ކޮމަންވެލްތު ގޭމްސްގެ ބެޑްމިންޓަން މިކްސް ޓީމު އިވެންޓުގައި ސްކޮޓްލެންޑާ ވާދަކޮށް ރާއްޖެ ބަލިވެއްޖެއެވެ.

އިނގިރޭސި ވިލާތުގެ ބާމިންހަމްގައި ހުކުރު ދުވަހު ކުޅުނު މެޗުން ރާއްޖެ ބަލިވީ 5-0 ންނެވެ. އެންމެ ފުރަތަމަ އަންހެން ސިންގަލްސްގައި ރާއްޖޭގެ ނަބީހާ ނިކުތީ ސްކޮޓްލެންޑުގެ ކާސްޓީ ގިލްމޯއާ ދެކޮޅަށެވެ. މި މެޗު ގިލްމޯ ކާމިޔާބުކުރީ ސީދާ ދެ ސެޓުންނެވެ. އެއީ ފުރަތަމަ ސެޓު 21-4 އަދި ދެ ވަނަ ސެޓު 21-10 ންނެވެ. ފިރިހެން ސިންގަލްސްގައި ރާއްޖޭގެ ޒަޔާން ޒަކީ ނިކުތީ ސްކޮޓްލެންޑުގެ ކުލުމް ސްމިތާ ދެކޮޅަށެވެ. މި މެޗުގެ ދެ ސެޓު ސްމިތު ގެންދިޔައީ، 21-6 އަދި 21-10 ންނެވެ.

އަންހެން ޑަބަލްސްގައި ރާއްޖޭގެ ނަބީހާ އާއި ފާތިމަތު ނަބާހާ ނިކުތީ ސްކޮޓްލެންޑުގެ އެލެއަނޯ އޯޑަނެލް އާއި ސިއާރާ ޓޮރަންސްގެ ޕެއާއާ ދެކޮޅަށެވެ. މި މެޗު ސީދާ ދެ ސެޓުން ކާމިޔާބުކުރީ ސްކޮޓްލެންޑުގެ ޕެއާއިންނެވެ. އެއީ ފުރަތަމަ ސެޓު 21-12 އަދި ދެ ވަނަ ސެޓު 21-5 ންނެވެ. ފިރިހެން ޑަބަލްސްގައި ރާއްޖޭގެ މުޙައްމަދު އަޖުފާން ރަޝީދާއި އަޙުމަދު ނިބާލް ނިކުތީ ސްކޮޓްލެންޑުގެ އަލެކްސަންޑާ ޑަން އާއި މެތިއު ގްރިމްލީގްގެ ޕެއާއާ ދެކޮޅަށެވެ. އެ މެޗުން ރާއްޖޭގެ ޕެއާ ބަލިވީ 21-9 އަދި 21-14 ންނެވެ.

މިކްސް ޑަބަލްސްގައި ރާއްޖޭގެ ޒަޔާން އާއި ނަބާހާއާ ދެކޮޅަށް ނިކުތީ ސްކޮޓްލެންޑުގެ އެޑަމް ހޯލް އާއި ޖޫލީ މެކްޕާސަންގެ ޕެއާއެެވެ. އެ މެޗުގައި ސްކޮޓްލެންޑުގެ ޕެއާ އިން ރާއްޖޭގެ މައްޗަށް ކުރި ހޯދީ 21-7 އަދި 21-6 ންނެވެ.

ގޭމްސްގެ މިކްސް ޓީމު އިވެންޓުގައި ރާއްޖެ ހިމެނިފައިވަނީ، ކެނެޑާ، ޔުގެންޑާ އަދި ސްކޮޓްލެންޑާއެކު ގްރޫޕް ސީގައެވެ. މި ގްރޫޕްގައި މިއަދު ރާއްޖޭގެ ދެ މެޗުން އޮންނާނެއެވެ. މިއަދުގެ ފުރަތަމަ މެޗުގައި ރާއްޖެ ނިކުންނާނީ ކެނެޑާއާއި ދެކޮޅަށެވެ. ދެ ވަނަ މެޗުގައި ނިކުންނާނީ ޔުގެންޑާއާއި ދެކޮޅަށެވެ.