އދ. ގެ އާއްމު މަޖިލީހުގެ ރައީސް އަދި ފޮރިން މިނިސްޓަރ އަބްދުﷲ ޝާހިދު އާރމީނިއާއަށް ކުރެއްވި ދަތުރުފުޅާ ގުޅިގެން ތުރުކީން ނުރުހުން ފާޅުކޮށްފިއެވެ.

ތުރުކީގެ ފޮރިން މިނިސްޓްރީން ނެރުނު ބަޔާނެއްގައި ކުށްވެރިކޮށްފައިވަނީ ޝާހިދުގެ ދަތުރުފުޅެއްނޫނެވެ. ނަމަވެސް އެ ދަތުރުފުޅުގައި ޝާހިދު ކަންތައްކުރެއްވި ގޮތެވެ.

ޝާހިދު އާރމީނިއާއަށް ކުރެއްވި ދަތުރުފުޅުގައި އެމަނިކުފާނު ވަނީ، ތުރުކީން އާރމީނިއާގައި ހިންގިކަމަށް ބުނާ ގަތުލުއާއްމުގައި މަރުވި މީހުންގެ ހަނދާނީ ބިނާއަށް ޒިޔާރަތްކުރައްވާފައެވެ. އެތަނަށް ވަޑައިގެން ހަފުލާއެއްގައި ބައިވެރިވެވަޑައިގެން، ޓްވީޓެއްވެސް ކުރެއްވިއެވެ. އެމަނިކުފާނު ވަނީ މިހާރު އެ ޓްވީޓު ޑިލީޓްކުރައްވާފައެވެ.

މި ޒިޔާރަތްޕުޅާ ގުޅޭގޮތުން ތުރުކީން ނެރުނު ނޫސްބަޔާނުގައި ބުނީ، އެ ދަތުރުފުޅަކީ ގަތުލުއާންމާ ގުޅޭގޮތުން އެއްފަރާތުގެ ވާހަކަތައް ހާމަކުރުމަށް ނާޖާއިޒުގޮތުގައި ބޭނުންކުރައްވާފައިވާ ދަތުރުފުޅެއްކަމަށެވެ. އަދި އދ.ގެ އާއްމު މަޖިލީހުގެ ރައީސްގެ ހައިސިއްޔަތުން އެމަނިކުފާނު ވާންޖެހޭނީ އެއްވެސް ކޮޅަކަށް ބުރަވެވަޑައިނުގަންނަވާ ފަރާތަކަށްކަމަށާއި، އެފަދަ ކަންކަމުގައި މިއަށްވުރެެ ފަރުވާތެރި އަދި ޒިންމާދާރުގޮތަކަށް އަމަލުކުރައްވަންވާނެކަމަށް ތުރުކީގެ ބަޔާނުގައި ވެއެވެ.

މީގެ އިތުރުން 1915 ވަނަ އަހަރު ހިނގައިދިޔަ ކަންތައްތަކުގެ ހަގީގަތާމެދު އަމަލުކުރެވެންވާނީ ހަމަހަމަކަމާއި ތެދުވެރި އުސޫލަކުންކަމަށް ތުރުކީން ގަބޫލުކުރާކަމަށްވެސް ވަނީ ބުނެފައެވެ.

ތުރުކީން ބުނާގޮތުގައި، އާރމީނިއާގައި ގަތުލުއާންމު ހިންގިކަމަށް ބުނާ ވާހަކައަކީ ހަގީގަތާ ޚިލާފު ވާހަކަތަކެކެވެ. އެގޮތުން، 1915 ވަނަ އަހަރު ހިންގި އެ ހަރަކާތަކީ ތުރުކީގައި އޭރު އޮތް އުސްމާނީ ދައުލަތުން، އެ ދައުލަތުގެ ސަލާމަތަށް ހުރި ނުރައްކާތަކާ ގުޅިގެން ހިންގި ހަރަކާތެއްކަމަށް އެ ގައުމުން ގަބޫލުކުރެއެވެ.

ތުރުކީން ހިންގިކަމަށް ބުނާ ގަތުލުއާއްމުގައި 1.2 މިލިއަނެއްހާ މީހުން މަރުވިކަމަށް އާރމީނިއާއިން ބުނެއެވެ. އެ ފަރާތްތަކުގެ ހަނދާނުގައި ޚާއްސަ ހަނދާނީ ބިނާއެއްވެސް ވަނީ ހަދާފައެވެ.