައުވާއެކެވެ. ފެޑަރަލް އިންވެސްޓިގޭޝަން އޭޖެންސީން މިދެބޭފުޅުންގެ މައްޗަށް ކޯޓުގައި ދައުވާ އުފުލާފައިވަނީ 2020 ވަނަ އަހަރުގެ ނޮވެމްބަރ މަހުއެވެ.

މަނީ ލޯންޑަރިންގގެ ހަރަކާތްތައް ހިންގާކަމަށް ތުހުމަތު ބޮޑަށް ކުރެވެނީ ޝަހްބާޒްގެ ދަރިކަލުން ހަމްޒާގެ މައްޗަށެވެ. އޭނާއަކީ ޕަންޖާބް ޕްރޮވިންސްގެ ޗީފް މިނިސްޓަރުކަންވެސް ކުރެއްވި ބޭފުޅެކެވެ. ޕްރޮސެކިއުޓަރ އޮފީހުން މައުލޫމާތުދީފައިވާގޮތުގައި، ހަމްޒާގެ ނަމުގައިވާ 19 ބޭންކް އެކައުންޓެއްގެ މައުލޫމާތު ވަނީ ހޯދާފައެވެ. ނަމަވެސް އަދިވެސް 7 އެކައުންޓެއްގެ މައުލޫމާތުވަނީ ނުލިބިއެވެ.

މީޑިއާ ރިޕޯޓްތައް ބުނާގޮތުން ތަހުގީގު ޓީމްތަކުން ވަނީ ޝަހްބާޒް ޝަރީފްގެ އާއިލާއަށް ނިސްބަތްވާ 28 ބޭންކް އެކައުންޓެއް ވާކަން ހޯދާފައެވެ. މަނީ ލޯންޑަރިންގ ހިންގަނީ މި އެކައުންޓްތައް މެދުވެރިކޮށްކަމަށް ތުހުމަތުކުރެވެއެވެ. މިގޮތުން ފޭކް ނަންނަމުގައި ހަދާފައިވާ އެކައުންޓްތަކުން އެކިފަރާތްތަކަށް ފައިސާދެއްކުމަށް، މި އެކައުންޓްތައް މެދުވެރިކޮށް ވަގުފައިސާ ބޭނުން ކުރައްވާފައިވާކަމަށް ތުހުމަތު ކުރެވިފައިވެއެވެ.

ލާހޫރުގެ ޚާއްސަ ކޯޓުން މިހާރުވެސް ދެބޭފުޅުންނަށް ވަނީ ކަފާލާތު ހަމަޖެހޭގޮތަށް ނިންމާފައެވެ. ސެޕްޓެމްބަރ 7ގެ އަޑުއެހުމަކީ ހަމައެކަނި ދައުވާ އިއްވަން ބާއްވާ އަޑުއެހުމެއްކަމަށްވެއެވެ.