ނުކުޅެދޭ ހާލުގައިވެސް ޓީމުގެ އެންމެ ކުރިއަށް ގެންގޮސްދިނީ ދެގޮތެއް ނުވާ ސާބިތުކަން

ޓެރަރިޒަމާ ދެކޮޅަށް ކަމަށް ބުނެ އެމެރިކާއާއި އެމެރިކާގެ ބައިވެރިން އަފްޣާނިސްތާނުގައި ކުރި ހަނގުރާމައަކީ އެމެރިކާގެ ތާރީހުގައި އެ ގައުމުން ކުރި އެންމެ ދިގު ހަނގުރާމައެވެ. ކަނޑައެޅިގެން ވަކި ކާމިޔާބެއް ނުލި 2021 ވަނަ އަހަރު ހަނގުރާމަ ދޫކޮށްލުމަށްފަހު އެމެރިކާ ސިފައިން އަފްޣާނިސްތާނުން ފައިބައިގެން ދިޔައިރު، 20 އަހަރަށް ދެމިގެން ދިޔަ ހަނގުރާމައިގެ އަސަރު މިއިން ދުވަހަކުވެސް އަފްޣާނިސްތާނުން ފިލާ ނުދާނެއެވެ. ވަކިން ޚާއްސަކޮށް ޖިސްމާނީ ގޮތުން ނުކުޅެދޭ ހާލަށް ބަދަލުވި މީހުންގެ ދިރިއުޅުމަށް ފޯރި އަސަރެވެ. ނަމަވެސް، އެއީ ދިރިއުޅުމައިގެން ކުރިއަށް ދާން އޮތް ހުރަހެއް ކަމަށް ނުދެކޭ މީހުންވެސް މަދެއް ނޫނެވެ. އެފަދަ އެކަކީ، ހަނގުރާމައިގެ ތެރޭގައި ޖިސްމާނީ ގޮތުން ނުކުޅެދޭ މީހަކަށްވި މުޙައްމަދު ޞާބިރު ސުލްޠާނީއެވެ.

ހަނގުރާމައިގެ ސަބަބުން ޖިސްމާނީ ކުޅެދުންތެރިކަމަށް އުނިކަން ލިބުނު އެތައް ބައެއްގެ ތެރޭގައި ހިމެނޭ ސުލްޠާނީ މަސައްކަތް ކުރަނީ އަފްޣާނިސްތާނުގެ ވެރިކަން ކުރާ ކާބުލްގައި ހިންގާ ޕްރޮސްތެޓިކްސް ރީހެބިލިޓޭޝަން ސެންޓަރެއްގައެވެ. ސުލްޠާނީއަށް އޭނާގެ 2 ފަޔާވެސް ވަދާއީ ސަލާމް ކުރަން ޖެހުނީ އުމުރުން ވަރަށް ޅަ އިރުއެވެ. އެންމެ ފުރަތަމަ، ދިރިއުޅުމައިގެން ކުރިއަށް ދިއުމުގެ ހިތްވަރު އޭނާއަށް ގެއްލުނެވެ. ނަމަވެސް ޕްރޮސްތެޓިކްސް ރީހެބިލިޓޭޝަން ސެންޓަރުގެ އެހީގައި، ދިރުއުޅުމައިގެން ކުރިއަށް ދިއުމަށް ހިތްވަރު ލިބުނެވެ. ޕްރޮސްތެޓިކްސް ރީހެބިލިޓޭޝަން ސެންޓަރުގެ އެހީގައި މިއަދު ސުލްޠާނީއަކީ ފުރޮޅުލީ ގޮނޑީގައި ހަރަކާތްތެރިވާ އަފްޣާނިސްތާނުގެ ގައުމީ ބާސްކެޓްބޯޅަ ސްކޮޑްގެ މުހިންމު ކުޅުންތެރިއެކެވެ.

ބަލާ ބެލުމަށް ކިތަންމެ ފަސޭހަ ކަމުގައި ހީވި ނަމަވެސް، ފުރޮޅުލީ ގޮނޑިއެއްގައި އިނދެގެން ބާސްކެޓްބޯޅަ ފަދަ ކުޅިވަރެއް ކުޅުމަކީ މާ ފަސޭހަ ކަމެއް ނޫނެވެ. ބޯޅަ ޑްރިބްލް ކުރަމުން، އެހެން ކުޅުންތެރިންނަށް ބޯޅަ އެއްލަމުން، ނުވިތާކަށް ޕޮޓަށް ބޯޅަ އެއްލާ ޕޮއިންޓް ހޯދަމުން، ނުވިތާކަށް ގޮނޑި ދުށްވަމުން ދިއުމަކީ ޖިސްމާނީ ގޮތުން ހަށިގަނޑު ވަރަށް ފުރިހަމައަށް ފިޓްކޮށްގެން ނޫނީ ނުވާނެ ކަމެކެވެ. ފުރޮޅުލީ ގޮނޑީގައި ހަރަކާތްތެރިވާ އަފްޣާނިސްތާނުގެ ގައުމީ ބާސްކެޓްބޯޅަ ސްކޮޑްގެ އެންމެ ހަލުވި ކުޅުންތެރިއަކީ ސުލްޠާނީއެވެ. ފާއިތުވީ 11 އަހަރު ބާސްކެޓް ކުޅުމުގައި ހަރަކާތްތެރިވެފައިވާ ސުލްޠާނީ، 28 މީޓަރުގެ ބާސްކެޓް ކޯޓު ހުރަސްކޮށްލަނީ އެންމެ 5 ސިކުންތުގެ ތެރޭގައެވެ.

ސުލްޠާނީގެ ބައްޕަ، މި ދުނިޔެއަށް ފަހު ނޭވާ ދޫކޮށްލިއިރު އޭނާގެ އުމުރުން އެންމެ 2 އަހަރެވެ. މޮޓަރު ބަޑީގެ ހަމަލާއެއްގައި ސުލްޠާނީގެ 2 ފައި ޗިސްވިއިރު އޭނަގެ އުމުރުން އެންމެ 3 އަހަރެވެ. ނަމަވެސް އޭރުވެސް ސުލްޠާނީ އުޅެމުން ދިޔައީ ހަރަކާތްތެރި ދިރިއުޅެމެކެވެ. ކޮޅުކޮޅުމައްޗަށް ދުވަމުން ދިޔައީ އޭނާގެ 2 އަތުގެ އެހީގައެވެ.

ފުރޮޅުލީ ގޮނޑީގައި ހަރަކާތްތެރިވާ އަފްޣާނިސްތާނުގެ ގައުމީ ބާސްކެޓްބޯޅަ ސްކޮޑްގައި ސުލްޠާނީއަކީ ޕޮއިންޓް ގާޑެވެ. އޭނާގެ އުނަގަނޑާއި އަތުގެ ބާރުގައި ގޮނޑި ދުށްވަމުން، ޓީމުގެ ޑިފެންސަށް ކުޅެ، ކޯޓުގެ އެއްކޮޅުން އަނެއް ކޮޅަށް ބޯޅަ ފޮނުވާލާ، ސްކޯ ކުރާނެ ފުރުސަތު، ޓީމުގެ އެހެން ބައިވެރިންނަށް ހޯދާދެއެވެ. ނަމަވެސް ކުޅިވަރުގެ މައިދާނުގައިވެސް ސުލްޠާނީއަށް ގޮންޖެހުންތަކާ ކުރިމަތިވެއެވެ.

ބާސްކެޓް ގޭމެއްގައި ހަލުވި ދުވެލީގައި ކޮޅުކޮޅަށް ގޮނޑި ދުއްވަމުން ދާއިރު އަރި އަޅާލައިގެން ވެއްޓުމަކީ އާންމު ކަމެކެވެ. އަނިޔާ ވަނީވެސް މަދެއް ކޮށެއް ނޫނެވެ. ޚުދު ސުލްޠާނީގެ އަތުގެ ކަށިގަނޑުވެސް 3 ފަހަރެއްގެ މަތިން ބިނދުނެވެ.

ހަފުތާގެ ދުވަސްތަކުގައި ސުލްޠާނީގެ މަސައްކަތަކީ ޕްރޮސްތެޓިކްސް ނުވަތަ ޖިސްމާނީ ނުކުޅެދުންތެރިކަން ހުންނަ މީހުންނަށް މަސްނޫއީ ގުނަވަންތައް އުފެއްދުމެވެ. އެއީ ކޮންމެ މަރުހަލާއެއްގައިވެސް ކެތްތެރިކަމާއި އިންތިހާ ސަމާލުކަން، އެކަމަކަށް ހުސްކޮށްލަން ޖެހޭ ކަވި މަސައްކަތެކެވެ. މި ހުރިހާ ކަމެއްގައިވެސް އޭނާއާ އެކުގައިވާ އެންމެ މުހިންމު އެއް ބައިވެރިއަކީ ހިތުގެ ސާބިތުކަމެވެ.